Read cisena DANIELE 5 Bible Online

DANIELE 5 - cisena bible

DANIELE 5

¹Mfumu Beleshazara adasasanyira mathubu ache chikwi phwando ikulu, tenepo iye adamwa vinyu pabodzi pene nawo.

²Pikhamwa Beleshazara vinyu wache, iye adatonga kuti makhomitcho agolidi na asiliva, pontho na ndilo zidakwata babache Nebukadinezara m'Nyumba ya MBUYA mu Yerusalemu pidzeswe pamaso pache, towera mfumu, mathubu ache, akazache na akazache achibitchu apimwere vinyu.

³Kabodzi kene makhomitcho na ndilo pile pidadzeswa mwenemo, tenepo mfumu na mathubu ache, akazache na akazache achibitchu adapimwera.

⁴Pikhamwa iwo vinyu, iwo adakuza milungu yakusasanywa na siliva, golidi na nkuwa, simbi, matabwa pontho miyala.

⁵Vumbu-vumbu dzanja ninga ya munthu idaoneka mbitoma kulemba pafufu chifupi na pachakuikhirapo nyale m'nyumba yachifumu. Mfumu adayang'ana pikhalemba dzanja pile.

⁶Nkhope yache idabuluka kaluma mbaphatwa na mantha pikulu pene mwakuti mabondo ache adatoma kugedemera.

⁷Iye adagaluza fala kuchemera anyamatsenga, anyakukhumira na anyakulotera kuti adze mwenemo. Pidapita iwo mwenemo iye adalonga kuna mapungu ale mbati, “Munthu ule anakwanisa kuwerenga mafala enewa mbandipanga kuti mafalawo akulonganji, anavazikwa mkhanjo wamsuzi wanyemba mbavazikwa mkufu wa golidi m'khosi mwache, pontho anakhala wachitatu kutonga muufumu.”

⁸Kubuluka penepo mapungu onsene a mfumu adapita mwenemo, kwache iwo adachimwana kuwerenga pidalembwa pafufu pile, penu kupanga mfumu kuti mafalawo akulonganji.

⁹Mfumu Beleshazara adanyanyiratu kugoswerwa, pontho nkhope yache ndiye idanyanyiratu kubuluka kaluma. Tenepo mathubu ache adasowa chakuchita.

¹⁰Pidava mache mfumu kulonga-longa kukhachita mfumu na mathubu ache kule adapita m'subi mukhadyerwa phwando mule. Iye adalonga mbati, “Dondowe mfumu! Lekani chita mantha. Nkhope mbileke buluka kaluma.

¹¹Muufumu mwanu muno muna munthu ule ana mzimu wa milungu yakuchena. Babanu mbali mfumu, munthu weneyu adaoneka kuti akhali waudziwisi, wakuvesa pinthu, pontho wanzeru ninga nzeru za milungu. Tenepo babanu, Mfumu Nebukadinezara, adamsankhula kukhala mkadamu wa anyakuombedza, anyamatsenga, mfiti na anyakulotera onsene.

¹²Munthu weneyu Daniele, ule mfumu adamtchandula Beleteshazara adaoneka ninga nyaudziwisi, nyanzeru pontho nyakuvesa pinthu, pontho nyakukwanisa kuthumbusula ndoto, kufuthula nthanthi pontho kudziwa pinthu pyakubisika. Tenepo chemeresani Daniele, tenepo iye anakupangani kuti pyalembwa penepapi pikulonganji.”

¹³Natenepo Daniele adadzeswa pamaso pa mfumu, tenepo mfumu adalonga kuna iye mbati, “Ayi ndiwe Daniele, munthu adadzesa babanga ninga nyaperezo kubulukira ku Yuda ule.

¹⁴Ine ndava kuti mzimu wa milungu yakuchena ili muna iwe, pontho kuti ndiwe nyakuvesa pinthu, nyaudziwisi pontho nyanzeru pikulu.

¹⁵Mapungu na anyakukhumira adadza muno dzawerenga pidalembwa pafufu pile, pontho kundipanga kuti pikulonganji. Kwache iwo adapichimwana.

¹⁶Mbwenye ine ndava kuti iwe umbakwanisa kuthumbusula ndoto, pontho kudziwa pinthu pyakubisika. Ngakhala iwe unakwanisa kuwerenga mafala enewa mbundipanga kuti pikulonganji, iwe unavazikwa mkhanjo wamsuzi wanyemba na mkufu wagolidi m'khosi mwako, pontho unakhala wachitatu kutonga muufumu mwanga.”

¹⁷Daniele adatawira mbati, “Imwe munakwanisa kukoya pyanu mitukwayo, penu kuipasa munthu unango ene. Kwache ine ndinakuwerengerani pyalembwa penepapi mbandikupangani kuti pikulonganji.

¹⁸“Mulungu Wakudzulu-dzulu adaikha babanu Nebukadinezara kukhala mfumu wamkulu mbampasa chilemedzo na demelero.

¹⁹Iye akhali mkulu pyakwanga mwakuti anthu a madzinza onsene, mtundu onsene na chilongero chonsene akhamgopa pontho akhatetemera naye. Ngakhala iye akhafuna pyakupha munthu, iye akhapha pyache; ngakhala akhafuna pyakukhonda kumpha, iye nee akhampha tayu. Iye akhalulupisa na kulemedza munthu onsene akhafuna iyeyo.

²⁰Mbwenye podi iye adasanduka wakulunkuma, wakuuma mtima pontho wakukala mtima, iye adabuluswa pampando wachifumu mbapokoserwa chilemedzo chache chonsene.

²¹Iye adabuluswa pakati pa anthu, pontho manyerezero ache adasanduzwa aunyama. Iye adakhala pakati pa mabulu am'tsanga mbadya maudzu ninga ng'ombe. Iye adagona pamtetete mbapasowa chinango chakumtchinjiriza kuna bume. Pakumalisira pache iye adatawira kuti Mulungu Wakudzulu-dzulu ndi mtongi wa maufumu onsene, pontho ambaupereka kuna munthu onsene anafuna iye.

²²“Mbwenye imwe mwanache, Beleshazara, nee mwapichepesa mwekha ene tayu, podi kwene kuti imwe mukupidziwa pinthu pyonsenepi.

²³Imwe mudachita mwakupokanyisana na MBUYA wa kudzulu mbamudza muno na makhomitcho na ndilo pidakwatwa ku Nyumba ya Mulungu. Imwe, mathubu anu, akazanu, na akazanu achibitchu mudapiphatisa basa kumwera vinyu pinthu penepi, pontho imwe mudalemedza milungu yakusasanywa na golidi, siliva, nkuwa, simbi, thabwa na miyala, milungu ile nkhabe kwanisa kuona, kuva, penu kudziwa pinthu tayu. Imwe nee mudalemedze Mulungu, ule ambakoya moyo wanu m'manja mwache, mbadziwa pyonsene pimbachita imwe ule tayu.

²⁴Ndi thangwi yache Mulungu atumiza dzanja yeneyi kulemba mafala enewa.

²⁵“Mafala adalembwa ale mbawa: ‘MENE, MENE, TEKELE, PARASINI.’

²⁶Mafala enewa akulonga tenepa: Mene: Mulungu alengesa nsiku za ufumu wanu mbaumalisa;

²⁷Tekele: Imwe mwapimwa na mdida mbamugumanwa kuti mwacherewera pyakwanga pene;

²⁸Parasini: Ufumu wanu wagawiwa mbuperekwa kuna Amedi na Aperesi.”[3]

²⁹Penepo Mfumu Beleshazara adatonga anyabasache kuti avazike Daniele mkhanjo wamsuzi wanyemba wachifumu, pontho kuvazikwa mkufu wa golidi m'khosi mwache. Tenepo iye adapaswa chidzo chakukhala wachitatu muufumu.

³⁰Mosiku onthowo Beleshazara, mfumu wa Babiloni, adaphiwa,

³¹natenepo Dariusi wa ku Medi adapita m'mbuto mwache ninga mfumu uku ana pyaka makumatanthatu na piwiri.