Read cisena DANIELE 6 Bible Online

DANIELE 6 - cisena bible

DANIELE 6

¹Pidamkomera Dariusi kusankhula amuna dzana na makumawiri kukhala akulu a boma muufumu wache onsene.

²Padzulu pawo iye adasankhula pontho amuna anango atatu, mbodzi mwa iwo mbakhala Daniele, kukhala atongi kuyang'anira akulu a boma, towera pinthu pya mfumu pifambe mwadidi.

³Sindzidzi Daniele adaoneka wakupikwanisa pyakwanga kupiringana atongi anzache awiri ale, pabodzi pene na akulu a boma dzana na makumawiri adasankhulwa ale. Na thangwi ya penepi mfumu adanyerezera kumuikha kukhala mtongi wa ufumu onsene.

⁴Atongi anzache awiri na akulu a boma ale adayesa-yesa kugumana mathangwi akumdawisa nawo Daniele, pa mafambisiro ache a ufumu, kwache iwo adachimwana kugumana na thangwi ene, thangwi Daniele akhali munthu wakukhulupirika, wakuona mtima pontho okhonda funa pyakudyekerwa.

⁵Pakumalisira pache amuna enewa adalonga okha ene mbati, “Ife nkhabe kwanisa tayu kugumana mathangwi akumdawisa nawo tingakhonda phatisa basa pya chipembedzo chache.”

⁶Tenepo atongi awiri na akulu a boma ale adenda kuna mfumu mbalonga mbati, “Dondowe Mfumu Dariusi!

⁷Tonsenefe ale timbafambisa ufumu wanu, atongi, akulu a boma, mapungu na mathubu anango onsene taphatizana kuti imwe, Mfumu, muikhe matongero amphamvu mbamutonge kuti munthu na mbodzi ene mbaleke kuaswa. Tongani kuti nsiku makumatatu paleke khala munthu na mbodzi ene wakupempha chinthu kuna mulungu unango, penu kuna munthu ene pyache tayu, kupambula kuna imwe ene basi, Mfumu. Munthu onsene anaswa matongero enewa athema kuponywa m'dzenje ya nkhalamu.

⁸Chinchino, Mfumu, perekani matongero mbamuikhepo chidindo chanu, towera aleke kufudzika malingana na mwambo wa Amedi na Aperesi, ule nkhabe kwanisa kufudzika tayu.”

⁹Natenepo Mfumu Dariusi adapereka matongero akukhala na chidindo chache ale.

¹⁰Pidapidziwa Daniele kuti pakhadaperekwa matongero akuchita kulembwa, iye adenda kumusa kwache mbakakwira subi ya m'dzulu, kule mazhanera ache adayang'ana ku Yerusalemu. Ninga mwa nsambo wache iye adagodama pazhanera yakufungula mbapemphera pontho kupereka takhuta kuna Mulungu wache katatu pansiku.

¹¹Pidamgumaniza anyamalwache akupemphera, pontho kupempha chiphedzo kuna Mulungu wache,

¹²onsene ale pabodzi pene adenda kuna mfumu kasumira Daniele. Iwo adalonga mbati, “Mfumu, ayi si imwe tayu mudapereka matongero akuchita kulembwa akuti nsiku makumatatu munthu onsene, ule anapempha chinthu kuna mulungu unango, penu kuna munthu unango ene pyache, kupambula imwe ene basi, Mfumu, athema kuponywa m'dzenje ya nkhalamu?” Mfumu adatawira mbati, “Ande, ine ndidapereka matongero amphamvu malingana na mwambo wa Amedi na Aperesi, ule nkhabe kwanisa kufudzika tayu.”

¹³Iwo adalonga kuna mfumu mbati, “Daniele, ule ndi nyaperezo wa ku Yuda, nkhabe kukuverani tayu, penu kuikha konta tayu matongero akukhala na chidindo chanu adapereka imwe ale. Iye ambathimiza basi kupemphera katatu pansiku.”

¹⁴Pidapiva mfumu adasanyika napyo mtima pyakwanga mbayesa-yesa kugumana njira yadidi yakupulumusira nayo Daniele. Iye adathimiza basi kuyesa-yesa kuchita tenepo mpakana dzuwa kuthobila.

¹⁵Tenepo amuna ale adadza pontho kuna mfumu mbalonga kuna iye mbati, “Mfumu kumbukani kuti malingana na mwambo wa Amedi na Aperesi, nkhabe matongero penu mwambo ambapereka mfumu athema kufudzika tayu.”

¹⁶Natenepo mfumu adatonga kuti Daniele aponywe m'dzenje ya nkhalamu. Iye adalonga kuna Daniele mbati, “Mulungu wako ambatumikira iwe mwakukhulupirika ule, mbakupulumuse.”

¹⁷Mwala udaikhwa kufunga nawo msuwo wa dzenje mbauzweremetha, pontho mfumu adaikha chidindo chache chachifumu, pontho na chidindo cha mathubu ache pamsuwo pale, towera paleke khala munthu na mbodzi ene wakufuna pyakupulumusa Daniele.

¹⁸Kubuluka penepo mfumu adabwerera kumusa kwache mbakhala mosiku onsene okhonda ona chitulo, penu kudya, pontho okhonda tawira chinthu na chibodzi chene chakumchitisa kukomerwa.

¹⁹M'makalakwecha mfumu adalamuka mbachimbiza kwenda kudzenje ya nkhalamu ile.

²⁰Pidafika iye chifupi na dzenjeyo adachemera Daniele mwakuva nsisi pikulu pene mbati, “Daniele, nyabasa wa Mulungu wamoyo! Ayi Mulungu ambatumikira iwe ule, akwanisa kukupulumusa kuna nkhalamu?”

²¹Daniele adatawira mbati, “Dondowe mfumu!

²²Mulungu wanga adatuma mngelo wache kuphopha kukanwa kwa nkhalamuzi, towera zileke kundikuwaza. Iye achita penepi, thangwi apidziwa kuti ine sidadawe tayu pamaso pache, pontho sidakudawireni tayu, imwe mfumu.”

²³Mfumu adakomerwa pyakwanga pene mbatonga kuti Daniele abuluswemo m'dzenje ya nkhalamu ile. Tenepo iwo adambulusa mbaona kuti iye nee hadakuwazike na pang'ono pene tayu, thangwi iye adanyindira Mulungu wache.

²⁴Mfumu adatonga kuti amuna onsene akhadasumira Daniele ale aphatwe, iwo ene pabodzi pene na akazawo na anawo mbaponywe m'dzenje ya nkhalamu. Natenepo iwo mbadzati fika pansi pa dzenje ile, nkhalamu zidaanumphira mbiziapwetedza na magogodo ene.

²⁵Kubuluka penepo Mfumu Dariusi adalembera kuna anthu a madzinza onsene, mtundu onsene pontho na chilongero chonsene muufumu onsenewo kuti, “Mwenyikiro!

²⁶Ndikupereka matongero muufumu wanga onsene kuti munthu onsene athema kugopa na kupembedza Mulungu wa Daniele. “Thangwi iye ndi Mulungu wamoyo; iye ambatonga kwenda na kwenda. Ufumu wache nkhabe dzavungika na pang'ono pene tayu, pontho mphamvu zache nkhabe dzammalira tayu.

²⁷Iye ndi Nyankhombo pontho Dombo; iye ambachita pyakudodomesa pontho pidzindikiro, kudzulu na padziko yapansi pene pano. Iye adapulumusa Daniele kuna mphamvu za nkhalamu.”

²⁸Natenepo Daniele pinthu pyache pyonsene pidamfambira mwadidi pandzidzi wa Mfumu Dariusi, pontho na Kirusi, mfumu wa ku Peresia.