Read cisena DANIELE 8 Bible Online

DANIELE 8 - cisena bible

DANIELE 8

¹Chaka chachitatu Beleshazara mbali mfumu, ine Daniele ndidaona masomphenya anango, pidamala ine kuona masomphenya akutoma ale.[4]

²Ine ndidaona kumasomphenya kuti ndikhali mumpanda wa mzinda wa Susa m'nthemba ya Elamu; ine ndikhaimira chifupi na mkulo wa Ulai.

³Tenepo ndidakwiza maso mbandiona bira wa nyanga ziwiri zakulapha aimira m'khundu-khundu mwa mkulo. Nyanga ibodzi ikhali yakulapha kupiringana inangoyo, podi kwene kuti ndiye ikhali yakumalisira kumera.

⁴Ndidayang'ana birayo, tenepo na nyanga zache iye adathamangira kumadokero dzuwa, kumpoto na kumwera. Nkhabe nyama inango idakwanisa kuimisana naye, penu kupulumuka m'manja mwache tayu. Bira ule adachita pyokhokha pyakumkomera mbasanduka wakutumbama.

⁵Pikhanyerezera ine pya penepi, vumbulukutu mbuzi idadza kubulukira kumadokero dzuwa uku ikuthamanga pyakwanga mwakuti njondo zache nee zikhakhuya pansi tayu. Iyo ikhali na nyanga ikulu pakati pa diso na diso inango.

⁶Mbuziyo idadza chifupi na bira, adaona ine aimira m'khundu-khundu mwa mkulo ule, mbathamangira kukhali bira kule na mphamvu zache zonsene.

⁷Ine ndidaona mbuzi ile ikudima bira ule. Mbuzi ile idazhangali pyakwanga mwakuti idanumphira bira ule mbimkhumula nyanga zache ziwiri zile. Bira ule akhali nkhabe mphamvu zakukwanisa kuimisana naye tayu. Bira adagwa pansi mbapondedzwa, tenepo pakhali nkhabe na mbodzi ene wakumvunulira tayu.

⁸Mbuzi ile idathimiza na kulunkuma, kwache pidakula iyo mphamvu, nyangache ikulu ile idagwandika, tenepo m'mbuto mwache mudamera nyanga zinango zikulu-zikulu zinayi mbiziyang'ana kumakhundu onsene anayi.

⁹Panyanga inango ibodzi padamera nyanga inango, ile idatoma ing'ono-ng'ono, kwache idakula mphamvu mpakana kumwera, pontho kumabulukiro dzuwa, pontho kwenderatu ku Dziko Yakubalika.

¹⁰Nyanga ile idathimiza kukula mpakana idaphata nyenyezi, gulu ya anyankhondo a kudzulu ile, mbaatchithisira padziko yapansi, pontho adaapondedza.

¹¹Iyo idapikhazika yokha ene kukhala ninga Mfumu wa anyankhondo a kudzulu onsene; idamalisa nsembe zimbaperekwa nsiku na nsiku, tenepo adalulupisa Nyumba ya Mulungu.

¹²Na thangwi ya kudawa kwa anthu, anyankhondo a kudzulu ale na nsembe za nsiku na nsiku zile pidaperekwa m'manja mwacho. Pinthu pyache pyonsene pikhachita nyanga ile pikhamfambira mwadidi, pontho chipembedzo chakuona chidaponyerwa pansi.

¹³Penepo ndidava mngelo akulonga, pontho mngelo unango adalonga kuna mwanzache mbati, “Ayi masomphenya anakwana-kwana lini kani, masomphenya akulonga pya nsembe za nsiku na nsiku, pyakudawa pile pidadzesa kuvungika, pontho na kuponderezwa kwa Nyumba ya Mulungu, na anyankhondo a kudzulu ale?”

¹⁴Iye adalonga kuna ine mbati, “Penepi pinachitika mpakana nsiku pikwi piwiri na madzana matatu machibese na mawulo; kubuluka penepo Nyumba ya Mulungu inabwezerwa ninga mukhali iyo kale.”

¹⁵Pikhaona ine Daniele masomphenya ale, pontho kufuna kuvesa kuti akhalonganji, vumbu-vumbu pamaso panga padaimira unango wakuoneka ninga munthu.

¹⁶Tenepo ndidava fala ya munthu kumkulo wa Ulai kuchemera kuti, “Gabriele, panga munthu weneyu kuti masomphenya enewa akulonganji?”

¹⁷Gabriele adadza mbaimira chifupi na ine, tenepo ine ndidachita naye mantha pyakwanga mwakuti ndidagwa na fufumimba. Iye adalonga kuna ine mbati, “Iwe mwana munthu, wathema kuvesa kuti masomphenya enewa akulonga pya nsiku zakumala kwa dziko yapansi.”

¹⁸Pikhalonga iye tenepo kuna ine, ine ndikhali m'chitulo chakufa nacho, mwenemo ndagona na fufumimba. Iye adandiphata mbandiimirisa.

¹⁹Iye adalonga mbati, “Ine ndinakupanga pinthu pinafuna dzachitika thangwi ya kuzhangali kwa Mulungu, podi masomphenyawo akulonga pya nsiku zakumala kwa dziko yapansi.

²⁰“Bira wa nyanga ziwiri adaona iwe ule, akuimirira maufumu a Amedi na Aperesi.

²¹Mbuzi yakupenga ile ikuimirira mfumu wa Grisi, pontho nyanga yakudodomesa, idamera pakati pa diso na diso ile, ikuimirira mfumu wakutoma.

²²Nyanga zinayi zidamera pidagwandika nyanga yakutoma ile, akuimirira mafumu anayi, ale anafuna dzabalwa muufumu, kwache nkhabe dzakhala sasawa mphamvu na ufumu wakutoma ule tayu.

²³“Ndzidzi wa kumala kwa maufumu ungafika chifupi, mwenemo anyakupandukira afika pachimache na pyakudawika, panaoneka mfumu wakuuma mtima, wakukala mtima pontho wakunama.

²⁴Iye anakhala na mphamvu, kwache nee na mphamvu zache zene tayu. Iye anachitisa kuvungika kukulu pyakwanga mbapikwanisa papyonsene pimbachita iye. Iye anavunga anyamphamvu zawo pontho na anyakuchena ene a Mulungu.

²⁵Iye anachitisa kunama kukhala ponsene pene mbapiyesa yekha ene wakufunika. Ndzidzi unanyerezera anthu kuti ali pakupata, iye anavunga anthu azinji ene mwakukhonda kuacheuza. Iye anatikana Mfumu wa mafumu onsene, kwache iye anavunga mwakukhonda phatisa basa mphamvu za munthu.

²⁶“Masomphenya enewa akulonga pya nsembe zakuperekwa machibese na mawulo, atchululwa kuna iwe ale, ngakuonadi. Kwache pikoye mumtima mwako, thangwi akulonga pya pinthu pile pinafuna dzachitika m'tsogololetu.”

²⁷Ine Daniele ndidatonthola magogodo mbandifeluka nsiku zizinji zene. Tenepo ndidalamuka mbandienda kaphata basanga idandipasa mfumu ile. Ine ndidamalwa nzeru nawo masomphenya enewa mwakuti sidakwanise kuavesa tayu.