Read cisena DANIELE 9 Bible Online

DANIELE 9 - cisena bible

DANIELE 9

¹Chaka chakutoma cha Dariusi mwana Ahasuwero wa dzinza ya Medi, ule adaikhwa kukhala mfumu wa Babiloni

²chaka chakutoma cha utongi wache, ine Daniele ndidavesa kubulukira m'Malemba kuti kuvungika kwa Yerusalemu kunakhala mpakana pyaka makumanomwe malingana na mafala a MBUYA kudzera muna mprofeti Yeremia.

³Tenepo ndidapemphera kuna Mbuya Mulungu na mtimanga onsene, kumdembetera, kupimana kudya, kuvala masakha pontho na kupikhwaza dotha.

⁴Ine ndidapemphera kuna MBUYA Mulungu wanga mbandibweka kudawa kwa anthu anga. Ine ndidalonga kuti, “Mbuya, Mulungu wamkulu pontho wakugopeka, ndimwe nyakukoya chiverano chanu mbamuonesa kuafuna kwanu kokhonda mala anthu ale ambakufunani pontho ambavera matongero anu.

⁵“Ife tadawa, pontho tachita pyakuipa. Ife ndife akudawika, pontho tapandukira; ife takhonda kuvera matongero anu mbatibauka kubuluka kuna mwambo wanu.

⁶Ife sidavere anyabasanu maprofeti tayu, ale adalonga na dzinanu kuna mafumu athu, atongi athu, makolo athu, pontho na dzinzathu yonsene.

⁷“Mbuya, imwe ndimwe nyakulungama, mbwenye lero ife tapichitisa tekha ene manyadzo; amuna a mu Yuda na Yerusalemu, pontho na Aisraele onsene kumadziko onsene akutali na achifupi ene kudatibalalisira imwe, thangwi ya kukhonda khulupirika kwathu kuna imwe.

⁸MBUYA, ife, mafumu athu, atongi athu na makolo athu ene tamala phatwa na manyadzo, thangwi takudawirani.

⁹Mbuya Mulungu wathu ngwansisi, pontho wakulekerera pyakudawa, podi kwene kuti ife tampandukira;

¹⁰ife nee tidavere MBUYA Mulungu wathu, penu kokoya mwambo udatipasa iye kudzera muna anyabasache maprofeti ule tayu.

¹¹Aisraele onsene adaswa mwambo wanu mbabauka pyawo, kukhonda kukuverani. “Natenepo dzedze na kupikira konsene kudalembwa m'mwambo wa Mose, nyabasanu wa Mulungu ule, pyakhuthulirwa pana ife, thangwi ife takudawirani.

¹²Imwe mwachitisa kukwana-kwana mafala adalongwa mwakupokanyisana na ife, pontho atongi athu, pakudzesa nyatwa zikulu pakati pathu. Nkhabe kwinango pansi pa thambo kule kwachitwa pinthu ninga pile pyachitika muno mu Yerusalemu.

¹³Ninga montho mwalemberwa ipyo m'mwambo wa Mose, nyatwa zonsenezi zagwa pana ife, kwache ife nee tidayese kuchita pinthu pyakukomera imwe, MBUYA Mulungu wathu pakuleka pyakudawa pyathu mbatiteweza pyakuonadi pyanu tayu.

¹⁴Imwe MBUYA Mulungu wathu hamudachite nthontho kudzesa nyatwa pana ife tayu, thangwi pyonsene pimbachita imwe mphyakulungama; kwache ife nee tidakuvereni tayu.

¹⁵“Mbuya Mulungu wathu, ule mudaonesa mphamvu zanu pakubulusa anthu anu m'dziko ya Iguputo, pontho ule mbiri yanu ikuveka basi na lero, ife tadawa, pontho tachita pyakudawika.

¹⁶Mbuya, kufuna kuonesa kuti ndimwe nyakulungama, malisani kuzhangali kwanu, pontho mbombowesani ukali wanu pana Yerusalemu, thangwi wenewu ndi mzindanu, pontho phiri yanu yakuchena.[5] Pyakudawa pyathu, pontho na pyakuipa pya makolo athu pyachitisa kuti Yerusalemu na anthu ache ene akhale chakusekesa kuna anthu onsene atizungulirawa.

¹⁷“Chinchino, Mulungu wathu, veserani kupemphera, pontho yang'anani kudembetera kunachita nyabasanu. Na thangwi ya dzinanu Mbuya, komerani mtima Nyumbanu yakuvungika ile.

¹⁸Ikhani khutu mbamuvesere Mulungu wanga; fungulani maso mbamuone madembe a mzinda wakwata dzinanu ule. Ife nkhabe kupempha kuna imwe thangwi ndife akulungama tayu, mbwenye kuti imwe ndimwe nyansisi.

¹⁹MBUYA ngaveserani! MBUYA tilekereni! MBUYA ngaveserani kupemphera kwathu mbamuchitepo pinthu! Na thangwi ya dzinanu, Mulungu wanga, lekani chita nthontho, podi mzindanu na anthu anu ene pyakwata dzinanu.”

²⁰Pikhalonga ine, pontho kupemphera, kubweka kudawa kwanga na kwa anthu anga ene Aisraele, pontho kudembetera MBUYA Mulungu wanga thangwi ya phiri yache yakuchena,

²¹pikhathimiza ine kupemphera, Gabriele, ule akhadaona ine kumasomphenya anga akutoma, adadza kuna ine na kumbuluka. Ndzidzi wenewo ukhali ndzidzi wakupereka nsembe zakumawulo.

²²Iye adadza mbalonga kuna ine mbati, “Daniele, ine ndadza pano dzakupasa udziwisi na nzeru.

²³Sindzidzi iwe nkhutoma kupemphera, Mulungu adava kupemphera kwako, tenepo ine ndadza dzakupanga kukutawira kwachita iye, thangwi iye ambakufuna pyakwanga pene. Natenepo nyerezera mwadidi mphangwazi mbuvese masomphenyawa.

²⁴“Pyaka makumanomwe kupiinjipisa na kanomwe ndi ndzidzi ule unafuna Mulungu dzamalisa pyaumambala pyonsene pakati pa anthu ako, pontho na mzindako wakuchena. Iye anamalisa pyakudawa, kulekerera pyakudawa, kukhazikisa chilungamo chakwenda na kwenda, kuchitisa masomphenya na mphangwa zauprofeti kukwana-kwana, pontho na kupambulira pontho Nyumbache[6] kuna iye.

²⁵“Dziwa mbuvese pinthu penepi: Kubulukira pa ndzidzi unaperekwa matongero akuti Yerusalemu amangwe pontho mpakana kudza kwa Mtongi, Nyakusankhulika wa Mulungu ule, panagwanda pyaka pinomwe kupiinjipisa na kanomwe. Tenepo pyaka makumatanthatu na piwiri kupiinjipisa na kanomwe Yerusalemu anamangwa pontho na misewu yache ene, pontho mgelo unakumbwa kuuzungulira kunja kwache kuutchinjiriza, kwache penepi pinachitika pandzidzi wa nyatwa.

²⁶Pangagwanda pyaka makumatanthatu na piwiri kupiinjipisa na kanomwe, Nyakusankhulwa wa Mulungu ule, anaphiwa mwakusowa chilungamo. Anyankhondo a mtongi wakufuna kudza ndzidzi wenewo anavunga mzinda na Nyumba ya Mulungu. Mamalisiro anafika ninga kudza kwa madzi makulu: Nkhondo inathimiza kumenyeka mpakana mamalisiro afike, podi Mulungu asasanya kuvungika kukulu.

²⁷Mtongi weneyo anakhazikisa chiverano na anthu azinji ene pyaka pinomwe. Pakati na kati pa ndzidzi wenewu, iye anamalisa kupereka nsembe, pontho na pyakupereka pinango. Pontho iye anaikha chinthu chakunyansa chimbavunga chile[7] m'Nyumba ya Mulungu mbachikhala penepo mpakana mamalisiro ache adaikhirwa icho ale afike.”