Read cisena HOSEA 11 Bible Online

HOSEA 11 - cisena bible

HOSEA 11

¹MBUYA akulonga kuti, “Pikhali Israele mwana, ine ndikhamfuna, mbandimchemera ninga mwananga kubuluka mu Iguputo.

²Kwache kunyanya kuachemera Aisraele kukhachita ine, iwo ndiye adanyanyiratu kubauka kubuluka kuna ine. Iwo adapereka nsembe kuna milungu Baala mbafukiza pyakununkhira kuna mifanikizo.

³Ndine pano ndidamfunzisa Eferemu kuthatchira, kumphata pamkono, kwache iye hadapidzindikire tayu kuti adamuwangisa ndine pano.

⁴Ine ndidamkweyera kuna ine mwakumfuna, pontho na kukoma kwanga mtima. Ine ndidamthukula mbandimtsamirisa paphutu panga; ine ndidakotama kumdyesa.

⁵“Ayi iwo nkhabe bwerera ku Iguputo, pontho Aasiria nkhabe kuatonga tayu, na thangwi yakuti iwo akhonda leka pyakudawa pyawo?

⁶Matalasada anachetuma-chetuma m'mizinda mwawo; mphinga za misuwo ya mzinda zinamala vungwa, pontho anthu anavungwa thangwi ya pinthu pyasasanya iwo dzapichita.

⁷Anthu anga ana phinga kufuna kubauka kubuluka kuna ine. Podi kwene iwo alire tani thangwi ya goli-goli yawo, kwache nkhabe na mbodzi ene wakuabulusira tayu.

⁸“Ayi iwe, Israele ndikukhonderenji? Thangwi yache ninji ndikupase nkhodolo iwe? Ndikuvungirenji ninga mudachitira ine na mizinda ya Adima, penu Zeboimu? Mtimanga nkhabe kunditawirisa kuchita tenepo tayu; nyambalo andikulira pyakwanga.

⁹Ukali wanga nkhabe dzaukhuthula tayu, penu kuzungunuka kumvunga Eferemu nkhabe tayu. Thangwi ine ndine Mulungu, nee munthu tayu, Nyakuchena pakati panu. Ine nkhabe kudza mwakuzhangali tayu.

¹⁰“Anthu anga anatewera ine, MBUYA; ine ndingabangula ninga nkhalamu, ananga anati abwere na kutetemera kubulukira kumadokero dzuwa.

¹¹Iwo anabwera na kutetemera na mantha ninga mbalame kubulukira ku Iguputo, ninga majiwa kubulukira ku Asiria. Ine ndinaakhazikisa m'misa mwawo. Ndalonga ndine MBUYA.”

¹²MBUYA akulonga kuti, “Eferemu andizungulira na pyakunama; Israele andizungulira na ufaka-faka. Yuda akuthimbanambo pyache na Mulungu, kuthimbana pyache podi na Nyakuchena wakukhulupirika makayo.”