Read cisena HOSEA 12 Bible Online

HOSEA 12 - cisena bible

HOSEA 12

¹“Eferemu kwache nkhudya mphepo; nsiku zonsene iye ambathamangisa pyache mphepo yakumabulukiro dzuwa, mbapithimizira yekha ene pyakunama na kuzunguzika. Iye ambachita chiverano na dziko ya Asiria mbatumiza mafuta aolivi ku Iguputo.”

²MBUYA ana mseru na Yuda; iye anatchunyusa Yakobo malingana na makhaliro ache mbambwezera mwakuthemerana na mabasache.

³M'mimba mwa mache, iye adaphata chitende cha mbaleache; pidasanduka iye mamunamkulu, iye adathimbana na Mulungu.

⁴Iye adathimbana na mngelo mbamkunda; iye adalira mbampempha kuti amkomere mtima. Iye adamgumana pa Betele mbalongesana naye[20] penepo,

⁵MBUYA Mulungu Wamphamvu zonsene, MBUYA ndi dzina yache imbadziwika na iye.

⁶Mbwenye imwe mwathema kubwerera kuna Mulungu wanu; thimizani khalani akufunana mbamuchite chilungamo; ndzidzi onsene khalani na chidikhiro pana Mulungu wanu.

⁷MBUYA akulonga kuti, “Israele akhala ninga nyamalonda ule ambaphatisa basa midida yakunama; iye ambakomerwa na kuchita pinthu mwakuba.

⁸Eferemu ambagaya pyache mbati, ‘Ehede! Ndine nyakufuma pyakwanga pene. Na mfuma yonsene ina ine, iwo nkhabe kundigumana na chakuipa, penu na chakudawa tayu.’

⁹“Ine ndine MBUYA Mulungu wanu, adakubulusani m'dziko ya Iguputo ule; ndinakuchitisani pontho kukhala m'makumbi ninga mukhali ipyo nsiku za maphwando anu akupambulika ale.

¹⁰Ine ndidalonga na maprofeti, ndidaaonesa masomphenya azinji ene mbandilonga misangani kudzera muna iwo.

¹¹Ayi Gileadi ndi nyakudawa? Ayi anthu ache ngakusowa basa? Ayi iwo ambapereka nsembe ng'ombe zimuna mu Giligala? Maguwawo ansembe anasanduka milu ya madongolomwa m'munda wakutipulwa.”

¹²Yakobo adathawira kudziko ya Aramu; Israele adaphata basa kuti asembe mkazi, tenepo kuti iye akwate mkazi, iye adaphata basa yakudyesa mabira.

¹³MBUYA adaphatisa basa mprofeti kuti abuluse Israele mu Iguputo, tenepo pakuphatisa basa mprofetiyo, iye adamuyang'anira mwadidi.

¹⁴Kwache Eferemu amzhangalisa pikulu pene; kuchuchisa chiropa konsene kudachita iwo MBUYA anati akugwesere pamsolo pache mbabwezera thangwi ya kutikana kwache konsene.