Read cisena HOSEA 13 Bible Online

HOSEA 13 - cisena bible

HOSEA 13

¹Ndzidzi udabulusa Eferemu fala, anthu adatetemera; iye adapaswa chilemedzo mu Israele. Kwache iye adadawa pakutenukira kuna milungu Baala, natenepo iye adafa.

²Chinchino akuthimiza basi kudawa; na siliva iwo ambapisasanyira milungu, iwo ambasasanya mifanikizo yawo mwaluso; yonseneyo basa ya manja aluso. Pya anthu enewa ambalongwa kuti, “Iwo ambapereka anthu ninga nsembe mbampsompsona milomo ya mifanikizo ya mwanamphulu.”

³Natenepo iwo anakhala ninga nkhungu ya kumachibese, ninga bume ile imbakungunuka pyayo, ninga dzungu yakumbuluka pyayo kubulukira pa mbuwa, ninga utsi wakubuluka na pazhanera.

⁴MBUYA akulonga kuti, “Kwache ine ndine MBUYA Mulungu wanu, adakubulusani m'dziko ya Iguputo ule. Imwe nee mwathema kukhala na Mulungu unango tayu, mbwenye ine ene basi, nkhabe Nyankhombo unango padzulu pa ine pano.

⁵M'thando yatchetcha, mbuto yakupisa pyakwanga ile, ine ndidakuyang'anirani mwadidi.

⁶Ndzidzi udaapasa ine phoso, iwo adakhuta; pidakhuta iwo, adatoma kugaya; kubuluka penepo adandiduwalira pyawo.

⁷Natenepo ndinabwera pana iwo ninga nkhalamu; ninga nyalugwe, ine ndinaabisalira swiswiswi.

⁸Ninga mbinzi wakuberwa anache, ine ndinati ndiaphate, ndinati ndiatumbule pamimba. Ninga nkhalamu ndinati ndiakhudyule, ninga chirombo cham'tsanga ndinati ndiakhwadzule khwadzule.

⁹“Israele, ndinati ndikuvunge. Ayi pana unango ule anakwanisa kukuphedza?

¹⁰Ali kupi mfumu wako kuti akupulumuse? Atongi ako ale ali kupi m'maluwani mwako monsene; atongi adalonga iwe pya iwo ale kuti, ‘Ngandipase mfumu pontho atongi?’

¹¹Tenepo na kuzhangali kwanga ine ndidakupasa mfumu, pontho na ukali wanga ine ndidambulusa.

¹²Pyakuipa pya Eferemu pikukoyiwa; pyakudawa pyache pyachita kulembwa m'bukhu.

¹³Mtswotswo khala ninga mkazi wamimba pakulekwa, lero wamgwerambo, kwache iye ndi mwana wakusowa nzeru; ndzidzi wache ungakwana iye nkhabe buluka m'mimba mwa mache tayu.

¹⁴“Ine nkhabe dzaapulumusa tayu kuna mphamvu za masiye; ine nkhabe dzaaombola kuimfa tayu. Ayi iwe imfa, ili kupi miliri yako? Mphamvu zako zili kupi, iwe dziko ya anyakufa? “Ine nkhabe dzava nyambalo tayu,

¹⁵podi kwene kuti pinthu pyache pimfambire mwadidi pakati pa abale ache.[21] Mbalu inabwera kubulukira kuna MBUYA, kudima kubulukira kuthando yatchetcha; mphuno zache za madzi nkhabe dzabulusa madzi tayu, pontho micherache inamala uma kakata. Mfumache yonsene inamala pokoserwa kubulukira m'nyumbache mumbaikoyiwa iye mule.

¹⁶Anthu a ku Samaria, pyakuipa pyawo pyathema kugwera pamsolo pawo, thangwi iwo apandukira Mulungu wawo. Iwo anafa pankhondo; anawo anamenyeswa pansi, akazawo amimba anatumbulwa.”