Read cisena HOSEA 14 Bible Online

HOSEA 14 - cisena bible

HOSEA 14

¹Bwerera, Israele, kuna MBUYA Mulungu wako. Pyakudawa pyako ndiye pyakubwezera m'nduli!

²Chita kumdembetera, mbubwerere kuna MBUYA. Longa kuna iye kuti, “Tilekerereni pyakudawa pyathu pyonsene mbamutitambire na kukoma kwanu mtima, towera tikukuzeni na pakanwa pathu.

³Anthu a ku Asiria nkhabe kutipulumusa tayu; ife nkhabe dzapakira akavalo ankhondo tayu. Ife nkhabe dzalongave pontho tayu kuti, ‘Milungu yathu,’ kuna pinthu pyasasanya manjathu, thangwi imwe mumbava nyambalo na ana masiye.”

⁴MBUYA akulonga kuti, “Ine ndinaabulusira kukhonda khulupirika kwawo, mbandiafuna pikulu pene, thangwi ukali wanga wabuluka pana iwo.

⁵Kuna Aisraele ine ndinakhala ninga bume; iwombo anachita maluwa ninga maluwa a m'madzi. Ninga mikungudza ya ku Lebanoni, iwo anaikha mitsitsi yawo pansi pyakwanga.

⁶Iwo anakhala na mphukira; kubalika kwawo kunakhala ninga muti waolivi, mgwadi-gwadi wawo ninga mikungudza ya ku Lebanoni.

⁷Anthu anakhala pontho m'mithunzi mwanga; iwo anakavuka ninga mapira. Iwo anachita maluwa ninga mfesa, pontho kuveka kwawo kunakhala ninga vinyu wa ku Lebanoni.

⁸Iwe Eferemu, taya kutali mifanikizo. Ine ndinakutawira mbandikuyang'anira mwadidi. Ine ndakhala ninga muti uwisi wapaina; mtsanzayiso wako umbabulukira kuna ine pano.”

⁹Nyanzeru mbani? Iye anati adzindikire pinthu ipi. Mbani ana udziwisi? Iye anati avesere pinthu penepi. Njira za MBUYA nsakulungama; anyakulungama ambazitewera, mbwenye anyakupandukira ambagwegwedukamo.