Read cisena HOSEA 2 Bible Online

HOSEA 2 - cisena bible

HOSEA 2

¹“Natenepo Aisraele anzako achemere, ‘Anthu a Mulungu,’ pontho anyamaingako achemere, ‘Anyapamtima a MBUYA.’

²“Mlongereni manu, manu msumululeni, thangwi iye si mankhadziangave tayu, pontho ine si ine mamunacheve tayu. Mpangeni aleke makhaliro ache auputa, kukhonda khulupirika kwacheko mbakuleke.

³Gopesera ndinamdulisa nguwo zache mbandimsiya chitakwa-takwa ninga nsiku idabuluka iye m'mimba mwa mache; ndinamchitisa kukhala ninga thando yatchetcha, kumsandusa mataka amunyu, tenepo anafa na nyota.

⁴Anache ine nkhabe dzaaonesave kuafuna kwanga tayu, thangwi iwo mbana puta.[3]

⁵Mawo nkhabe khulupirika tayu mbaakwatira mimba ya patsanga. Iye adalonga mbati, ‘Ine ndinati ndiende kuna pibwenji pyanga, ale ambandipasa phoso na madzi ene, nguwo zaubweya na nguwo zakuchena, mafuta na pyakumwa pene.’

⁶“Natenepo ndinati nditchinge njirache na matsamvu aminga; ndinati ndimfungire mumpanda, towera achimwane kubulukamo.

⁷“Iye anati athamangire pibwenji pyache mbakhonda kuaphata; iye anaasaka-saka, kwache nkhabe kuagumana tayu. Penepo iye analonga kuti, ‘Ndinabwerera pyanga kuna mankhadzianga ninga pakutoma pale, thangwi ndzidzi wenewo ndikhali mbwenye, kupiringana muna ine leromu.’

⁸“Iye hadatawire tayu kuti akhali ine pano, ule adampasa mapira, mafuta na vinyu achinchino, ule adamfumisa na siliva pontho golidi, pinaphatisa iye basa kupembedza napyo milungu Baala pile.

⁹Natenepo pandzidzi wakuvuna, ndinampokosera mapiranga na vinyu wachinchino. Ndinampokosera ubweya wabira na nguwo zakuchena, pikhadampasa ine kuti ampsampsike napyo pezi pache pile.

¹⁰Ndinamdulisa nguwo pamaso pa pibwenji pyache, tenepo nkhabe munthu anafuna kumsomphola m'manga mwanga tayu.

¹¹Maphwando ache onsene ndinati ndiamalise: maphwando a chaka na chaka, Maphwando akusekera Kubalwa kwa Mwezi, pontho Nsiku Yakupuma, maphwando ache onsene akupambulika ale.

¹²Mfesa zache zonsene ndinamala kuzipwayula-pwayula, kuna miti yache yamakuyu ndinachita chibodzi-bodzi, pile pikhalonga iye kuti mphyakupagalwi pyache kubulukira kuna pibwenji pyache; ndinati ndipichitisa kuphopha ninga msitu, pontho nyama zam'tsanga zinapivunga.

¹³Ndinamtchunyusa thangwi ya kufukiza pyakununkhira kudachita iye kuna milungu Baala; iye adathemesera manungo ache na mphete, pontho na pyakuthemesera pinango mbaenda na kuthamangira pibwenji pyache, kwache ine andiduwalira. Ndalonga ndine MBUYA.

¹⁴“Natenepo ndinati ndimnyengerere; ine ndinati ndiende naye kuthando yatchetcha; kweneko ndinati ndikalonge naye mafala akuonesa kumfuna kwanga.

¹⁵Kweneko ndinati ndimbwezere mindache yamfesa, mbandisandusa Phedi ya Nyatwa kukhala Msuwo wa Chidikhiro. Kweneko iye anaimba nyimbo ninga nsiku ya utsikanache, ninga nsiku idabuluka iye m'dziko ya Iguputo.

¹⁶Ine MBUYA ndikulonga kuti pansiku yeneyo iwe unandichemera, ‘Mankhadzianga,’ iwe nkhabe kundichemerave, ‘Mbuyanga’ tayu.[4]

¹⁷Dzina ya milungu Baala m'kanwa mwawo, ndinati ndiibulusiletu; nkhabeve pontho na kuithula kwene tayu.

¹⁸“Pansiku yeneyo ndinati ndichite nawo chiverano, na nyama zam'tsanga, na mbalame, pontho na pyakukambadza pyonsene. Mauta na matalasada pontho nkhondo pinamaliratu ngwindi m'dzikomo, towera pyonsene pikhale pamtendere pontho pakupata.

¹⁹Israele, ndinakuchitisa kukhala mankhadzianga kwenda na kwenda; ine ndinakhala wakuona mtima pontho wakukhulupirika, wakukufuna kokhonda mala, pontho wakuva nyambalo.

²⁰Ine ndinakuchitisa kukhala mankhadzianga, mbindikhala wakukhulupirika, tenepo iwe unatawira kuti ndine MBUYA.”

²¹Ine, MBUYA ndikulonga kuti, “Pansiku yeneyo ndinati ndive kupempha kwanu, ine ndinalonga kuna thambo, tenepo thambo inavumbisa mvula padziko yapansi;

²²matakambo anabalisa mapira, mfesa na miti yaolivi, tenepo ipyo pinapereka phoso kuna Yezereele.[5]

²³Israele, ndinamkhazikisa m'dzikomo. Kuna ule ndzidzi unango adachemera ine kuti, ‘Nyakukhonda-funwa,’ chinchino ndinati ndionese kumfuna kwanga. Kuna anthu ale ambachemera ine kuti, ‘Si-anthu-anga-tayu,’ ndinati ndiachemere, ‘Imwe ndimwe anthu anga,’ tenepo iwo analonga kuti, ‘Imwe ndimwe Mulungu wathu.’ ”