Read cisena HOSEA 4 Bible Online

HOSEA 4 - cisena bible

HOSEA 4

¹Veserani mafala a MBUYA, imwe Aisraele, thangwi imwe muna mseru na MBUYA, imwe ale mumbakhala m'dziko yeneyi. M'dzikomu nkhabemo kukhulupirika, pontho na kufunana kwene kwamalamo, kutsalakana pya Mulungu nkhabemo tayu.

²Kwasalamo nkhutembererana na kunama, kuchita upandu, kuba na uputa ene basi; kudawa kwawo nkhabe nako madire tayu, pontho ambachuchisa chiropa mwakuti upandu kuchitambo kundondolozana.

³Na thangwi ya penepi dziko ikusintili, pontho pinthu pyonsene pyakukhala mwenemo pikumala kufamo; nyama zam'tsanga na mbalame, pontho nsomba za m'bara pikumala kufa.

⁴MBUYA akulonga kuti, “Kwache mbapaleke khala munthu kuasumulula, anthu mbaleke sumirana okhokha pyawo, thangwi anthu ako akhala ninga ambasumira nyansembe ale.

⁵Mosiku na masikati kwanu nkhugwegweduka; maprofetimbo ambagwegweduka namwe kubodzi. Natenepo manuyo, Israele, ndinati ndimvunge.

⁶Anthu anga avungwa thangwi yakusowa udziwisi; podi imwe mwakhonda udziwisi, inembo sinakuyesanive anyansembe anga tayu; podi imwe mwakhonda mwambo wa Mulungu wanu, inembo ndinapasa nkhodolo ananu.

⁷“Anyansembe kuinjipa nkhuinjipa kwache, ndiye anyanyiratu kuchita pyakudawika; iwo akuchinjisa demelero yawo na pinthu pyakuchitisa manyadzo.

⁸Phoso yawo mphyakudawa pya anthu anga; muliwo wawo mbukhala pyakuipa pya anthu anga.

⁹Tenepo ipyo pinakhala tenepa: Ninga anthu, chibodzi-bodzi anyansembe, ine ndinati nditchunyuse onsenewo, thangwi ya makhaliro awo, mbandiabwezera thangwi ya mabasawo akuipa.

¹⁰“Kudya anadya, kwache nkhabe khuta tayu; iwo anachita pyauputa, kwache nkhabe injipa tayu, thangwi iwo akhonda MBUYA, mbapereka manungo awo

¹¹kuchita uputa, pontho kumwa vinyu wakale na wachinchino, ule ambambwambwanisa nzeru za

¹²anthu anga. Iwo ambavunza nzeru kuna dzimunthu, mbatawirwa na chinthu chakusema. Chizimu cha uputa chaaendesa m'tsanga; iwo nkhabe khulupirika tayu kuna Mulungu wawo.

¹³Iwo ambapereka nsembe pamapiri, mbafukiza pyakununkhira m'pitunda pansi pa miti yamthundu, mtondo na mfuma, pale pambakhala mthunzi wanonono. “Natenepo ananu achikazi asandukambo maputa, pontho akwenyanu asanduka akuzuda.

¹⁴Ine sinatchunyusa ananu achikazi, iwo angasanduka maputa tayu, penu akwenyanu iwo angachita pyakuzuda tayu, thangwi amuna makawo ambakhala berengu-berengu na maputa, pontho ambapereka nsembe na maputa[7] m'nyumba zawo zakupembedzeramo, anthu akusowa nzeru anati avungike.

¹⁵“Israele, podi kwene kuti iwe ukuchita pyauputa, Yuda mbaleke gumanwa na mseru wenewu. Lekani kwenda ku Giligala; lekani kukhwiza ku Beti-Aveni.[8] Pontho lekani dumbira kuti, ‘Ninga MBUYA wamoyo!’

¹⁶Aisraele mtima uli nganganga kuwanga, ninga kuuma mtima kwa ng'ombe imuna. Ayi MBUYA nkhukwanisa basi kuapasa pyakudya ninga mabira mumpovu wadidi?

¹⁷Eferemu ali phatane m'khosi na mifanikizo; mlekeni pyache!

¹⁸Iwo angamala khuta pyakuledzeresa, iwo ambasusuka kuchita pyauputa. Iwo ambafuna pyakwanga kuchita pinthu pyakululupisa manungo kupiringana pinthu pyakupasa chilemedzo.

¹⁹Chivumbulu chinati chiatswaire; iwo anachitiswa manyadzo thangwi ya nsembe[9] imbapereka iwo kuna mifanikizo.”