Read cisena HOSEA 5 Bible Online

HOSEA 5 - cisena bible

HOSEA 5

¹“Veserani kuno, imwe anyansembe. Ikhani makutu kuno, imwe Aisraele! Nyumba yachifumu, veserani kuno! Mseru wenewu ngwanu imwepo: Iwe wasanduka msampha mu Mizipa, ninga malitchera ale, ali ndataa mu Tabori.

²Mphandu ndiye zapita na kuchita pyakudawa; ine ndinati ndiatchunyuse onsenewo.

³Eferemu ndimbamdziwa mwadidi mwene; kuna ine Israele ali ngangambanda pakwecha. Eferemu, iwe wasanduka puta; Israelembo asanduka okhonda chena pamaso pa MBUYA.”

⁴Mabasawo nkhabe kuatawirisa kubwerera kuna Mulungu wawo tayu. Chizimu cha uputa chaagudumira; iwo nkhabe tsalakana pya MBUYA tayu.

⁵Kutumbama kwa Israele ngumboni wakupokanyisana naye; Aisraele, podi na Eferemu ene akugwegweduka na pyakudawa pyawo; na Yuda enembo akugwegweduka nawo kubodzi.

⁶Iwo ambapereka nsembe za mabira na ng'ombe kusaka-saka MBUYA, mbwenye iwo nkhabe kumgumana tayu; iye aabulukira pamaso pawo.

⁷Iwo nkhabe khulupirika tayu kuna MBUYA; iwo ambabala ana a patsanga. Chinchino chipembedzo cha milungu inango chinati chivunge iwo na mindawo ene.

⁸Lizani ngoma mu Gibea, nkhwiyo mbiimbwe mu Rama. Nyamgogogo wa nkhondo mbuveke mu Beti-Aveni;[10] tsogolera ndiwepo Benjemani.

⁹Eferemu anasala madembe pansiku inafuna iye dzatchunyuswa. Pakati pa madzinza a Aisraele, ine ndikulalika chadi-chadi chache cha penepi.

¹⁰MBUYA akulonga kuti, “Akadamu a Yuda akhala ninga anyakubulusa pidzindikiro pya madire a miyala. Ninga madzi makulu, ine ndinabomera ukali wanga pana iwo.

¹¹Eferemu akuponderezwa, kuva kupha na kutchunyuswa, thangwi ya kukakamira mifanikizo.

¹²Kuna Eferemu, ine ndakhala ninga uchenje, ninga chakuvunguma kuna anthu a ku Yuda.

¹³“Pidaona Eferemu utendache, pontho Yuda maso phaa pironda pyache, penepo Eferemu adazungunukira kuna Asiria, mbapempha chiphedzo kuna mfumu wamkulu. Kwache iye nkhabe kwanisa kukuwangisa tayu, pontho nkhabe kwanisa kuchiza pironda pyako tayu.

¹⁴Thangwi kuna Eferemu, ine ndinakhala ninga nkhalamu, ninga nkhalamu ikulu kuna Yuda. Ndinaakhwadzula-khwadzula mbandienda pyanga; ine ndinaathukula nawo bzaa, mbapasowa na dombo ene.

¹⁵Kubuluka penepo ndinabwerera kumbuto kwanga, kufikirana iwo atawire kudawa kwawo. Tenepo iwo anandisaka-saka; na kutsukwala kwawo kweneko, anandisaka-saka na mtimawo onsene.”