Read cisena HOSEA 6 Bible Online

HOSEA 6 - cisena bible

HOSEA 6

¹Anthu akulonga mbati, “Ngatendeni, tibwerere kuna MBUYA. Podi kwene kuti iye adatikhwadzula-khwadzula, iye anati atiwangise basi. Iye anamanga basi pironda pyathu, podi kwene kuti iye amala kutikuwaza.

²Sindzidzi nsiku ziwiri nkhugwanda, iye anatisisimusa pontho; pansiku yachitatu yache, anatibwezera pontho mphamvu zathu, towera tikwanise kukhalambo pamaso pache.

³Tendeni MBUYA timdziwe; mbatithimizeni kumdziwa. Ninga mumbachitira dzuwa kubuluka, iye anati aonekere, iye anati abwere kuna ife ninga mvula, ninga phumphuli kutotesa mataka padziko yapansi.”

⁴Mbwenye MBUYA akulonga kuti, “Ayi iwe Eferemu, ndinachita nawe tani? Nditani nawe, iwe Yuda? Kundifuna kwako kwakhala ninga nkhungu kumachibese, ninga bume ya machibese imbakungunuka ile.

⁵Natenepo ndidakugwanda m'mapindi-mapindi na maprofeti anga. Ine ndidakupha na mafala akubulukira m'kanwa mwanga; kutonga kwanga mseru kukuchetuma pana iwe ninga njazi.

⁶Thangwi chimbafuna ine nkhundifuna kokhonda mala, nee nsembe tayu, pontho kudziwa kuti ndine Mulungu kusiyana na kupereka nsembe zakupyerera.

⁷Ningambo Adamu, iwo aswa chiverano, kweneko iwo akhali okhonda khulupirika kuna ine.

⁸Gileadi ndi mzinda wa anyakudawika, pontho wa anyachirope.

⁹Ninga mumbachitira mapanga kubisalira anthu, ndi sasawambo na magulu a anyansembe; iwo ambapha anthu panjira yakwendera ku Shekemu, iwo ambachita pyaupandu pyakugoswa.

¹⁰Mu Israele ndaonamo chinthu chakugumisa manungo. Kweneko Eferemu akuchita pyauputa, pontho Israele asanduka okhonda chena pamaso pa MBUYA.

¹¹“Kulongambo pya iwe, Yuda, ndzidzi wako wakutchunyuswa ukudza.”