Read cisena HOSEA 7 Bible Online

HOSEA 7 - cisena bible

HOSEA 7

¹“Ndzidzi unafuna ine kuchitisa pinthu pya anthu anga kufamba pontho mwadidi, pontho unafuna ine kuwangisa Israele, na ndzidzi onthowo kudawika kwa Eferemu kunaoniwa, pontho upandu onsene wa Samaria unakhala nyimwa pakwecha. Kunama nkhudya kwawo, mbava zimbaswa nyumba, mapanga basawo nkhukhalira anthu m'misewu;

²kwache iwo nkhabe dzindikira tayu kuti ine ndimbaona mabasawo onsene akudawika ale. Pyakudawika pyawo pyamala kuabiza; ipyo pili chena pamaso panga.”

³MBUYA akulonga kuti, “Na kudawika kwawoko, iwo ambachitisa mfumu kukomerwa, pontho atongi na kunama kwawo.

⁴Onsene ndi maputa, akugaka ninga uvuni, ule nyakuphika mikate nkhabe funa kuusesera tayu, kubulukira pa kumunya mpambo mpakana kufufuma.

⁵Pansiku ya phwando ya mfumu wathu, atongi adakhuta vinyu, pontho iye ambaphatana dakamawu na anyakusingirira.

⁶Mitimawo yakhala ninga uvuni; iwo ambafedza chifupi[11] na iye mwaunthawatawa. Shungu yawo imbapuchira mosiku onsene; mbiyerima na machibese ninga malulume a moto.

⁷“Onsene ali nganda-nganda ninga uvuni; iwo ambapha akadamu awo. Mafumu awo onsene amala phiwa, nkhabe na mbodzi ene ambaikha maso ache pana ine tayu.”

⁸MBUYA akulonga kuti, “Eferemu avungazikana na madzinza anango; Eferemu akhala ninga mkate wakuphaphathika, wakukhonda sanduzwa-sanduzwa.

⁹Alendo amala kumuyamwa mphamvu zache, kwache iye nkhabe kupidzindikira tayu. Tsisi yache yamala dzala imvi, kwache iye nkhabe na kupiona kwene tayu.

¹⁰Kutumbama kwa Israele ngumboni wakupokanyisana naye, kwache podi kwene kuti iye akuona pyonsenepi, iye nkhabe funa pyakubwerera kuna MBUYA Mulungu wache, penu kumsaka-saka tayu.

¹¹“Eferemu akhala ninga nkhangaiwa wakukhonda nensa kunyengezwa pontho wakusowa nzeru, lero kuyang'ana kuna Iguputo, mangwana kuna Asiria.

¹²Ndzidzi unaenda iwo, ndinaateyera msampha; ndinaamkweya ninga mbalame. Ndinaatchunyusa thangwi ya pyakuipa pyawo.

¹³“Dzedze kuna iwo, thangwi iwo abauka kubuluka kuna ine! Kuvungika mbakuagwere, thangwi iwo andipandukira! Ine ndimbapifuna pyakwanga kuti ndiaombole, kwache iwo ambandilongera pyakunama.

¹⁴Iwo nkhabe lira kuna ine kubulukira pansi pa mtima tayu, mbwenye kukalala kwene pamatalimba pawo. Iwo ambagumanyikana kufuna mapira na vinyu wachinchino, kwache iwo abauka kubuluka kuna ine.

¹⁵Podi kwene kuti ndidaafunzisa ndine, pontho kuapasa mphamvu ndine, kwache iwo ambasasanya basi pyakundichitira pyakuipa.

¹⁶Iwo nkhabe zungunukira kuna Nyakudzulu-dzulu tayu; iwo akhala ninga uta wakuthimfuka. Akadamu awo anafa pankhondo, thangwi ya mafalawo akushola. Na thangwi yeneyi iwo analulupiswa m'dziko ya Iguputo.”