Read cisena HOSEA 8 Bible Online

HOSEA 8 - cisena bible

HOSEA 8

¹MBUYA akulonga kuti, “Fekani ngoma pamulomo panu! Ninga malezi, anyamalwa awumbikira Nyumba ya MBUYA, thangwi anthu aswa chiverano changa, pontho apandukira mwambo wanga.

²Israele akulira kuna ine mbati, ‘Ife takutawirani kuti ndimwe Mulungu wathu!’

³Kwache Israele akhonda chinthu chadidi; anyamalwa anati amthamangise.

⁴Iwo ambapitisa pyawo mafumu okhonda kundipempha; iwo ambasankhula atongi, okhonda ine kuatsikimizira. Na siliva pontho golidi wawo, iwo ambapisasanyira mifanikizo, pinthu pyakuti pimbavunga enechiroache onthowo.

⁵Taya mfanikizo wako wa mwanamphulu, iwe Samaria! Kuzhangali kwanga kukugaka pana iwepo. Iwo anakhala okhonda chena kufikirana lini?

⁶Icho ntchakubulukira ku Israele! Mwanamphuluyu, mfanikizo wakusasanywa na manja a nyaluso; icho si Mulungu tayu. Icho chinati chigwandwe m'mapindi-mapindi, mfanikizo wa ku Samaria ule!

⁷“Israele ambabzala mphepo mbavuna chivumbulu. Mphesi nkhabe ngala tayu; izo nkhabe dzabulusa ufa tayu. Podi kwene kuti udzabuluse mapira, anyakudza pyawo ndiye anadya mapirawo.

⁸Israele amala khudyulwa; chinchino iye ali pakati pa madzinza ninga chinthu chakusowa basa.

⁹Thangwi iwo aenda mpakana ku Asiria ninga bulu wam'tsanga wakwenda pyache mbatsalakatika. Eferemu apigulisa yekha ene kuna pibwenji pyache.

¹⁰Podi kwene kuti apigulisa okha ene pakati pa madzinza, chinchino ndinati ndiagumanyise pabodzi pene. Iwo anati asanyike pikulu pene, thangwi ya nyatwa zakubulukira kuna mfumu wa Asiria.

¹¹“Podi kwene kuti Eferemu adapimangira maguwa azinji ene akupereka nsembe zakubulusira pyakudawa, maguwa enewa asanduka akuchitira pyakudawa.

¹²Ine ndidaalembera pinthu pizinji pyakulonga pya matongero anga, kwache iwo adapiyesa ninga pinthu pinango pyachilendo.

¹³Iwo ambapereka nsembe zanyama kuna ine, tenepo ambadya pyawo nyamazo, kwache ine, MBUYA, nkhabe komerwa nawo tayu. Chinchino ndaikha konta pyakudawa pyawo pyonsene, mbandiatchunyusa thangwi ya pyakudawa pyawo. Iwo anabwerera ku Iguputo.

¹⁴Israele aduwalira Nyakumsasanya, mbamanga pyache nyumba zachifumu; Yuda amanga mizinda mizinji yakutchingwa na mpanda; kwache ndinati ndigwise moto pana mizindawo, ule unafuna vunga nyumba na mipandawo ene.”