Read cisena HOSEA 9 Bible Online

HOSEA 9 - cisena bible

HOSEA 9

¹Leka komerwa, iwe Israele; leka sekera ninga mumbachitira madzinza anangowa, thangwi iwe wakhonda khulupirika kuna Mulungu wako; iwe umbakomerwa na kupagalwi thangwi ya uputako pambuwa ponsene pene panaponda iwepo.

²Mbuwa na madzenje akutchitchithira vinyu nkhabe kwanisa kukhutisa anthu tayu; vinyu wachinchino nkhabe dzakhalapo tayu.

³Iwo nkhabe thimiza kukhala m'dziko ya MBUYA tayu. Eferemu anabwerera ku Iguputo mbadya pyakudya pyokhonda chena[12] mu Asiria.

⁴Iwo nkhabe dzapereka nsembe ya vinyu kuna MBUYA, penu nsembe zawozo kumchitisa kukomerwa tayu. Kuna iwo nsembe ninga zenezi zinakhala ninga mikate ya anyakusintili, onsene anyakuidya anasanduka okhonda chena. Pyakudya penepi pinakhala pyawo pene basi, ipyo nkhabe kupitiswa m'Nyumba ya MBUYA tayu.

⁵Ayi munachita tani pansiku ya maphwando anu akupambulika, pansiku ya phwando ya MBUYA?

⁶Podi kwene kuti iwo ayesere pyawo tani kuthawa nyatwa, Iguputo anati aagumanyise, pontho Memfisi anati afikhire. Mfumawo ya siliva inaphimbirwa na matenthere, pontho minga inaphimbira makumbi awo.

⁷Nsiku zikudza zinafuna iwo kutchunyuswa; nsiku zakuona nyatwa zili pamsuwo; Israele mbadziwe penepi. Na thangwi yakuti pyakudawa pyako mphizinji pyakwanga, pontho wadzala na chizondi, kuna iwe mprofeti ambayeswa pupwe, pontho munthu waudziwisi ambayeswa nyansala,

⁸Mulungu andiikha kukhala mprofeti kucheuza anthu ache, Israele, kwache misampha ikundidikhira m'njira zonsene, pontho anyakundizonda ali m'Nyumba ya Mulungu.

⁹Iwo amala bira m'mathaphwinya a pyakuipa ninga mukhali ipyo na amuna a mu Gibea.[13] Mulungu nkhabe dzaduwalira kudawika kwachita iwo, mbaatchunyusa thangwi ya pyakudawa pyawo.

¹⁰MBUYA akulonga kuti, “Ndzidzi udagumana ine Israele pikhali ninga ndagumana mfesa m'thando yatchetcha. Pidaona ine babako pikhali ninga kuona nsapo zakuchimbiza kufira m'muti wamakuyu. Mbwenye pidadza iwo ku Baala-Peori, iwo adapipambulira okha ene kuna mfanikizo wakuchitisa manyadzo ule mbasanduka akunyansa ninga mfanikizo ontho umbafuna iwo ule.

¹¹Demelero ya Eferemu inambuluka ninga mbalame, nee kubala, nee mimba penu kukwata mimba tayu.

¹²Podi kwene kuti iwo akuze pyawo ana tani, ine ndinaapuluza onsenewo mbandikhonda dzasiya na moyo na mbodzi ene. Anyadzedze ndiwo ndingaapasa nkhodolo!”

¹³Eferemu ine ndamuona ninga Turo, wakubzalwa m'mataka adidi.[14] Kwache Eferemu anapereka anache m'manja mwa mphandu.

¹⁴MBUYA apaseni, ninji chinafuna imwe kuapasa? Apaseni nthumbo zakupolozwa, pontho mabele ale nkhabe buluka mkaka tayu.

¹⁵MBUYA akulonga kuti, “Na thangwi ya pyakudawa pyawo pyonsene pidachita iwo mu Giligala, ine ndidanyansirwa nawo kweneko. Na thangwi ya makhaliro awo akuipa ine ndinaathamangisa m'Nyumba mwanga. Ine nkhabe kuafunave tayu; akadamu awo onsene ngakupandukira.

¹⁶Eferemu amala unyala, mitsitsi yache yamala dudumuka, tenepo iye nkhabe bala nsapo tayu. Podi kwene kuti iwo abale ana, ine ndinapha ana apamtima pawo makawo.”

¹⁷Mulungu wanga anati aakhonde, thangwi iwo hadamvere tayu; iwo anasanduka manzenza pakati pa madzinza.