Read cisena YOWELE 2 Bible Online

YOWELE 2 - cisena bible

YOWELE 2

¹Lizani ngoma mu Zioni; lizani nkhwiyo paphiri yanga yakuchena.[1] Onsene ale ambakhala m'dzikomo mbatetemere na mantha, thangwi nsiku ya MBUYA ikudza. Iyo yafika kale chifupi,

²nsiku ya mdima pontho kutsukwala, nsiku ya makole pontho mdima wa mbani weneyo. Ninga makole kumwinikira paphiri yonsene, gulu ikulu ya anyankhondo amphamvu inabwera, ile chipo hidzati khalapo tayu, penu nkhabe khalapove tayu mifendu yonsene.

³Patsogolo pawo moto ukuvunga pinthu, m'nduli mwawo moto ukuyerima. Patsogolo pawo dziko yakhala ninga munda wa Edeni, m'nduli mwawo ndi thando yatchetcha, nkhabe chinthu na chibodzi chene chasala na moyo tayu.

⁴Iwo ambaoneka ninga akavalo; ambathamanga ninga akavalo ankhondo.

⁵Iwo ambanumpha pansonga ya mapiri mbathamanga ninga pingolo pyankhondo. Iwo akuthothomuka ninga maudzu akupiswa moto, pontho ninga gulu ya anyankhondo amphamvu iwo andandalika kumenya nkhondo.

⁶Madzinza angati kwene nawo soo, ambatetemera na mantha; nkhope ya munthu onsene imbabuluka kaluma.

⁷Iwo ambasosa ninga anyankhondo amphamvu; ambakwira mafufu ninga anyankhondo. Onsene ambafamba pamzera ubodzi ene mbakhonda bauka.

⁸Iwo nkhabe gwinyana-gwinyana tayu. Munthu onsene maso ali patsogolo uku akufamba. Iwo akugwanda na pakati pa pida pyankhondo mbakhonda kuimiswa.

⁹Iwo ambanumphira mumzindamo; iwo ambathamanga na padzulu pa mpanda. Iwo ambakwira mpanda mbapita m'nyumba; ninga mbava, iwo ambapita m'nyumbazo na pa mazhanera.

¹⁰Dziko imbatekenyeka pamaso pawo, thambo imbatetemera na mantha. Dzuwa na mwezi pyamala chita chidima, pontho nyenyezi nkhabeve onesa cheza tayu.

¹¹MBUYA akudima ninga chiphaliwali patsogolo pa anyankhondo ache; anyankhondo ache nkhabe lengeseka tayu, pontho anyamphamvu ngale ambavera matongero ache. Nsiku ya MBUYA njikulu pyakwanga; iyo njakupasa mantha. Mbani anakwanisa kupirira nayo?

¹²MBUYA akulonga kuti, “Podi chinchino ene pano bwererani kuna ine na mtimanu onsene, na kupimana kudya, pontho kulira na kusintili.”

¹³Ng'ambani mtimanu, nee pyakuvala pyanu tayu, bwererani kuna MBUYA Mulungu wanu, thangwi iye ngwakukoma mtima, pontho wakuva nyambalo; iye nkhabe chipsu tayu, pontho kuafuna kwache anthu nkhokhonda mala. Iye ndzidzi onsene ngwakusasanyika kumbombowesa ukali wache, nee kugwisa nyatwa tayu.

¹⁴Mbani anapidziwa? Mwinango anambombowesa ukali wache mbakuverani nsisi, pontho mbakutsanzayisani na phoso. Tenepo munakhala na mapira na pyakumwa kuti piperekwe nsembe kuna MBUYA Mulungu wanu.

¹⁵Lizani ngoma mu Zioni, khazikisani ndzidzi wakupimana kudya, chemeresa mgumano wakupambulika.

¹⁶Gumanyisani anthu, uchitiseni kukhala mgumano wakupambulika. Gumanyisani pabodzi pene akulu-akulu, ana ang'ono agumanyiseni, ali kubele kwa amawo kuyamwa ale. Nyakukazhali mbasiye subi yache pontho nyakusembwa mbabuluke m'nyumba mwache.

¹⁷Anyansembe, ale ambatumikira m'nyumba ya MBUYA, mbalire pakati pa guwa yansembe na msuwo wa Nyumba ya Mulungu. Iwo mbalonge kuti, “Verani nsisi anthu anu MBUYA. Lekani chitisa anthu anu kukhala chinthu chakusekesa chakusedegulwa pakati pa madzinza anango. Thangwi yache ninji kuti iwo alonge pakati pa madzinza anango kuti, ‘Ali kupi Mulungu wawo?’ ”

¹⁸Penepo MBUYA adachita ntchanje na dziko yache, mbavera nsisi anthu ache.

¹⁹MBUYA adatawira mbati, “Ine ndinakutumizirani mapira, vinyu wachinchino na mafuta, pyakukwanisa kukhutisa mimba zanu; ine nkhabeve kukuchitisani kukhala chakusekesa pakati pa madzinza anango tayu.

²⁰“Ine ndinati ndithamangise kutali anyankhondo akumpoto, mbandiagwinyira kudziko yakuuma pontho yakusowa pyakumera, akutsogolo ndinaathamangisira ku Nyanza Yakufa, pontho akunduli ndinaathamangisira ku Bara ya Mediterania. Penepo mitembo yawo inanunkha pyakwanga; khwemache mbikalangira. “Ndimomwene MBUYA aphata basa pikulu.

²¹Leka gopa iwe dziko; komerwa pontho sekera. Ndimomwene MBUYA aphata basa pikulu.

²²Lekani chita mantha imwe nyama zam'tsanga, thangwi mbuto zakuuma zasanduka za mpovu. Miti ikubala nsapo zache; makuyu na mfesa zabulusa nsapo zizinji.

²³“Komerwani imwe anthu a mu Zioni, sekerani thangwi ya pinthu pyachita MBUYA Mulungu wanu. Iye ambakuvumbisirani phumphuli pandzidzi wache.[2] Iye ambakutumizirani mafazi azinji ene, mvula ya chaka na ya mainja ene ninga pakutoma pale.

²⁴Mbuwa zinadzala na mapira; mabuyawu anatayikira na vinyu wachinchino pontho na mafuta aolivi.

²⁵“Ine ndinati ndikubwezereni pyonsene thangwi ya pyaka pidadya nyadzombe, mabobo, mphombo na nthete, anyankhondo anga amphamvu adatumiza ine pakati panu ale.

²⁶Imwe munakhala na phoso izinji, mpakana kukhutisa mimba zanu, penepo imwe munakuza dzina ya MBUYA Mulungu wanu, ule adachita pyakudodomesa pakati panu; anthu anga nkhabeve dzachita manyadzo tayu.

²⁷Penepo munapidziwa kuti ine ndili mu Israele, kuti ine ndine MBUYA Mulungu wanu pontho kuti nkhabeve unango tayu; anthu anga nkhabeve dzachita manyadzo tayu.

²⁸“Kubuluka penepo ndinakhuthulira mzimu wanga pana anthu onsene: ananu achimuna na achikazi analonga mphangwa zauprofeti, nkhalamba zinalota ndoto, aphalembo anaona masomphenya.

²⁹Podi na anyabasanga ene, amuna na akazi ene, ndinati ndiakhuthulire mzimu wanga nsiku zenezo.

³⁰Ine ndinati ndionese pyakudodomesa kudzulu, pontho padziko yapansi, panakhala chiropa, moto na utsi ukulu.

³¹Dzuwa inasanduka mdima, pontho mwezi unasanduka chiropa, mbidzati fika nsiku ikulu, pontho yakugoswa ya MBUYA.

³²Tenepo onsene ale ambachemera dzina ya MBUYA anapulumuswa; thangwi paphiri ya Zioni na mu Yerusalemu panakhala kupulumuswa ninga montho mwapilongera MBUYA, pakati pa anyakusalira na moyo, ale adachemerwa na MBUYA.”