Read cisena YOWELE 3 Bible Online

YOWELE 3 - cisena bible

YOWELE 3

¹“Nsiku zenezo pontho pandzidzi wenewo ndingachitisa pinthu pya Yuda na Yerusalemu kufamba pontho mwadidi,

²ndinagumanyisa madzinza onsenene mbandiadzesa ku Phedi ya Yehosafati. Kweneko ine ndinaatonga mseru, thangwi ya pidachita iwo kuna anthu anga Israele; thangwi iwo adabalalisa anthu anga pakati pa madzinza anango, mbagawana pyawo dziko yanga.

³Iwo adachitira ntsango anthu anga mbachinjisa aphale na maputa; iwo adagulisa atsikana na vinyu, towera iwo amwe.

⁴“Ayi pinayesera imwe kuchita kuna ine ninji, imwe anthu a ku Turo na Sidoni, pontho na anthu onsene a nthemba za Afilisti? Ayi imwe munafuna pyakubwezera thangwi ya pinthu pyachita ine? Ngakhala imwe mukundibwezera, ndinati ndigwesere pamsolo panu, mwakuchimbiza, pinthu pyandichita imwepi.

⁵Thangwi imwe mudakwata siliva na golidi wanga mbamukwata pontho mfumanga yadidiletu kwenda nayo kunyumba zakupembedzeramo milungu yanu.

⁶Imwe mudagulisa anthu anga a ku Yuda na Yerusalemu kuna Agriki, towera muaendese kutali na dziko yawo.

⁷“Yang'anani, ine ndinati ndiabuluse kumbuto zidaagulisa imwe zile, pontho ndinati ndigwesere pamsolo panu pyonsene pyachita imwe pile.

⁸Ine ndinati ndigulise ananu achimuna na achikazi ene kuna anthu a ku Yuda, iwombo mbaagulisa kuna Asabea, dzinza ya kudziko yantomi. Ndalonga ndine MBUYA.”

⁹Lalikani penepi pakati pa madzinza: Sasanyikirani pya nkhondo! Lamusani anyankhondo amphamvu! Anyakumenya nkhondo onsene mbadze chifupi pontho mbasose.

¹⁰Fulani mapazanu kukhala matalasada, pontho mipeni yakukadzira kukhala madipa. Anyakusowa mphamvu mbalonge kuti, “Ine ndawanga mphamvu!”

¹¹Chimbizani kudza, imwe madzinza onsene akubulukira kumakhundu onsene, mbamugumanyike penepo. Tumizani anyankhondo anu amphamvu, MBUYA!

¹²MBUYA akulonga kuti, “Madzinza mbalamuke kusasanyika; iwo mbadze ku Phedi ya Yehosafati, thangwi kweneko ine ndinakhala pansi mbanditonga mseru madzinza onsene akubulukira kumakhundu onsene.

¹³Kwedzani na chikwakwacho thangwi mbewu zatokota. Dzani mbamufinye mfesa thangwi dzenje yakutchitchithira vinyu yadzala, pontho maphiso akutayikira, pyakudawa pyawo mphizinji pyakwanga.”

¹⁴Chimwinji, chimwinji m'phedi ya kutonga mseru! Thangwi nsiku ya MBUYA ili chifupi m'phedi ya kutonga mseru.

¹⁵Dzuwa na mwezi pinaswipiswa, pontho nyenyezi nkhabe dzaonesa cheza tayu.

¹⁶MBUYA anabangula mu Zioni, mbadima mu Yerusalemu; dziko yapansi na kudzulu inatetemera. Kwache MBUYA anakhala pakubisala pa anthu ache, pontho mpanda wamphamvu kuna Aisraele.

¹⁷MBUYA akulonga kuti, “Penepo munapidziwa kuti ine MBUYA Mulungu wanu; ndimbakhala mu Zioni, phiri yanga yakuchena. Yerusalemu anakhala wakuchena; alendo nkhabeve dzachita naye nkhondo tayu.

¹⁸“Pansiku yeneyo mapiri anachucha vinyu wachinchino, pontho pitunda pinakuka na mkaka; mikulo yonsene ya Yuda inadzala madzi. Mphuno ya madzi inatumbuka m'Nyumba ya MBUYA, mbithirira madzi m'phedi ya Akesha.

¹⁹Mbwenye Iguputo anasanduka thando, Edomu anasanduka thando yatchetcha, thangwi ya pyaupandu pidachitwa kuna anthu a Yuda, m'dziko mwawo mule mudachuchisa iwo chiropa cha anyakukhonda dawa.

²⁰Mu Yuda munakhala anthu kwenda na kwenda, pontho mu Yerusalemu mpakana mifendu yonsene.

²¹Kuchuchisa chiropa kudachita iwo, kule kudakhonda ine kualekerera, ine ndinati ndialekerere.”[3] MBUYA ambakhala mu Zioni.