Read cisena AMOSE 3 Bible Online

AMOSE 3 - cisena bible

AMOSE 3

¹Ngavani mafala alonga MBUYA kupokanyisana na imwe anthu a ku Israele, kupokanyisana na dzinza yonsene idabulusa ine ku Iguputo ile:

²“Ndimwe ene basi asankhula ine pakati pa mabanja onsene a padziko yapansi; natenepo ine ndinati ndikutchunyuseni, thangwi ya pyakudawa pyanu pyonsene.”

³Ayi anthu awiri ambafambira mbodzi mwene mbadzati phatizana kuchita tenepo?

⁴Ayi nkhalamu imbabangula mumsitu mbidzati ona nyama? Ayi iye ambalira khunzwa kwene m'dzimba mwache mbidzati phata nyama?

⁵Ayi mbalame imbakweshwa na msampha pale msampha nkhabepo? Ayi msampha umbafumphuka okha ene mwenemo nkhabe chinthu chakuutekenya?

⁶Ngoma ingalizwa mumzinda, ayi anthu nkhabe tetemera tayu na mantha? Nyatwa zingadza mumzinda, ayi si MBUYA tayu achitisa?

⁷Ndimomwene kuti MBUYA Mulungu nkhabe chita chinthu na chibodzi chene tayu mbadzati tchulula manyerezero ache kuna anyabasache maprofeti.

⁸Nkhalamu ingabangula; mbani ambakhonda chita mantha? MBUYA Mulungu angalonga, mbani anakwanisa kukhala mulomo phoo, okhonda longa mphangwa zauprofeti?

⁹Lalika kuna mipanda yamphamvu ya Ashidodi, pontho na kuna mipanda yamphamvu ya Iguputo kuti: “Gumanyikanani pamapiri a Samaria; yang'anani chimpiningu muna iye, pontho na kuponderezwa pakati pa anthu ache.”

¹⁰MBUYA akulonga kuti, “Iwo nkhabe dziwa kuchita pyakulungama, anthu ale ambadzaza mipandawo yamphamvu na pinthu pidapokosera iwo mwaupandu pile.”

¹¹Natenepo MBUYA Mulungu akulonga tenepa: “Nyamalwa anazungulira dziko yanu iye anagwisa mpandanu wamphamvu mbapokosera pinthu pyanu.”

¹²MBUYA akulonga tenepa: “Ninga mumbachitira makabuswa kupokosera kwene miyendo miwiri, penu phindi ene ya khutu ya birache m'kanwa mwa nkhalamu, sasawambo Aisraele anapulumuswa ninga monthomo, ale ambakhala mu Samaria m'minenwa mwa matalimbawo, pontho mu Damasiko pa makadera awo.

¹³“Ngavani kuno mbamuchitire umboni kupokanyisana na pidzukulu pya Yakobo. Ndalonga ndine Mbuya, MBUYA Mulungu Wamphamvu zonsene.

¹⁴“Nsiku inafuna ine kutchunyusa Israele, thangwi ya pyakudawa pyawo, ine ndinavunga maguwa onsene a ku Betele; nyanga za guwa yansembe zinagwandwa, tenepo zinagwera pansi.

¹⁵Ine ndinagwisa nyumba zimbakhala imwe pandzidzi wa mainja, na nyumba zimbakhala imwe pandzidzi wa malimwe. Nyumba zakuthemeserwa na nyanga za nzowu zinavungwa, pontho nyumba zikulu-zikulu zakumangwa na miyalazi zinagomolwa. Ndalonga ndine MBUYA.”