Read cisena AMOSE 5 Bible Online

AMOSE 5 - cisena bible

AMOSE 5

¹Ngavani kuno imwe dzinza ya Israele, chiliro chinachita ine cha imwe:

²Mwali Israele agwa, mbakhonda lamukave! Iye adasiyiwa kwene gwamwa m'dziko mwachemo, mbapasowa munthu na mbodzi ene wakumulamusa.

³MBUYA Mulungu akulonga tenepa: “Mzinda ule umbaenda kunkhondo na anyankhondo amphamvu chikwi, unasala kwene na anyankhondo dzana basi. Luwani ile imbaenda kunkhondo na anyankhondo amphamvu dzana, anyankhondo khumi basi ndiye anafuna dzasala.”

⁴MBUYA akulonga tenepa kuna dzinza ya Israele: “Bwererani kuna ine mbamukhale na moyo.

⁵Lekani kwenda ku Betele, lekani kwenda ku Giligala, lekani manga ulendo kwenda ku Beeresheba. Thangwi Giligala anati aende kudziko yaunyaperezo, pontho Betele anati amala vungwa.”

⁶Bwererani kuna MBUYA mbamukhale na moyo, gopesera iye anamala nyanguta mbumba ya Yosefe ninga moto; iwo unavunga pyakwanga mu Betele mbapasowa na mbodzi ene wakuuthimisa motowo.

⁷Muna dzedze ndimwe anyakupotoza chilungamo kukhala chinthu chakuipa, pontho kupondereza pansi pyakulungama.

⁸Iye ule adasasanya mteme ndikutemembo pontho khwasa, mbasanduza mdima kukhala makalakwecha, pontho masikati kukhala mosiku, ule ambagumanyisa madzi a m'bara mbaakhuthulira pamataka a dziko yapansi, weneyo dzinache ndi MBUYA.

⁹Iye ambagomola mipanda yamphamvu mbavungiratu mizinda yakutchingwa na mpanda.

¹⁰Imwe mumbazonda nyakutonga mseru wakusumulula pyakuipa mbamunyansirwa na nyakulonga pyakuonadi.

¹¹Imwe mumbapondereza anyakutcherenga mbamuakhakhamiza kuti akupaseni mapira. Natenepo podi kwene kuti mwamanga nyumba zikulu-zikulu za miyala, imwe nkhabe dzakhalamo tayu; podi kwene kuti imwe mwabzala minda yadidi yamfesa, imwe nkhabe dzamwa vinyu wache tayu.

¹²Thangwi ine ndikudziwa kuinjipa kwachita upandu wanu, pontho kuinjipa kwachita pyakudawa pyanu. Imwe mumbapondereza anyakulungama mbamutawira kudyekerwa, pontho mumbapotoza chilungamo pamseru wa anyakutcherenga.

¹³Ndi thangwi yache nyanzeru, ndzidzi ninga wenewu, ambakhala pyache mulomo phoo, thangwi ndi ndzidzi wakuipa.

¹⁴Saka-sakani kuchita pyadidi nee pyakuipa tayu, towera mukhale na moyo. Penepo MBUYA Mulungu Wamphamvu zonsene anakhala namwe, ninga montho mumbapilongera imwe kuti iye ndiye.

¹⁵Zondani pyakuipa, funani pyadidi; chitani chilungamo pa miseru. Mwinango MBUYA anavera nsisi anthu a dzinza yeneyi, anyakusalira na moyo ale.

¹⁶Natenepo MBUYA Mulungu Wamphamvu zonsene akulonga tenepa: “Panakhala kukalala m'misewu monsene, pontho chiliro chakusanyika m'misika monsenene. Anyakulima anachemerwa dzalirambo, pontho anyakusintili anati akalale.

¹⁷Pnakhal chiliro chikulu m'minda yonsene yamfesa, thangwi ine ndinagwanda pakati panu. Ndalonga ndine MBUYA.”

¹⁸Dzedze kuna imwe, ale mumbalirira kuona Nsiku ya MBUYA. Thangwi yache ninji mumbalirira kuona Nsiku ya MBUYA? Nsiku yeneyi inakhala ya mdima nee cheza tayu.

¹⁹Nsiku yeneyi inakhala ninga munthu wakuthawa nkhalamu, mbakagumanikana na nyalugwe; khala ninga munthu wakupita m'nyumba mwache mbatsamisa dzanjache pafufu mbalumwa na nyoka.

²⁰Nsiku ya MBUYA inakhala yamdima, nee cheza na pang'ono pene tayu; mdima wa ndiwe ani, nee cheza na ching'ono chene tayu.

²¹MBUYA akulonga kuti, “Ine ndimbapizonda mbandinyansirwa nawo maphwando anu achipembedzo; ine nkhabe komerwa nayo tayu migumano yanu yachipembedzo.

²²Podi kwene mundidzesere nsembe zakupyerera na za mapira, ine nkhabe dzapitambira tayu. Podi kwene mundidzesere nyama zakunenepa ninga nsembe zachiphatizano, ine nkhabe dzapiikha konta tayu.

²³Lekani kundigontha m'khutu na nyimbo zanuzo; ine nkhabe dzavesera anyakatangale anu tayu.

²⁴M'mbuto mwache chilungamo mbachikuke ninga mkulo; pyakulungama pifambe ninga mkulo okhonda kupwa.

²⁵“M'thando mule pyaka makumanayi pile, ayi mudandidzesera nsembe na pyakupereka, imwe dzinza ya Israele?

²⁶Nkhabe! Podi imwe mwapembedza mifanikizo, milungu Sakuti ninga mfumu wanu, pontho Kaiwani, milungu yanu ya nyenyezi, imwe munati muithukule mifanikizo yeneyo,

²⁷nsiku inafuna ine dzakuendesani kudziko ya unyaperezo, m'dziko yakutali kupiringana Damasiko. Ndalonga ndine MBUYA, ule dzinache ndi Mulungu Wamphamvu zonsene.”