Read cisena AMOSE 7 Bible Online

AMOSE 7 - cisena bible

AMOSE 7

¹MBUYA Mulungu adandionesa pinthu ipi: Iye akhasasanyika kugwisa nyadzombe sindzidzi khundu ya phoso imbaperekwa kuna mfumu nkhumala vunwa, pontho pandzidzi ukhamera magoko.

²Pidamala nyadzombe kudya pyakumera pyonsene m'dzikomo, ine ndidalira kuti, “MBUYA Mulungu lekererani pyakudawa pya anthu anu! Ayi Yakobo anakwanisa tani kukhala na moyo? Iye ngwakusowa mphamvu!”

³Natenepo MBUYA adambombowesa ukali wache mbalonga mbati, “Penepi nkhabe dzachitika tayu. Ndalonga ndine MBUYA Mulungu.”

⁴Kubuluka penepo MBUYA Mulungu adandionesa chinthu ichi: MBUYA Mulungu akhasasanyikira pyakutchunyusa anthu na moto. Motowo udaumisa pyakwanga mataka, dziko yonsene mbivungikiratu.

⁵Natenepo ine ndidalira, “MBUYA Mulungu ndikukupemphani kuti mutome imira! Yakobo anakwanisa tani kukhala na moyo? Iye ngwakusowa mphamvu!”

⁶Natenepo MBUYA adambombowesa ukali wache mbalonga mbati, “Penepi pontho nkhabe dzachitika tayu. Ndalonga ndine MBUYA Mulungu.”

⁷Kubuluka penepo MBUYA adandionesa pontho chinthu chinango: Mbuya akhaimira chifupi na fufu ile ikhadamangwa pakuphatisa basa nkhambala yakudzongolera fufu. Iye akhali na nkhambala yakudzongolera fufu m'manja mwache.

⁸Penepo MBUYA adandivunza mbati, “Ayi Amose ukuonanji?” Ine ndidatawira kuti, “Ndikuona nkhambala yakudzongolera fufu.” Natenepo MBUYA adalonga mbati, “Ngayang'ana ine ndikuphatisa basa nkhambala yakudzongolera fufu kufuna kuonesa kuti anthu anga Aisraele akhala ninga fufu yakugongonyeka. Ine nkhabe kualeka kwene okhonda kuatchunyusa tayu.

⁹“Mbuto zakupembedzerapo za Isake zinati zivungwe, pontho mbuto zakupambulika za Israele zinasanduka madembe; na talasadanga ine ndinachita nkhondo na banja ya Yeroboamu.”

¹⁰Kubuluka penepo Amazia nyansembe wa ku Betele adatumiza mphangwa kuna Yeroboamu mfumu wa Israele kuti: “Amose akusasanya kukuchitirani upandu pakati pene pa Israele. Mafalache anati adzudzumise dziko yonseneyo.

¹¹Thangwi pinalonga Amose kuno mphipi: ‘Yeroboamu anati afe pankhondo, pontho Israele anati aende kudziko ya unyaperezo, mbaenda kutali na dziko yawo.’ ”

¹²Kubuluka penepo Amazia adalonga kuna Amose mbati, “Ndoko uko, iwe nyakulotera! Bwerera kudziko ya Yuda. Mphangwa zako zauprofeti ukalongere konthoko, pontho anthu a kweneko mbakupagali ninga mprofeti wawo.

¹³Leka longave mphangwa zauprofeti muno m'Betele, thangwi ino ndi mbuto yakupambulika ya mfumu, pontho ndi Nyumba ya Mulungu ya m'dzikomu.”

¹⁴Amose adatawira Amazia mbati, “Ine nee ndikhali mprofeti, penu mwanache mprofeti tayu, mbwenye ndikhali makabuswa ene pyanga, pontho nyakulima miti ya makuyu.

¹⁵Mbwenye MBUYA ndiye adandikwata kundibulusa pabasanga yakudyesa mabira mbalonga kuna ine mbati, ‘Ndoko ukalonge mphangwa zauprofeti kuna anthu anga Israele.’

¹⁶Chinchino pano ngava mafala alonga MBUYA. Iwe ukulonga kuti, ‘Leka longa mphangwa zauprofeti kupokanyisana na Israele, pontho leka lalika mwakupokanyisana na banja ya Isake.’

¹⁷“Natenepo MBUYA akulonga kuti, ‘Mkazako anasanduka puta mumzindamu, pontho anako achimuna na achikazi anaphiwa pankhondo. Dziko yanu inapimwa anthu mbaigawana pyawo, pontho iwe ene unati ufere m'dziko ya anyakukhonda tsalakana MBUYA. Israele anati aendedi kudziko ya unyaperezo kutali na dziko yawo.’ ”