Read cisena AMOSE 8 Bible Online

AMOSE 8 - cisena bible

AMOSE 8

¹MBUYA Mulungu adandionesa chinthu ichi: Chitundu cha nsapo zakufira.

²Iye adavunza mbati, “Ukuonanji Amose?” Ine ndidatawira kuti, “Chitundu cha nsapo zakufira.” Tenepo MBUYA adalonga mbati, “Ndzidzi wakumalisa[6] wafika pana anthu anga Israel; ine nkhabe kualeka kwene khonda kuatchunyusa tayu.

³“Pansiku yeneyo nyimbo zimbaimba iwo m'Nyumba ya Mulungu zinasanduka chiliro. Mitembo ya anthu inaponyerwa kunja mbikhala nadza-nadza, pontho kunjaku kunakhala lukutu noo![7] Ndalonga ndine MBUYA Mulungu.”

⁴Ngavani kuno imwe anthu, ale mumbapondereza anyakusowa mbamumaliratu anyakutcherenga a m'dzikomo,

⁵mbamulonga kuti, “Ayi Phwando yakusekera Kubalwa kwa Mwezi inamala lini, towera tikagulise mapirathu? Apo Nsiku Yakupuma inamala lini, towera ife tikagulise tirigu wathu, kupinza mididathu, kukwiza konta ya pinthu pyathu, kubera anthu na miyezo yakunama,

⁶pontho kugulisa na masundu-sundu ene a tirigu kuti tigule anyakutcherenga na siliva, pontho anyakusowa pinthu na nkhwaira.”

⁷MBUYA, ule ana a Yakobo ambamnyadira, adumbira kuti, “Ine nkhabe duwalira tayu chonsene chachita Israele.

⁸“Dziko inati itetemere thangwi ya penepi, pontho onsene anyakukhala mwenemo anati asintili. Dziko yonsene inakukuma ninga mkulo wa Nailo; inavunduka mbimbombowa ninga mkulo wa Nailo mu Iguputo.

⁹“Ndzidzi wenewo ndinachitisa dzuwa kuthobila na masikati, pontho mdima pa dziko yapansi mwenemo dzuwa ikuswa miti. Ndalonga ndine MBUYA Mulungu.

¹⁰Maphwando anu achipembedzo ndinaasandusa kusintili, pontho kuimba kwanu kukhala kulira. Monsenene ndinakuchitisani kuvala masakha, pontho kuchinga mpala. Ndzidzi wenewo ndinauchitisa kukhala ninga munthu kulira mwanache mbodzi ene basi, pontho mamalisiro ache anakhala ninga nsiku yakuva kupha.

¹¹“Ndzidzi unadza, ule unafuna ine dzatumiza njala ikulu m'dziko yonsene, nee njala ya phoso penu nyota yakufuna madzi tayu, mbwenye njala yakufuna kuva mafala a MBUYA. Ndalonga ndine MBUYA Mulungu.

¹²Anthu anazenza kubara mpakana kubara mbatsalakatika kubulukira kumpoto mpakana kumabulukiro dzuwa kusaka-saka mafala a MBUYA, kwache iwo nkhabe dzaagumana tayu.

¹³“Pansiku yeneyo amiyali akubalika na aphale amphamvu anakomoka thangwi ya nyota.

¹⁴Ale ambadumbira na dzina ya milungu ya Samaria, kulonga kuti, ‘Ninga mulungu wako ngwamoyo, iwe Dani,’ penu kulonga kuti, ‘Ninga mulungu wa Beeresheba ngwamoyo’ enewo anamala kufa mbakhonda lamukave pontho.”