Read cisena YONA 1 Bible Online

YONA 1 - cisena bible

YONA 1

¹MBUYA adalonga kuna Yona, mwana Amitai mbati,

²“Ndoko kumzinda ukulu wa Ninevi, mbukalalike mwakupokanyisana nawo; thangwi ndaona kudawika kwa anthu a mwenemo.”

³Mbwenye Yona kufuna kuthawa pamaso pa MBUYA adalamuka kwenda kudziko ya Tarisisi. Iye adatchithira kumzinda wa Yopa, kule kudagumana iye mwadiya ukulu wakwenda ku Tarisisi. Pidapagali iye kobiri, adapakira mwadiya kwenda ku Tarisisi kuthawa pamaso pa MBUYA.

⁴Mbwenye MBUYA adalamusa mphepo ikulu pabara pale, pontho chonzi chakugoswaletu chidagundika mwakuti mwadiyawo ukhali chifupi kupanduka.

⁵Anyakufambisa mwadiyawo onsene adagoswerwa pyakwanga, tenepo kada munthu adalira kuna milungu yache. Tenepo iwo adaponyera m'madzi mitolo, towera mwayidawo ululupirwe. Mbwenye Yona akhadenda pyache pansiletu pa mwadiya ule, kule kudagona iye chitulo chakufa nacho.

⁶Mkadamu wa mwadiya ule adenda kuna iye mbamvunza mbati, “Watani unagona pyako? Lamuka mbupemphere kuna milungu yako. Mwinango inativera nsisi mbapulumusa moyo wathu.”

⁷Anyakufambisa mwadiya ale adalonga kuna unango na mwanzache mbati, “Tendeni tichite ntsango, towera tione mbani anationesa nyatwayi.” Iwo adachitadi ntsango mbaphatwa ndi Yona.

⁸Natenepo iwo adamvunza mbati, “Chinchino pano ngatipange thangwi yache njanji kuti nyatwa yeneyi yatigwera? Umbaphata basa yanji? Umbabulukira kupi? Kwanu nkhupi? Apo ndiwe mtundu wanji wa munthu?”

⁹Yona adatawira mbati, “Ine ndine Mheberi. Ndimbapembedza MBUYA, Mulungu wa kudzulu, nyakulenga dziko na bara ene.”

¹⁰Yona adathimiza kulonga kuti iye akhathawa pamaso pa MBUYA. Tenepo anyakufambisa mwadiya ale adagoswerwa pyakwanga mbalonga mbati, “Chachita iwe ninji!”

¹¹Bara ile idanyanya kuvunduka. Tenepo iwo adavunza mbati, “Apo ife tichite nawe tani, towera bara imbombowe?”

¹²Yona adatawira mbati, “Ndiponyeni pyanu m'bara, tenepo bara inati imbombowe. Ndikupidziwa kuti mphepo ikulu yakugwerani thangwi ya ine.”

¹³M'mbuto mwache anyakufambisa mwadiya ale adayesa-yesa kuti mwadiya ule aenda nawo kumthunda, kuchapa na mphamvu zawo zonsene. Mbwenye iwo adapichimwana, thangwi chonzi chile chikhaenda mbichikula.

¹⁴Natenepo iwo adakhuwa pikulu kuna MBUYA mbati, “MBUYA taphata miyendo, lekani tawirisa kuti tife, thangwi ya kupha moyo wa munthuyi tayu. Lekani kutitchunyusa thangwi ya kupha munthu okhonda dawa, thangwi imwe MBUYA mwachita pyakukukomerani.”

¹⁵Kubuluka penepo iwo adamthukula Yona mbamponya m'bara. Natenepo bara idamatama.

¹⁶Penepi pidachitisa anyakufambisa mwadiya ale kugopa MBUYA mwakuti adapereka nsembe kuna iye mbadumbira kuti anamtumikira iye ene basi.

¹⁷Kwache MBUYA adatonga nsomba ikulu kukhudyula Yona. Natenepo iye adakhala m'mimba mwa nsomba nsiku zitatu, mosiku na masikati.