Read cisena YONA 2 Bible Online

YONA 2 - cisena bible

YONA 2

¹M'mimba mwa nsomba mule Yona adapemphera kuna MBUYA, Mulungu wache.

²Iye adalonga mbati, “Panyatwa zanga, MBUYA, ndidakuchemerani, tenepo mudanditawira. Kubulukira pansi pa dziko ya anyakufa ndidakhuwa kufuna chiphedzo, tenepo imwe mudandiva kulira kwanga.

³Imwe mudandiponyera pansi pakuzwika, pansiletu pabara, kule kukhadandizungulira madzi onsene, pontho mabimbi anu amphamvu andibulumundisa.

⁴Ine ndidalonga kuti, ‘Ndatayikiratu kubuluka pamaso panu. Ayi ndinati ndikaione pontho Nyumbanu Yakuchena?’

⁵Madzi adandifika m'khosi mbandikhamika nawo; bara idandibiziratu monsene mwene, pontho usekere udandipyangirira-pyangirira mumsolo mwanga.

⁶Ine ndidabira mpakana pansi pa mitsitsi ya mapiri, kudziko ile idandifungira na mphinga kwenda na kwenda.[1] Mbwenye imwe MBUYA, Mulungu wanga, mudandibulusa wamoyo ku Chiphompho chikulu.

⁷“Pikhakomoka moyo wanga, ine ndidakumbuka imwe MBUYA, pontho kupemphera kwanga kudafika kuna imwe, ku Nyumbanu yakuchena.

⁸“Anthu ale ambakakamira kupembedza mifanikizo yapezi, ambataya kukhulupirika kwawo kuna imwe.

⁹Mbwenye ine, na nyimbo zakupereka nazo takhuta, ndinapereka nsembe kuna imwe. Pinthu pidadumbira ine kuna imwe, ndinati ndipichitedi. Chipulumuso chimbabulukira kuna MBUYA.”

¹⁰MBUYA adatonga nsomba ile, natenepo chidalukula Yona kumtunda.