Read cisena YONA 3 Bible Online

YONA 3 - cisena bible

YONA 3

¹MBUYA adalonga kuna Yona kachiwiri kache mbati,

²“Ndoko kumzinda ukulu wa Ninevi mbukalalike kweneko mphangwa zinakupanga inezi.”

³Natenepo Yona adavera MBUYA mbaenda ku Ninevi. Ninevi ukhali mzinda ukulu pyakwanga mwakuti munthu anakwanisa kukwata nsiku zitatu kugwanda namo.

⁴Yona adatoma kufamba mumzindamo, tenepo pidamala iye kufamba nsinzo wa nsiku ibodzi, adalalika mbati, “Pangamala nsiku makumanayi, kutomera lero, Ninevi unavungwa!”

⁵Anthu a ku Ninevi adakhulupira mphangwa za Mulungu. Iwo adaverana kupimana kudya, natenepo onsene a iwo, mkulu penu mwana, adavala masakha kuonesa kuti akhadaleka pyakudawa kwawo.

⁶Pidava mfumu wa Ninevi penepi, adalamuka pampando wache wachifumu. Iye adadula mkhanjo wache mbavalambo masakha mbaenda kakhala padotha.

⁷Iye adapereka matongero kuna anthu a ku Ninevi kuti, Na utongi wa mfumu, pontho mathubu ache: “Munthu onsene, penu nyama, ng'ombe na mabira, mbaleke lawa na chinthu chene; lekani kupitawirisa kudya penu kumwa madzi.

⁸Mbwenye anthu na pifuyo pyene mbavale masakha. Munthu onsene mbadembetere kuna Mulungu. Iwo mbaleke makhaliro awo akuipa pontho akuzunguzika.

⁹Mbani anapidziwa? Mwinango Mulungu anambombowesa ukali wache, pontho thangwi yakuva kwache nyambalo iye analeka kutizhangalira, towera tileke vungwa.”

¹⁰Pidaona Mulungu pidachita iwo pile, pontho mule mudalekera iwo makhaliro awo akudawika, iye adava nawo nyambalo mbasanduza manyerezero ache, pontho mbakhonda kuatchunyusa ninga mukhadapisasanyira iye.