Read cisena YONA 4 Bible Online

YONA 4 - cisena bible

YONA 4

¹Mbwenye Yona hadakomerwe napyo penepi tayu mbaipirwa napyo pyakwanga.

²Iye adapemphera kuna MBUYA mbati, “MBUYA, ayi pidalonga ine ndzidzi ukhali ine kwathu si penepi tayu? Ndi thangwi yache sidachite nthontho tayu kuthawira pyanga kudziko ya Tarisisi. Ine ndikhapidziwa kuti imwe ndimwe Mulungu wakukoma mtima pontho wakuva nyambalo. Imwe ndimwe wakusowa chipsu pontho wakuonesa anthu kuafuna kwanu kokhonda mala, pontho Mulungu wakuuphata mtima kukhonda gwisa nyatwa pana anthu.

³Chinchino MBUYA, ndipheni pyanu, thangwi mphyadidi kufa pyanga kusiyana na kukhala na moyo.”

⁴Mbwenye MBUYA adamtawira mbati, “Ayi chachita iwechi ntchinthu chakuthema kuzhangali ninga tenepa?”

⁵Yona adabuluka mumzindamo mbaenda kukhundu yakumabulukiro dzuwa mbakhala pansi. Iye adamanga kakhumbi kache mbakhala pamthunzi mwenemo kuti aone ninji chinafuna chitika kuna Ninevi ule.

⁶MBUYA Mulungu adachitisa mtawi kumera mbauchitisa kukula padzulu pa Yona kuti umpase mthunzi, towera alulupirwe mumtima; Yona adakomerwa nawo pyakwanga mtawi ule.

⁷Mbwenye mangwana mwache m'makalakwecha, Mulungu adatuma mfunye, towera zinyenyene mtawi ule. Natenepo mtawi ule udaunyala.

⁸Pidavuka dzuwa, Mulungu adatumiza mphepo yakupisa yakumabulukiro dzuwa. Tenepo Yona akhali chifupi kukomoka, thangwi ya kupisa kwa dzuwa kukhammenya pamsolo pache kule. Natenepo iye adapifuna[2] kuti afe pyache. Iye adalonga mbati, “Mphyadidi mbidafa pyanga kusiyana na kukhala na moyo.”

⁹Mbwenye Mulungu adalonga kuna Yona mbati, “Ayi chachita iwechi ntchinthu chakuthema kuzhangalira mtawiwu?” Yona adatawira Mulungu mbati, “Ande chachita inechi ntchakuthema, kuzhangali kwanga ndinakwanisa kufa nako.”

¹⁰Mbwenye MBUYA adalonga mbati, “Iwe ukuva nsisi na mtawi, podi kwene kuti hudautsalakane penu kuukuza tayu. Iwo udamera mosiku ubodzi basi, mbufa mosiku ubodzi basi.

¹¹Apo ndi tani na mzinda ukulu wa Ninevi? Ayi ine sidatheme kuuvera nsisi tayu mzinda wa anthu akupiringana pikwi dzana na makumawiri, ale nkhabe kwanisa kusiyanisa tayu pakati pa chadidi na chakuipa, pontho ule una pifuyo pizinji.”