Read cisena KALEMBERA 10 Bible Online

KALEMBERA 10 - cisena bible

KALEMBERA 10

¹MBUYA adalonga kuna Mose mbati,

²“Sasanya ngoma ziwiri zasiliva zakufulwa na nyundo kuti ziphatiswe basa kuchemera anthu kudza pabodzi, pontho kuapanga pya kufulusa msasa.

³Ngoma zonsene ziwiri zingalira mwakukhonda lekeza anthu onsene a Israele athema kugumanyikana pabodzi pamsuwo wa Chikhumbi cha Mulungu.

⁴Mbwenye ingalira ndi ngoma ibodzi, penepo agumanyikane mbakadamu a mbumba okha basi.

⁵Ngoma ingalira mwakulekeza-lekeza, madzinza ale ali mumsasa kukhundu yakumabulukiro dzuwa athema kufuluka.

⁶Ngomayo ingalira pontho mwakulekeza-lekeza, madzinza ale ali mumsasa kukhundu yakumwera athema kufuluka. Ngoma ingalira mwakulekeza-lekeza ndiye kuti anthu afuluse msasawo.

⁷Mbwenye ngakhala nkhufuna kwene kuchemera anthu kuti agumanyikane pabodzi, ngoma mbileke lizwa mwakulekeza-lekeza.

⁸Ngomazi zathema kulizwa na ana a Aroni anyansembe. “Matongero ali m'tchindewa athema kutewezwa na mifendu yonsene inadzayo.

⁹Ngakhala muli pankhondo m'dziko mwanu, kufuna kupitchinjiriza mwekha mwene kuna anyamalwanu, lizani ngoma zenezi ninga chidziwiso chakuti kuna nkhondo. Ine MBUYA Mulungu wanu ndinati ndikuphedzeni pontho kukupulumusani kuna anyamalwanu.

¹⁰Pontho pandzidzi wakusekera, pa Maphwando akusekera Kubalwa kwa mwezi na maphwando anango akusankhulika, lizani ngomazo pandzidzi unapereka imwe nsembe zakupyerera na nsembe zachiphatizano. Tenepo ine ndinati ndikuphedzeni. Ine ndine MBUYA Mulungu wanu.”

¹¹Pansiku yamakumawiri ya mwezi wachiwiri wa chaka chachiwiri pikhadabuluka Aisraele m'dziko ya Iguputo, makole akukhala padzulu pa Chikhumbi cha Mulungu adakwira m'dzulu,

¹²natenepo Aisraele adautoma ulendo wawo kubuluka m'thando yatchetcha ya Sinai. Makole ale adadza mbaimira m'thando yatchetcha ya Parani.

¹³Natenepo iwo adautoma ulendo wawo ninga mudaatongera MBUYA kudzera muna Mose.

¹⁴Adatoma kwenda akhali magulu a dzinza ya Yuda pansi pa banderawo. Nashoni mwana Aminadabu ndiye akhali mkadamu wa dzinza ya Yuda.

¹⁵Netanele mwana Zuari ndiye akhali mkadamu wa dzinza ya Isakara,

¹⁶pontho Eliabu mwana Heloni ndiye akhali mkadamu wa dzinza ya Zebuloni.

¹⁷Kubuluka penepo Chikhumbi cha Mulungu chidakhutchiwa, tenepo mbumba ya Gereshoni na mbumba ya Merari, ale adathukula Chikhumbi, adalamuka kwenda.

¹⁸Achiwiri kwenda akhali magulu a dzinza ya Rubeni pansi pa banderawo. Elizuri mwana Shedeuri ndiye akhali mkadamu wa dzinza ya Rubeni.

¹⁹Shelumiele mwana Zurishadai ndiye akhali mkadamu wa dzinza ya Simioni,

²⁰pontho Eliasafu mwana Deuele ndiye akhali mkadamu wa dzinza ya Gadi.

²¹Tenepo mbumba ya Kohati ya m'dzinza ya Levi adalamukambo kwenda uku athukula pinthu pyakupambulika pya m'Chikhumbi cha Mulungu. Anthu enewa mbadzati fika pambuto pakhafuna iwo kumanga msasa pale, Chikhumbi cha Mulungu chikhadamala kale kuimiswa.

²²Achitatu kwenda ndiye akhali magulu a dzinza ya Eferemu pansi pa banderawo. Elishama mwana Amihudi akhali mkadamu wa dzinza ya Eferemu.

²³Gamaliele mwana Pedazuri ndiye akhali mkadamu wa dzinza ya Manase,

²⁴pontho Abidani mwana Gideoni ndiye akhali mkadamu wa dzinza ya Benjemani.

²⁵Akumalisira kwenda ndiye akhali magulu a dzinza ya Dani pansi pa banderawo, ale akhaphata basa kutchinjiriza magulu onsene m'nduli. Ahizera mwana Amishadai ndiye akhali mkadamu wa dzinza ya Dani.

²⁶Pagiele mwana Okarani ndiye akhali mkadamu wa dzinza ya Asheri,

²⁷pontho Ahira mwana Enani ndiye akhali mkadamu wa dzinza ya Nafitali.

²⁸Ndzidzi onsene ukhafuluka Aisraele kwenda kunango mwenemu ndiye mukhafambira iwo panyandandanda gulu na gulu.

²⁹Mose adalonga kuna Hobabu mwana wamamuna wa Yetero tebzalache wa ku Midiani mbati, “Ife tili chifupi kwenda kumbuto kule kudalonga MBUYA kuti anatipasa. Iye adalonga pontho kuti Aisraele pinthu pyawo pinaafambira mwadidi, natenepo tende pabodzi, pontho tinagawana nawe mfumathuyo.”

³⁰Mbwenye Hobabu adatawira mbati, “Nkhabe, ine ndinabwerera m'nduli kudziko ya kwathu na kuna anthu a kwathu.”

³¹Mose adalonga mbati, “Ndaphata miyendo, leka kutisiya. Iwe ukudziwa kule kunafuna ife kamanga msasathu m'thandomo, natenepo iwe unakwanisa kukhala maso athu.

³²Iwe ungaenda nafe pabodzi tinati tikagawane nawembo mtsanzayiso unafuna katipasa MBUYA.”

³³Pidabuluka anthu paphiri ya Sinai, phiri yakuchena, adafamba nsiku zitatu. Ndzidzi onsene ukhafamba iwo Bokosi ya Chiverano cha MBUYA ikhakhala patsogolo towera igumane mbuto yakuti iwo amangepo msasa.

³⁴Pikhafamba iwo kubuluka msasa kwenda msasa unango makole a MBUYA akhali padzulu pawo na masikati.

³⁵Ndzidzi onsene ukhafuna kwenda Bokosi ya Chiverano ya MBUYA kunango, Mose akhalonga mbati, “Lamukani, MBUYA, mbamubalalise anyamalwanu pontho anyakukuzondani mbathawe pamaso panu.”

³⁶Ndzidzi onsene ukhaimira Bokosiyi, Mose akhalonga mbati, “Bwererani, MBUYA, kuna pikwi-pikwi pyokhonda lengeseka pya mabanja a Aisraele.”[1]