Read cisena KALEMBERA 11 Bible Online

KALEMBERA 11 - cisena bible

KALEMBERA 11

¹Anthu adatoma kudungunya kuna MBUYA pya nyatwa zawo. Pidava MBUYA kudungunya kwawoko, adazhangali nawo mbagwisa moto pakati pawo mbunyekesa anthu a kukhundu yakumadolomero a msasawo.

²Anthu adalira kuna Mose kuti aaphedze, tenepo Mose adapemphera kuna MBUYA, natenepo moto udathimiratu.

³Natenepo mbutoyo idathulwa Tabera,[2] thangwi moto wakubulukira kuna MBUYA udagaka pakati pawo.

⁴Pakati pa Aisraele pakhali alendo ale akhaendambo nawo pabodzi ulendo wawo. Alendo ale akhali na usa pyakwanga, tenepo na Aisraele enembo adatoma kudungunya mbati, “Ngakhala tikudyambo kwene nyama yokha mbwenye!

⁵Mu Iguputo mule tikhadya pyathu nsomba yonsene inafuna ife, pontho nee tikhachita kugula tayu. Kumbukani pikhadya ife pile: makaka, mavembe pontho anyezi na pyakukomesera muliwo pinango?

⁶Mbwenye chinchino ife nkhabe na maba ene tayu. Nkhabe chinthu na chibodzi chene chakuti tinakwanisa kudya tayu, mbwenye manawa basi nsiku na nsiku.”

⁷Mana akhali ninga pimbewu ping'ono-ping'ono pya mtundu wakhale wakuchenerera.

⁸Manawa akhachita kugwa na mosiku pakati pa msasa wa Aisraele pabodzi pene na bume. Na machibese ene anthu akhazungulira kulokota manawa mbakaatibula m'banda penu kuapeya na libwe kuti adze ufa. Angamala penepo akhaaphika mbasasanya pitumbuwa. Pikhakoma ninga mkate wakuphikwa na mafuta aolivi.

¹⁰Mose adava pyonsene pikhadungunya anthu pikhakhala iwo m'mabanja mwawo m'misuwo ya makumbi awo. Mose adasanyika pyakwanga mumtima thangwi MBUYA adazhangalira pyakwanga anthu enewa.

¹¹Tenepo Mose adavunza MBUYA mbati, “Thangwi yache ninji mwadzesa nyatwa yeneyi pana nyabasanu? Ninji chachita ine chokhonda kukukomerani kuti mundipase nyatwa kuyang'anira anthu onsenewa?

¹²Si ine ndidaalenga penu kuabala tayu! Apo thangwi yache ninji mukundipanga kuti ndiathukule anthuwa m'manja mwanga ninga mumbachitira makayaya kuthukula mwana, kwenda nawo kudziko idadumbira imwe kuna makolo awo?

¹³Nyama yakukwana mwinji onsenewu ndinaikwata kupi? Iwo ambandilirira ndzidzi onsene kuti ndiapase nyama.

¹⁴Ine ndekha ene nkhabe kwanisa kuyang'anira anthu onsenewa tayu; ndi nyatwa ikulu pyakwanga kuna ine.

¹⁵Ngakhala mwenemu ndiye munafunira imwe kuti pikhale tenepo kuna ine, ndivereni nsisi, pontho ndipheni pyanu chinchino pano, towera ndileke ona nyatwa inandinensayi.”

¹⁶MBUYA adalonga kuna Mose mbati, “Chemeresa amuna makumanomwe ale ambadziwika kuna iwe kuti mbakadamu pontho akulu-akulu a Aisraele, adze kuna ine pa Chikhumbi cha Mulungu, pontho uapange kuti aimire penepo pabodzi pene na iwe.

¹⁷Ine ndinatchitha mbandilonga nawe penepo, pontho ndinakwata khundu ibodzi ya mzimu udakupasa ine ule mbandiupereka kuna iwo. Natenepo iwo anakwanisa kukuphedza kuthukula nyatwa za anthu enewa, towera uleke thukula wekha nyatwazi.

¹⁸Chinchino pano, apange anthu kuti picheneseni mwekha mwene kusasanyikira pya mangwana; nsiku inafuna imwe kudya nyama. MBUYA ava kulira kwanu kuti, ‘Ngakhala tikudyambo nyama yokha mbwenye! Mu Iguputove mbwenye!’ Chinchino MBUYA anati akupasani nyama, tenepo munati muidyedi.

¹⁹Munati muidyedi nee nsiku ziwiri zokha penu zishanu, penu khumi, penu makumawiri tayu,

²⁰mbwenye mwezi wamumphu mpakana ichite kubulukira m'mphuno mwanumo, pontho mpakana muchite kutapika nayo. Penepi pinati pichitike thangwi imwe mudamkhonda MBUYA ule ali pano pakati panu, pontho mukhadungunya pamaso pache kuti, ‘Ife tidabulukiranji m'dziko ya Iguputo?’ ”

²¹Mose adalonga kuna MBUYA mbati, “Anthu anatsogolera ine pano ndi pikwi madzana matanthatu, ndiye mukulonga kuti munaapasa nyama yakukwana kudya mwezi wamumphu?

²²Podi ng'ombe na mabira onsene mbadaphiwa, ayi mukunyerezera kuti mbadakwana nayo nyamache? Podi nsomba zonsene za nyanza mbazidaphiwa, ayi mukunyerezera kuti mbazidaakwana?”

²³MBUYA adatawira mbati, “Kani mphamvu zanga zina madire? Chinchino pano unati uone ngakhala pyalonga inepi pinachitika penu tayu?”

²⁴Natenepo Mose adabuluka panja mbakapanga anthu pikhadalonga MBUYA pile. Iye adagumanyisa akadamu makumanomwe ale mbaaikha mwakuzungulira Chikhumbi cha Mulungu.

²⁵Tenepo MBUYA adatchithira m'makole mbalonga kuna Mose. Iye adakwata khundu inango ya mzimu udapereka iye kuna Mose mbaupereka kuna akadamu makumanomwe ale. Pidafika mzimu ule pana iwo, onsene adatoma kulonga ninga maprofeti, mbwenye hadakwate ndzidzi ukulu tayu.

²⁶Awiri mwa akadamu makumanomwe ale, Elidadi na Medadi akhadasala pyawo mumsasa mule, nee kwenda ku Chikhumbi cha Mulungu tayu. Mwenemo mukhali iwomo mzimu adadza pana iwo mbatomambo kulonga ninga maprofeti.

²⁷Mphale unango adathamanga kapanga Mose pikhachita Elidadi na Medadi pile.

²⁸Tenepo Yoswa mwana Nuni, ule akhali nyakuphedza Mose kutomera uphaleache adalonga mbati, “Mose, mbuyanga, akhondeseni!”

²⁹Mose adatawira mbati, “Kani iwe ukuchita nawo bivu thangwi ya ine? Ine ndimbapifuna pyakwanga kuti anthu a MBUYA onsene akhale maprofeti, pontho kuti MBUYA aikhe Mzimu wache muna iwo.”

³⁰Tenepo Mose na akadamu makumanomwe ale adabwerera kumsasa kule.

³¹Mwakututumusa MBUYA adatumiza mphepo mbiikwata makambuma kubulukira kunyanza kudza nawo kumsasa wa Aisraele. Makambuma adaphama mumsasa mbaphopha pansi ponsene pene na mulu wakufika m'ntchafu kuzungulira msasawo nsinzo wache ninga ulendo wa nsiku ibodzi kukhundu zonsene.[3]

³²Natenepo mosiku na masikati a nsiku yeneyo, pontho na mangwana mwache, anthu adagundika kuphata makambuma; nkhabe munthu adaphata pyakuchepa kupiringana makilogramu chikwi kulemera kwache tayu. Aisraele adaathasika mumsasa onsene ule kuti aume.

³³Nyama ile pidafika iyo kati na kati kudyiwa, MBUYA adazhangali nawo anthu ale mbagwisa muliri wakugoswa pakati pawo.

³⁴Mbuto yeneyo idathulwa Kibiroti-Hataava,[4] thangwi penepo ndiye padaikhwa anthu akufa ale akhali na usa.

³⁵Kubuluka penepo anthu adafulukira ku Hazeroti, kweneko ndiye kudamanga iwo msasawo.