Read cisena KALEMBERA 12 Bible Online

KALEMBERA 12 - cisena bible

KALEMBERA 12

¹Mose akhadasemba mkazi wa dzinza ya Kushi, natenepo Miriamu na Aroni adasumulula Mose thangwi ya Penepyo.

²Iwo adalonga mbati, “Kadi MBUYA ambalonga kudzera muna[5] Mose yekha basi? Kadi iye hambalongambo kudzera muna ife tayu?” MBUYA adava pidalonga iwo pile.

³Mose akhali munthu wakupichepesa pyakwanga kupiringana munthu unango onsene padziko yapansi.

⁴Vumbu-vumbu MBUYA adalonga kuna Mose, Aroni na Miriamu mbati, “Ndinafuna imwe utatuanu mudze kuno ku Chikhumbi cha Mulungu.” Iwo adendadi.

⁵MBUYA adatchitha mumzati wa makole mbaimira pamsuwo wa Chikhumbi chile mbachemera mbati, “Aroni! Miriamu!” Anthu awiriwo adenda patsogolo,

⁶tenepo MBUYA adalonga mbati, “Veserani pinafuna ine kulongapi! Pakati panu pangakhala pana mprofeti, ine ndimbapionesera kuna iye kumasomphenya, pontho kulonga naye kundoto.

⁷Mbwenye mphyakusiyana ndingafuna kulonga na nyabasanga Mose ine nkhabe chita tenepo tayu; weneyu ndamuikha kukhala mkadamu wakuyang'anira Aisraele onsene.[6]

⁸Natenepo ine ndimbalonga naye maso na maso mwakuveka mwadidi nee mwanthanthi tayu; pontho iye aona na makhaliro anga ene! Ninji chakuchitisani kuwanga mtima tenepo kulonga mwakupokanyisana na nyabasanga Mose?”

⁹MBUYA adazhangali nawo mbabulukapo pyache,

¹⁰pontho makole adabuluka pa Chikhumbi chile. Vumbulukutu khanda ya Miriamu idaphatwa na matanya mbisanduka yakuchena ninga matalala. Pidaona Aroni kuti Miriamu aphatwa na matanya,

¹¹iye adalonga kuna Mose mbati, “Ndaphata miyendo, mbuyanga, lekani kuchitisa kuti titchunyuke ninga tenepa thangwi ya pyakudawa pyathu pyachita ife mwakupupwapi.

¹²Lekani tawirisa kuti iye asanduke ninga munthu wakubalwa wakufa kale na khanda yakudyiwa khundu ibodzi.”

¹³Natenepo Mose adadembetera MBUYA mwakugaluza fala mbati, “Mulungu, ndaphata miyendo muwangiseni.”

¹⁴MBUYA adatawira mbati, “Mbadakhala kuti babache adamphulira mata kunkhope, ayi iye mbadakhala okhonda chena tayu nsiku zinomwe? Natenepo mbuluseni kuti akhale kunja kwa msasa nsiku zinomwe. Angamala penepo anakwanisa kubwerera.”

¹⁵Miriamu adafungirwa kunja kwa msasa nsiku zinomwe. Natenepo anthu hadafuluke kuthimiza ulendo wawo tayu kufikirana iye adabwerera mumsasa mule.

¹⁶Kubuluka penepo iwo adafuluka pa Hazeroti mbakamanga msasawo m'thando yatchetcha ya Parani.