Read cisena KALEMBERA 13 Bible Online

KALEMBERA 13 - cisena bible

KALEMBERA 13

¹MBUYA adalonga kuna Mose mbati,

²“Sankhula amuna angasi kuti akazonde dziko ya Kanani, ile inafuna ine kuipereka kuna Aisraele; kada dzinza usankhulepo mkadamu mbodzi.”

³Mose adaveradi MBUYA natenepo kubulukira m'thando yatchetcha ya Parani iye adatuma akadamu awa: Shamua mwana Zakuri wa dzinza ya Rubeni; Shafati mwana Hori wa dzinza ya Simioni; Kalebu mwana Yefune wa dzinza ya Yuda; Igali mwana Yosefe wa dzinza ya Isakara; Hoshea mwana Nuni wa dzinza ya Eferemu; Paliti mwana Rafu wa dzinza ya Benjemani; Gadiele mwana Sodi wa dzinza ya Zebuloni; Gadi mwana Susi wa dzinza ya Manase; Amiele mwana Gemali wa dzinza ya Dani; Setura mwana Mikaele wa dzinza ya Asheri; Nahibi mwana Vofusi wa dzinza ya Nafitali; Geuele mwana Maki wa dzinza ya Gadi.

¹⁶Enewa mbanthu adatuma Mose kuti akazonde dziko ya Kanani. Mose adatchandula dzina Hoshea mwana Nuni kukhala Yoswa.

¹⁷Pidaatumiza Mose kuti akazonde dziko ile, iye adalonga mbati, “Kubulukira pano ndokoni kumpoto kudzera kuthando yatchetcha ya Negebu mpakana kunthemba ya mapiri.

¹⁸Kaoneni kuti yeneyi ndi dziko ya mtundu wanji? Anakhala mwenemowo mbanthu angasi? Anthu enewa ngamphamvu zawo penu tayu?

¹⁹Kaoneni ngakhala mataka a m'dzikoyo ngadidi penu tayu, pontho ngakhala anthu akukhala maluwani akutchingwa na mpanda penu tayu.

²⁰Kaoneni ngakhala matakache ngakubalisa pinthu, pontho ngakhala ndi dziko ya miti mizinji. Onesesani kuti pakubwera kubulukira kweneko mudze na nsapo zingasi za m'dzikomo.” (Wenewu ukhali ndzidzi wakutoma kufira kwa mfesa.)

²¹Natenepo amuna ale adenda kumpoto kwa dziko ile mbakaizonda kubulukira m'thando yatchetcha ya Zini kumwera mpakana ku Rehobu chifupi na makata a Hamati kumpoto.

²²Iwo chakutoma adenda kudzera kuthando yatchetcha ya Negebu ile mbafika ku Hebroni, kule kumbakhala nkhonda Ahimani, Sheshai na Talimai, pidzukulu pya Anaki. Mzinda wa Hebroni udamangwa pyaka pinomwe, mzinda wa Zoani mu Iguputo mbadzati mangwa.

²³Iwo adafika kuphedi ya Eshikolo, tenepo kweneko iwo adagwandako tsamvu ile ikhali na tsaputu ya nsapo zamfesa. Iyo ikhalemera pyakwanga mwakuti idachita kuthukuliwa pa mtembero. Iwo adadza pontho na mtheme na mkuyu.

²⁴Mbuto yeneyo idathulwa phedi ya Eshikolo,[7] thangwi tsaputu yamfesa zile idagwandwa penepo.

²⁵Pidamala iwo zonda dziko ile nsiku makumanayi, anthu ale adabwerera

²⁶kuna Mose, Aroni na dzinza yonsene ya Israele, ale akhali pa Kadeshi m'thando yatchetcha ya Parani. Iwo adalonga kuna adaatuma ale pontho na kuna dzinza yonsene pinthu pidaona iwo pontho adaaonesa nsapo zikhadadza na iwo zile.

²⁷Iwo adalonga kuna Mose mbati, “Ife taizonda dziko ile, tenepo taiona kuti njamphonje; nsapo zache zinango zabwera na ifezi nsizi.

²⁸Mbwenye anthu ache anakhala mwenemo ngamphamvu, pontho mizindawo njikulu-ikulu yakutchingwa na mpanda. Kuthimiza penepo tidaonamo pidzukulu pya Anaki.

²⁹Aamaleki ambakhala m'thando yatchetcha ya Negebu; Ahiti, Ayebusi, na Aamori ambakhala m'mapiri; pontho Akanani ambakhala chifupi na Bara ya Mediterania pontho m'khundu-khundu mwa mkulo wa Yorodani.”

³⁰Kalebu adamatamisa anthu akhadagumanyikana mwakuzungulira[8] Mose ale mbalonga mbati, “Ife tendeni kweneko tikaikwate dziko yathuyo. Ife tina mphamvu pyakwanga zakukwanisa kuakunda nazo.”

³¹Mbwenye anthu akhadenda pabodzi na Kalebu ale adalonga mbati, “Ife nkhabe mphamvu zakukwanisa kusosa nazo anthu enewa tayu; anthu a kweneko ana mphamvu pyakwanga kupiringana ife.”

³²Natenepo iwo adalonga pyakunama pakati pa Aisraele pya dziko ikhadazonda iwo ile. Iwo adalonga mbati, “Dzikoyo nkhabe mataka akubalisa pinthu pyakukwana kudyesa anthu onsene anakhala mwenemowo tayu. Munthu onsene adaona ife akhali wakulapha,

³³pontho tidaonamo amuna amphamvu akujintcha, pidzukulu pya Anaki. Ife tikhaoneka kwene ninga nthete pamaso pawo, pontho ife tikhapionambo tenepo.”