Read cisena KALEMBERA 14 Bible Online

KALEMBERA 14 - cisena bible

KALEMBERA 14

¹Mosiku onsene anthu adalira pyakwanga mwakugaluza fala.

²Iwo akhadungunya kuna Mose pontho Aroni mbalonga mbati, “Mphyadidi ife mbatidafera pyathu ku Iguputo kule, penu m'thando yatchetcha muno.

³MBUYA anatikwatiranji kwenda nafe m'dziko yeneyo. Ife tinati timale puluzika pankhondo, pontho akazathu na anathu anati aphatwe. Ayi si pyadidi tayu kuti ife tibwerere pyathu ku Iguputo?”

⁴Natenepo iwo adalonga kuna unango na mwanzache mbati, “Tendeni tisankhule nyakutitsogolera kuti tibwerere pyathu ku Iguputo!”

⁵Tenepo Mose na Aroni adapigwisa na fufumimba pamaso pa anthu onsene.

⁶Yoswa mwana Nuni na Kalebu mwana Yefune, ale akhali abodzi mwa anyakuzonda dziko adatsukwala pyakwanga mbang'amba nguwo zawo.

⁷Natenepo iwo adalonga kuna anthu mbati, “Dziko idenda ife kazonda ile njadidi pyakwanga.

⁸Ngakhala MBUYA anatikomera mtima, anati atikwate kwenda nafe kweneko katipasa dziko yamphonje.

⁹Lekani kumpandukira MBUYA, pontho lekani gopa anthu anakhala mwenemowo. Tinati tikaakunde mwakukhonda bulusa kaluma. Pyonsene pyakuatchinjiriza pyamala, mbwenye Mulungu ali nafe. Natenepo lekani chita mantha na anthu enewa.”

¹⁰Mbwenye gulu yonsene ya Aisraele ikhaganagana pyakuaponyera miyala kuti aaphe. Vumbu-vumbu demelero ya MBUYA idaoneka padzulu pa Chikhumbi cha Mulungu pamaso pa Aisraele onsene.

¹¹MBUYA adalonga kuna Mose mbati, “Anthu enewa analeka lini kundikhonda? Iwo analeka lini kukhonda kundinyindira, podi kwene kuti ndachita pinthu pyakudodomesa pizinji pakati pawo?

¹²Ine ndinati ndigwise muliri pakati pawo kuti onsene amale vungika, mbwenye iwe wekha ndinakuchitisa kukhala baba wa dzinza ikulu pontho yamphamvu kupiringana iwo.”

¹³Mbwenye Mose adalonga kuna MBUYA mbati, “Anthuwa mudaadzesa ndimwe na mphamvu zanu kuabulusa m'dziko ya Iguputo. Tenepo anthu a ku Iguputo angava pinthu pinafuna imwe chitira anthu anupi,

¹⁴anati apilonge kuna anthu a muno. Anthu enewa adava kale kuti imwe MBUYA muli pakati pathu, mumbaoneka pakwecha makole anu angaimira padzulu pathu, pontho kuti ife tingafamba na masikati imwe mumbakhala patsogolo pathu mumzati wa makole, pontho tingafamba na mosiku imwe mumbakhala patsogolo pathu mumzati wa moto.

¹⁵Tenepo imwe mungaapha anthu anu onsenewa, madzinza ale adava pya mbiri yanu yadidi analonga

¹⁶kuti imwe mudaapha anthu anuwo m'thando yatchetcha thangwi mudapichimwana kuadzesa anthuwa m'dziko idadumbira imwe kuna iwo ile.

¹⁷Natenepo, MBUYA, ndikupempha kuti mutionese mphamvu zanu, pontho mutichitire pinthu pidadumbira imwe kuna ife, pidalonga imwe kuti,

¹⁸‘Ine, MBUYA, si ine wachitswu tayu; ine ndimbaonesa munthu kumfuna kwanga kokhonda mala, kukhulupirika kwanga, kulekerera kwanga nyakudawa na nyakupandukira. Kwache ine nkhabe leka kutchunyusa munthu angadawa; ine ndimbatchunyusa mwana thangwi ya kudawa kwa makolo ache mpakana mfendu wachitatu na wachinayi ene.’

¹⁹Natenepo MBUYA malingana na kukula kwa kuafuna kwanu kokhonda mala, ndikupempha kuti mulekerere kudawa kwa anthu enewa ninga mukhachitira imwe kutomera pakutoma pidabuluka iwo m'dziko ya Iguputo.”

²⁰MBUYA adatawira mbati, “Ndiaalekerera ninga mwapemphera iwe.

²¹Mbwenye ine ninga wamoyo, pontho ninga demelero yanga imbadzala m'dziko yonsene yapansi, ndikudumbira

²²kuti nkhabe mbodzi wa anthu enewa anati apite m'dzikomo tayu. Iwo aona demelero yanga na pyakudodomesa pidachita ine mu Iguputo na m'thando yatchetcha mwene. Ndzidzi uno wayesa iwo kupirira kwangawu ngwachikhumi mbakhonda kundivera.

²³Natenepo anthu enewa hanafika tayu m'dziko idadumbira ine kuna makolo awo ile. Nkhabe na mbodzi ene wa anthu, andikhonda ale, anapitave m'dzikomo.

²⁴Nyabasanga Kalebu na thangwi yakuti ana mtima wakusiyana na anzache, pontho kuti ambandivera na mtima onsene, ine ndinati ndimdzese kudziko idazonda iye ile, pontho pidzukulu pyache pinakwata dzikoyo.

²⁵Podi Aamaleki na Akanani akukhala m'maphedi a mwenemo, mangwana mubwerere m'nduli mbamuende kuthando yatchetcha na njira yakwendera ku Nyanza Yakufira.”

²⁶MBUYA adalonga kuna Mose na Aroni mbati,

²⁷“Anthu akudawikawa analeka lini kudungunya kuna ine? Kudungunya kwawo ndakwana nako!

²⁸Natenepo uapange kuti, ‘Ine ninga wamoyo ndikudumbira kuti ndinati ndikuchitireni pinthu pyapempha imwe. Ndalonga tenepo ndine pano, MBUYA.

²⁹Imwe munati mufe, pontho mitembo yanu inati ikhale nadza-nadza m'thando yatchetcha muno. Na thangwi yakuti imwe mwadungunya kuna ine, nkhabe mbodzi wa imwe wakupiringana pyaka makumawiri pyakubalwa

³⁰anati akafike m'dziko idadumbira ine kuti ndinati ndikutawiriseni kuti mukhale kweneko, mbwenye chinchino nkhabe mbodzi pakati panu anati akakhalemo kupambula Kalebu na Yoswa.

³¹Imwe mwalonga kuti ananu anakaphatwamo, mbwenye ine ndinati ndiende nawo m'dziko yakhonda imwe ile, pontho iwo anakhalamo mwakukomerwa.

³²Imwe munafera m'thando yatchetcha muno.

³³Ananu anatsalakatika pyaka makumanayi kusanyika thangwi ya kukhonda khulupirika kwanu, kufikirana munthu wakumalisira wa imwe afe.

³⁴Munati muoneswe nyatwa pyaka makumanayi thangwi ya pyakudawa pyanu. Chaka chibodzi chikuimirira nsiku ibodzi ya nsiku makumanayi pikhazonda imwe dziko ile. Imwe munati mupidziwe kuti kukhonda komerwa kwanga namwe ninji!

³⁵Ndinadumbira kuti penepi ndinapichita kuna imwe anthu akudawika, imwe ale mudagumanyikana pabodzi kupokanyisana na ine. Muno m'thando yatchetcha monsene munati mufe. Ndalonga ndine MBUYA.’ ”

³⁶Amuna akhadatuma Mose kazonda dziko ale adadza na mbiri yakunama ile, adachitisa anthu kuti adungunye kuna MBUYA. Natenepo MBUYA adaagwisira muliri mbafa.

³⁸Gulu ya anthu khumi na awiri adenda kazonda dziko ale, adasala na moyo mbanthu awiri basi, Yoswa na Kalebu.

³⁹Pidapanga Mose Aisraele pinthu pikhadalonga MBUYA pile, anthuwo adasintili pyakwanga.

⁴⁰Bzobzo mangwana mwache na machibese iwo adatoma ulendo kwenda kunthemba ya mapiri ile, uku akulonga kuti, “Chinchino tasasanyika kwenda kudziko idadumbira MBUYA kuna ife ile. Ndimomwene kuti ife tadawa.”

⁴¹Mbwenye Mose adalonga mbati, “Apo thangwi yache ninji mukuthimiza kukhonda kumvera MBUYA. Pinachita imwepyo nee munaganyali napyobi!

⁴²Lekani kwenda thangwi MBUYA hali namwe tayu, tenepo anyamalwanu anati akukundeni.

⁴³Kweneko mungamenyana na Aamaleki pontho Akanani, munati mukafe pankhondo; MBUYA hanakhala pakati panu tayu thangwi imwe mwabauka kubuluka kuna iye.”

⁴⁴Mbwenye iwo adapithemba kwenda kunthemba ya mapiri, podi kwene kuti Bokosi ya Chiverano cha MBUYA pontho na Mose ene adasala kumsasa kule.

⁴⁵Natenepo Aamaleki na Akanani akhakhala kweneko ale adaamenya mbaakunda pontho adaathamangisa mpakana ku Horima.