Read cisena KALEMBERA 15 Bible Online

KALEMBERA 15 - cisena bible

KALEMBERA 15

¹MBUYA adapanga Mose

²kulonga kuna Aisraele kuti: mungafika m'dziko inafuna ine kukupasani ile,

³imwe mwathema kupereka kuna MBUYA ng'ombe imuna, bira wamamuna, bira wamkazi penu mbuzi ninga pyakupereka pyakusasanywa na moto, zile ndi nsembe zakupyerera, penu nsembe zakuchitisa kuti pidadumbira imwe pikwane-kwane, penu ninga chakupereka chakufuna kwa munthu, penu ninga chakupereka pa maphwando anu achipembedzo; khwema ya nsembe zenezi yakusasanywa na moto imbamkomera MBUYA.

⁴Munthu onsene wakupereka kuna MBUYA bira, penu mbuzi kuti ikhale nsembe yakupyerera, athema kudza pontho na ufa wakukwana kilogramu ibodzi wakuvungazwa na mafuta aolivi akukwana tugwe mbodzi ninga chakupereka cha mapira pabodzi pene na vinyu wakukwana tugwe mbodzi padzulu pa nyama yonsene inadza na iye.

⁶Angaperekwa ndi bira wamamuna, ufa wakulemera makilogramu awiri wakuvungazwa na mafuta aolivi akukwana tugwe na theka piperekwe kuna MBUYA ninga chakupereka cha mapira

⁷pabodzi pene na vinyu wakukwana tugwe mbodzi na theka. Khwema ya nsembe zenezi imbamkomera MBUYA.

⁸Ngakhala inaperekwa kuna MBUYA ndi ng'ombe imuna ninga nsembe yakupyerera, penu nsembe kuti ikhale chakupereka chakuchitisa kuti pidadumbira imwe pikwane-kwane, penu nsembe yachiphatizano,

⁹chakupereka cha mapira chakukwana ufa wakunyodoka wakulemera makilogramu matatu wakuvungazwa na matugwe mawiri a mafuta aolivi iperekwa pontho kuna MBUYA

¹⁰pabodzi pene na vinyu wakukwana matugwe mawiri. Chenechi chinakhala chakupereka chakusasanywa na moto kuna MBUYA, khwemache imbamkomera MBUYA.

¹¹Penepi ndiye pyathema kuperekwa pabodzi pene na ng'ombe imuna yonsene, bira wamamuna, bira wamkazi, penu mbuzi.

¹²Podi nyama zakufuna kuperekwa nsembe ziinjipe tani, mbwenye chakupereka chenechi chiperekwe padzulu pa nyama yonsene.

¹³Munthu onsene wakubalwa dzinza ya Israele athema kuchita penepi ngakhala iye akupereka chakupereka chakusasanywa na moto kuna MBUYA chile, khwemache imbamkomera MBUYA.

¹⁴Pontho ngakhala pakati panu pana mlendo ule abwera dzachedza kwene nsiku zingasi penu dzakhaliratu namwe anapereka chakupereka chakusasanywa na moto kuna MBUYA chile, khwemache imbamkomera MBUYA, iye athema kuchita ninga montho munachitira imwemo.

¹⁵Thangwi kutomera lero mpakana mifendu yonsene inadzayo matongero ngonthowo ali pana imwe na alendo akukhala pakati panu. Imwe na iwo ndi sasawa pamaso pa MBUYA;

¹⁶mwambo na matongero ontho-onthowo athema kukoyiwa na imwe pontho na alendo ali pakati panu ale.

¹⁷MBUYA adapanga Mose

¹⁸kulonga kuna Aisraele kuti: mungafika m'dziko inafuna ine kukupasani,

¹⁹ndzidzi onsene unadya imwe phoso ya m'dzikomo imwe mwathema kupambula pang'ono phoso yeneyo kuti ikhale chakupereka chakupambulika kuna MBUYA.

²⁰Mungaphika mikate yanu, mkate wakutoma kuumbwa wa mapira achinchino uperekwe kuna MBUYA ninga chakupereka chakubulukira pa mapira abubuda imwe.

²¹Mifendu yonsene inadzayo mtukwa wenewu wakufunika wathema kuperekwa kuna MBUYA kubulukira pa mkate imbaphika imwe ile.

²²Mbwenye ngakhala munthu unango apichimwana mwasusudewu kuteweza anango mwa matongero adapereka MBUYA kudzera muna Mose,

²³pontho ngakhala m'tsogolo muno dzinza yonsene ya Israele inachimwana kuchita pidatonga MBUYA kudzera muna Mose,

²⁴pontho ngakhala penepi pyachitika mwasusudewu mbapikhonda dziwika kuna dzinza yonsene ile, penepo iwo athema kupereka ng'ombe imuna kuti ikhale nsembe yakupyerera, chile khwemache imbamkomera MBUYA, pabodzi pene na chakupereka cha mapira, pontho chakupereka cha vinyu pyakuthemerana na cha ng'ombe chile. Kuthimizirapo bokho aperekwe kuti akhale nsembe yakubulusira pyakudawa.

²⁵Nyansembe achite mwambo wakuchenesa dzinza yonsene ya Israele, natenepo iwo anati alekerwe pyakudawa pyawopyo, thangwi adapichite mwasusudewu, pontho kuti adadza na chakupereka chakusasanywa na moto kuna MBUYA, pontho na nsembe yakubulusira pyakudawa.

²⁶Dzinza yonsene ya Israele na alendo ene akukhala pakati pawo anati alekererwe pyakudawa pyawo thangwi munthu onsene adapichita mwasusudewu.

²⁷Ngakhala munthu mbodzi adawa mwasusudewu, iye athema kupereka mbuzi ikazi ibodzi ya chaka chibodzi kuti ikhale nsembe yakubulusira pyakudawa.

²⁸Nyansembe achite mwambo paguwa yansembe wakuchenesa nawo munthu wakudawa mwasusudewu ule, natenepo munthuyo anati alekererwe pyakudawa pyachepyo.

²⁹Matongero enewa akulonga kuna munthu onsene, mlendo penu Muisraele, ule adawa mwasusudewu.

³⁰Mbwenye munthu onsene Muisraele penu mlendo anadawa chadala, munthu weneyo ashola MBUYA, natenepo iye athema kuphiwa,

³¹thangwi iye akhonda kuchita pidalonga MBUYA mbadawa chadala matongero ache; kudawa kwache kunagwera iye ene mwenechiro.

³²Pandzidzi ukhali Aisraele m'thando yatchetcha mule, munthu unango adagumanizwa akusaka nkhuni pa Nsiku Yakupuma.

³³Iye adaendeswa kuna Mose, Aroni na kuna dzinza yonsene ya Israele;

³⁴natenepo iye adakoyiwa mwadidi mwakuyang'anirwa thangwi chinthu chakuchita naye munthu weneyu nee chikhadziwika tayu.

³⁵Natenepo MBUYA adalonga kuna Mose mbati, “Munthu weneyo athema kuphiwa; dzinza yonsene ikamphe na miyala kunja kwa msasa.”

³⁶Natenepo dzinza yonsene idamkwata munthu ule mbaenda naye kunja kwa msasa. Kweneko adamponyera miyala mbafa ninga mukhadalongera MBUYA.

³⁷MBUYA adapanga Mose

³⁸kulonga kuna Aisraele kuti: “Sasanyani mavulere pankhomo za nguwo zanu pontho ikhanimo nkhambala yachoza pavulere yonsene. Penepi mupichite mifendu yonsene inadzayo.

³⁹Mavulerewa anakhala ninga chikumbuso, tenepo ndzidzi onsene unaona imwe mavulere, munati mukumbuke matongero anga onsene na kuavera kwene, natenepo nee munabauka kubuluka kuna ine tayu kuteweza manyerezero anu na pikhumbo pyanu tayu.

⁴⁰Mavulerewa anakukumbusani kukoya matongero anga onsene, pontho munakhaladi akupambulika kuna Mulungu wanu.

⁴¹Ine ndine MBUYA Mulungu wanu. Ine ndidakubulusani m'dziko ya Iguputo kuti ndikhale Mulungu wanu. Ine ndine MBUYA Mulungu wanu.”