Read cisena KALEMBERA 16 Bible Online

KALEMBERA 16 - cisena bible

KALEMBERA 16

¹Kora mwana wamamuna wa Izihara wa nkhonda Kohati wa dzinza ya Levi pabodzi pene na anthu atatu a m'dzinza ya Rubeni ale ndi Datani na Abiramu, ale akhali ana achimuna a Eliabu, pontho na Oni, mwana wamamuna wa Peleti; pontho pabodzi pene na Aisraele anango madzana mawiri na makumashanu, akadamu akudziwika adasankhulwa na dzinza yonsene ale, adapandukira Mose.

³Iwo adagumanyikana pamaso pa Mose na Aroni mbalonga kuna iwo mbati, “Imwe onsenewa ngakupambuswa kuna MBUYA, pontho MBUYA ambakhala pakati pa ife tonsene. Mphapo thangwi yache ninji mumbapiikha mwekha ene padzulu pa anthu a MBUYA onsenewa?”

⁴Pidava Mose penepi adapigwisa na fufumimba mbapemphera.

⁵Tenepo adalonga kuna Kora na kuna anyakumtewerache mbati, “Mangwana na machibese MBUYA anati ationese munthu wache, pontho wakupambulika mbani; iye anatawirisa munthu adasankhula iye ule, kuti afike chifupi na iye paguwache ya nsembe.

⁶Mangwana na machibese iwe na anyakutewerako mukwate chakupalira moto, mwenemo muikhemo makala a moto na pyakufukiza pyakununkhira pamotowo. Kubuluka penepo mupikwate muende napyo paguwa yansembe. Munthu wasankhulwa na MBUYA, weneyo ndiye wakupambulika kuna MBUYA. Imwe Alevi ndiye mwapiikha maka padzulu.”

⁷

⁸Mose adathimiza kulonga kuna Kora mbati, “Ngavani imwe Alevi!

⁹Kani imwe mukuchiyesa chakuchepa kuti Mulungu wa Israele adakupambulani pakati pa Aisraele anango onsene, towera imwe mufike naye chifupi kuphata basanu m'Chikhumbi cha Mulungu, pontho kuimira pamaso pa dzinza yonsene kuatumikira?

¹⁰Iye akutawirisani kuti imwe pabodzi pene na Alevi anzanu onsene mukhale na chilemedzo chenechi. Kwache lero imwe munafuna kukwata pontho na unyansembe ene!

¹¹Pinachita iwe pabodzi pene na anyakutewerako nkhupandukira MBUYA. Aroni mbanimbo kuti imwe mudungunye kuna iye?”

¹²Tenepo Mose adachemeresa Datani na Abiramu ana achimuna a Eliabu. Mbwenye iwo adatawira mbati, “Ife sinadzako tayu!

¹³Ayi kutibulusa kwachita iwe m'dziko yamphonje ya Iguputo kudza nafe kuno kuti utiphe m'thando yatchetcha muno pidakwane tayu? Apo ukufuna pontho kuti ukhale mbuyathu basi?

¹⁴Pontho iwe nee watifikisa m'dziko yamphonje, penu kutipasa minda na minda yamfesa kukhala yathu ene tayu. Apo lero ukufuna kutinyengeza? Nkhabe, ife nee tinadzakobi!”

¹⁵Mose adazhangali mbalonga kuna MBUYA mbati, “Lekani tawira na pyakupereka pyene pinadza na anthu enewa. Ine nee ndadawira munthu na mbodzi ene wa iwo tayu, pontho nee ndaakwatira mabulu awo na mbodzi ene tayu.”

¹⁶Mose adalonga kuna Kora mbati, “Mangwana iwe pabodzi pene na anyakutewerako madzana mawiri na makumashanuwa mwathema kudza pamaso pa MBUYA; Aroni anakhalambo penepo.

¹⁷Munthu onsene wa imwe anakwata chakupalira moto mbaikha pyakufukiza pyakununkhira padzulu pachepo kwenda kapipereka paguwa yansembe.”

¹⁸Natenepo munthu onsene adakwata chakupalira moto chache mbaikhamo makala a moto pontho pyakufukiza pyakununkhira pamotowo. Kubuluka penepo adaimira pamsuwo wa Chikhumbi cha Mulungu chile pabodzi pene na Mose pontho Aroni.

¹⁹Tenepo Kora adagumanyisa dzinza yonsene ya Israele mbaimira pamsuwo wa Chikhumbi cha Mulungu kuyang'ana Mose pontho Aroni. Vumbu-vumbu demelero ya MBUYA idaoneka pana dzinza yonsene ile,

²⁰tenepo MBUYA adalonga kuna Mose na Aroni mbati,

²¹“Fundukirani m'nduli kubuluka kuna anthu enewa, towera onsenewa ndiamaliletu kuavunga kabodzi na kabodzi.”

²²Mbwenye Mose na Aroni adapigwisa na fufumimba mbalonga mbati, “Sha, Mulungu imwe ndimwe phata ya moyo wa anthu onsene. Kadi munthu mbodzi angadawa mumbazhangalira dzinza yonsene ya anthu?”

²³MBUYA adalonga kuna Mose mbati,

²⁴“Apange anthu kuti afundukire kutali na makumbi a Kora, Datani na Abiramu.”

²⁵Tenepo Mose pabodzi pene na akadamu a Aisraele adenda kuna Datani na Abiramu.

²⁶Iye adalonga kuna anthu mbati, “Fundukirani kutali na makumbi a anthu akudawikawa, pontho lekani khuya chinthu na chibodzi chene cha anthu enewa, gopesera munatswairwa kubodzi na anthu enewa thangwi ya pyakudawa pyawo pyonsene.”

²⁷Natenepo anthu adafundukiradi kutali na makumbi a Kora, Datani na Abiramu. Datani na Abiramu akhadabuluka panja mbaimira pamsuwo wa makumbi awo pabodzi pene na anawo pontho akazawo.

²⁸Mose adalonga kuna anthu onsene mbati, “Mwenemu ndiye munafunira imwe kudziwa kuti MBUYA ndiye adandituma kudzaphata mabasa onsenewa, pontho kuti si kufuna kwanga kuchita penepyo tayu.

²⁹Ngakhala anthu enewa anafa ninga mumbaferambo anthu onsene, nee mwakuchita kutchunyuswa na Mulungu tayu, penepo si MBUYA adandituma tayu.

³⁰Mbwenye ngakhala MBUYA anachita chinthu chitswa chakuti chipo nee chidzati vekabi, pontho mataka angang'ambika mbaakhudyula onsene pabodzi pene na pinthu pyawo pyonsene, towera aende amoyo kudziko ya anyakufa, penepo munati mudziwe kuti anthu enewa akhonda MBUYA.”

³¹Sindzidzi pikhadamala iye kulonga, pamataka pale pakhadaponda Datani na Abiramu padang'ambika.

³²Dziko idayashamula mbikhudyula amuna onsene ale pabodzi pene na mabanjawo pontho na onsene anyakutewera Kora na pinthu pyawo pene.

³³Natenepo iwo adatchithira m'dziko ya anyakufa pabodzi pene na pinthu pyawo pyonsene uku ana moyo. Mataka ale adaafungira kubwerera m'mbuto mwache, tenepo iwo hadaonekeve tayu.

³⁴Aisraele onsene akhali penepo ale, adathawa pidava iwo kulira kwa anthu ale. Iwo adakhuwa mbati, “Thawani gopesera dziko inatikhudyulira kubodzi nawo.”

³⁵Tenepo MBUYA adatumiza moto mbupisa na kupyereza amuna madzana mawiri na makumashanu akhadapereka pyakufukiza pyakununkhira kuna MBUYA ale.

³⁶Tenepo MBUYA adalonga kuna Mose mbati,

³⁷“Panga Eleazara mwana Aroni nyansembe kuti abuluse pyakupalira moto pyankuwa kubulukira pa pinthu pyakusalira pya amuna adamala pyerera ale, pontho ukwate makalawo uende nawo kaataya kutali mwakuchita kuawaza, thangwi pyakupalira motopyo mphyakupambulika.

³⁸Ipyo pidasanduka pyakupambulika mudaperekwa ipyo paguwa yansembe ya MBUYA. Natenepo ukwate pyakupalira moto pya amuna adafa thangwi ya kudawa kwawo ale mbupifule kuti pikhale pyakuphaphathika pyakugudumira napyo paguwa yansembe. Penepi pikhali chidziwiso kucheuza Aisraele.”

³⁹Natenepo Eleazara nyansembe adakwata pyakupalira moto pile mbapifula kukhala pyakuphaphathika pyakugudumira napyo paguwa yansembe.

⁴⁰Penepi pikhali chidziwiso kucheuza Aisraele kuti munthu okhonda khala chidzukulu cha Aroni aleke kudza chifupi na guwa yansembe kudzapereka pyakufukiza pyakununkhira kuna MBUYA, gopesera kuti iye anavungika ninga mudachitira Kora na anyakumtewerache. Pyonsenepi pidachitika ninga montho mudalongera MBUYA kuna Eleazara kudzera muna Mose.

⁴¹Mangwana mwache dzinza yonsene ya Israele adadungunya kuna Mose, pontho Aroni mbalonga mbati, “Imwe mwapha anthu a Mulungu.”

⁴²Pidamala iwo gumanyikana pabodzi kupokanyisana na Mose pontho Aroni, iwo adazungunuka kuyang'ana ku Chikhumbi cha Mulungu mbaona kuti Chikhumbicho chikhadagudumirwa na makole, pontho kuti demelero ya MBUYA ikhadaonekera.

⁴³Mose na Aroni adenda kweneko mbakaimira kumsuwo wa Chikhumbi cha Mulungu chile.

⁴⁴Tenepo MBUYA adalonga kuna Mose mbati,

⁴⁵“Imira kutali na anthu enewa, towera onsenewa ndimale kuavunga kabodzi na kabodzi.” Onsene uwiriawo adapigwisa na fufumimba,

⁴⁶tenepo Mose adalonga kuna Aroni mbati, “Kwata chakupalira moto chako, uikhemo makala a moto akubulukira pa guwa yansembe, pontho pamakalapo uikhepo pyakufukiza pyakununkhira. Ungamala penepo uchimbize kwenda napyo kuna Aisraele kuti ukachite mwambo wakuachenesa. Chimbiza thangwi kuzhangali kwa MBUYA kwafika kale, pontho muliri watoma kale pakati pa anthu.”

⁴⁷Aroni adavera mbakwata chakupalira moto chache mbathamanga kwenda nacho pakati pa anthu adagumanyikana ale. Pidaona iye kuti muliri watoma kale adaikha pyakufukiza pyakununkhira pile pamakala a moto ale mbachita mwambo wakuchenesa nawo anthu ale.

⁴⁸Iwo adaimira pakati pa anyakufa na amoyo. Penepi pidachitisa kuti muliri ule umale.

⁴⁹Konta ya anthu adafa na muliri wenewu ikhali pikwi khumi na pinayi pontho na madzana manomwe. Kupambula ale adafa thangwi ya kupandukira kwa Kora.

⁵⁰Pikhadamala muliri ule, Aroni adabwerera kuna Mose pamsuwo wa Chikhumbi cha Mulungu.