Read cisena KALEMBERA 17 Bible Online

KALEMBERA 17 - cisena bible

KALEMBERA 17

¹MBUYA adalonga kuna Mose mbati,

²“Panga Aisraele kuti akupase ndodo khumi na ziwiri, mkadamu onsene wa dzinza ndodo yache. Pandodo yonsene ya munthu ulembepo dzinache,

³pontho pandodo ya dzinza ya Levi ulembepo dzina ya Aroni thangwi mkadamu onsene wa dzinza athema kukhala na ndodo ibodzi.

⁴Zikwate kwenda nazo ku Chikhumbi changa mbukaziikhe patsogolo pa Bokosi ya Chiverano kumbagumanikana iwe na ine kule.

⁵Tenepo ndodo ya munthu asankhula ine inaphwitha. Na njira yeneyi ndinachitisa kuti kudungunya kokhonda mala kwa Aisraele mwakupokanyisana na iwe kumale.”

⁶Natenepo Mose adapilonga kuna Aisraele, tenepo akadamu awo onsene adapereka ndodo zawo kuna Mose, kada dzinza ndodo ibodzi mwakuti ndodo zonsene pabodzi zikhali khumi na ziwiri. Ndodo ya Aroni ikhalimbo pabodzi na zinango zile.

⁷Kubuluka penepo Mose adakwata ndodo zonsene zile mbakaziikha m' Chikhumbi cha Mulungu patsogolo pa Bokosi ya Chiverano.

⁸Mangwana mwache pidapita Mose m'Chikhumbi cha Mulungu chile, adaona kuti ndodo ya Aroni yakuimirira dzinza ya Levi ikhadaphwitha mbionesa maluwa mbibala nsapo zamfula zakutokota kale.

⁹Mose adakwata ndodo zonsene zile mbazionesa kuna Aisraele. Iwo adaona pinthu pikhadachitikapyo, tenepo mkadamu onsene adakwata ndodo yache.

¹⁰MBUYA adalonga kuna Mose mbati, “Bwezera ndodo ya Aroni patsogolo pa Bokosi ya Chiverano. Yeneyi yathema kukoyiwa kuti icheuze anyakupandukira kuti iwo angakhonda kuleka kudungunya mwakupokanyisana na iwe, anati afe.”

¹¹Mose adachitadi ninga montho mudampangira MBUYA.

¹²Aisraele adalonga kuna Mose mbati, “Tinati tife! Tinati tivungike, tonsene tinamala vungika.

¹³Podi munthu onsene ule anafika chifupi na Chikhumbi cha Mulungu anati afe. Ayi tonsene tinamala kufa?”