Read cisena KALEMBERA 18 Bible Online

KALEMBERA 18 - cisena bible

KALEMBERA 18

¹MBUYA adalonga kuna Aroni mbati, “Kudawa konsene kunafuna dzachitwa pakutumikira m' Chikhumbi cha Mulungu kunagwera iwe, anako na Alevi. Mbwenye kudawa konsene kunafuna dzachitwa pakutumikira kwanu ninga nyansembe kunagwera iwe pabodzi pene na anako.

²Dza nawo muno abale ako dzinza ya Levi kuti uphate nawo pabodzi basa pontho kuti akuphedze ndzidzi unatumikira iwe na anako m'Chikhumbi cha Mulungu.

³Iwo athema kukuphedza pontho kuphata mabasa onsene a m'Chikhumbi cha Mulungu. Kwache iwo aleke khuya chinthu na chibodzi chene m'Mbuto Yakuchena penu paguwa yansembe. Ngakhala iwo anapichita, monsenene iwo na imwe ene munati mufe.

⁴Iwo athema kuphata basa pabodzi na iwe pontho aphate mabasawo onsene a m'Chikhumbi cha Mulungu. Kwache leka kuphata basa na munthu okhonda thema pabasa yeneyi.

⁵Iwe wekha pabodzi na anako mwathema kuyang'anira Mbuto Yakuchena na guwa yansembe, towera kuzhangali kwanga kuleka dzaafikira pontho Aisraele.

⁶Ine ene pano ndidasankhula abale ako dzinza ya Alevi pakati pa Aisraele onsene kukhala mtukwako. Iwo ngakupambulika kuna ine towera akwanise kuphata mabasawo m'Chikhumbi changa.

⁷Mbwenye iwe wekha pabodzi na anako ene basi mwathema kuphata basa yonsene ya unyansembe, ile nkhuyang'anira guwa yansembe na pinthu pya m'Mbuto Yakuchenesesa. Penepi ndiye pyanu pinafuna imwe kuyang'anira, thangwi ine ndakupasani mtukwa wa unyansembe. Munthu onsene okhonda thema pabasa yeneyi angafika kwene chifupi na pinthu pyakupambulika anati aphiwe.”

⁸MBUYA adalonga kuna Aroni mbati, “Ine ndakupasa utongi papinthu pyakuperekwa kuna ine; pyakupereka pyakupambulika pyonsene pimbandipasa Aisraele ndikupiperekambo kuna iwe na anako ninga khundu yako ndzidzi onsene.

⁹Iwe wathema kukwata khundu yako pa pyakupereka pyakupambulikaletu penu mphyakupereka pya mapira, penu nsembe zakupagalira pyakudawa, penu nsembe zakubulusira pyakudawa. Khundu yeneyo nja iwe na anako.

¹⁰Upidyere m'mbuto yakupambulika; mamuna onsene anakwanisa kupidya. Iwe wathema kupiyesa pyakupambulika.

¹¹“Chinthu chonsene chakupambuliwa kubulukira pa mitukwa ya Aisraele yakuperekwa kuna ine mphyako. Penepi ndikupipereka kuna iwe na anako achimuna na achikazi ndzidzi onsene unadzawo. Munthu onsene wa pabanja pako wakuchena pamaso pa MBUYA anakwanisa kudya penepi.

¹²“Ine ndikukupasa mbewu zonsene zadidiletu zakutoma kutokota zimbadza na iwo ku Chikhumbi cha Mulungu kudzapereka kuna ine chaka na chaka zile. Penepi ndi: mafuta aolivi, vinyu na mapira.

¹³Pyonsenepi mphyako. Munthu onsene wa pabanja pako wakuchena pamaso pa MBUYA anakwanisa kudya.

¹⁴“Pinthu pyonsene m'dziko ya Israele, pile pyaperekwa kuna ine mphyako.

¹⁵“Munthu onsene wautombo penu ndi nyama, ule apereka Aisraele kuna ine ngwako. Kwache mwanache wautombo na nyamache yakutoma kubalwa, ile njokhonda chena pamaso pa Mulungu pyathema kuombolwa.

¹⁶Mwana wakukwanisa mwezi ubodzi anakwanisa kuombolwa na konta yakukhazikika ya mapindi mashanu asiliva malingana na mdidache wa nsiku na nsiku,

¹⁷mbwenye mwana wakutoma kubalwa wa ng'ombe, mabira na mbuzi mbapileke kupiombola. Penepi mphyanga basi, pontho pyathema kuperekwa nsembe. Chiropa chawo uchitayire paguwa yansembe. Mafuta a nyamazo uapyereze ninga chakupereka chakusasanywa na moto; khwemacheyo imbamkomera MBUYA.

¹⁸Mbwenye nyama ya pabele, ya pamwendo wakuthako wamadyo yakubulukira pa chakupereka chakupambulika chile mphyako.

¹⁹“Ndikupereka kuna iwe, anako achimuna na achikazi mifendu yonsene inadzayo, pinthu pyonsene pyakupambulika pyakuperekwa na Aisraele kuna ine. Chenechi ntchiverano chokhonda mala chachita ine na iwe pontho na pidzukulu pyakochi.”

²⁰MBUYA adalonga kuna Aroni mbati, “Iwe nkhabe dzakhala na chinthu chako chene tayu, pontho nkhabe khundu ibodzi ya dziko inafuna dzaperekwa kuna iwe tayu. Ine MBUYA ndine pyakusowa pyako pyonsene.”

²¹MBUYA adalonga mbati, “Chakhumi chonsene chinapereka Aisraele kuna ine ndachiperekambo kuna Alevi. Chenechi ndiye chinafuna dzapagalwi iwo thangwi ya kuphata basa yakuyang'anira Chikhumbi cha Mulungu.

²²Aisraele anangowo aleke fika chifupi na Chikhumbi cha Mulungu gopesera anapidzesera okha ene imfa thangwi ya pyakudawa pyawo.

²³Kutomera lero kwenda m'tsogolo Alevi okha basi ndiye anafuna kuyang'anira Chikhumbi cha Mulungu na kuphatamo basa yonsene, pontho chinthu chonsene chinafuna dzachitika mwenemo anafuna dzavunzwa ndiwo. Enewa ndi matongero akukhazikika kuna iwe na pidzukulu pyako pene. Alevi nkhabe dzakhala na chinthu chawo chene mu Israele tayu,

²⁴thangwi ndaapasa chakhumi chonsene chimbapereka Aisraele kuna ine ninga chakupereka chakupambulika kuti chikhale chawo. Ndi thangwi yache ndidaapanga kuti iwo hanakhala na chinthu chawo chene mu Israele tayu.”

²⁵MBUYA adapanga Mose

²⁶kulonga kuna Alevi mbati, “Mungatambira chakhumi chidakupasani ine kuti chikhale chanu kubulukira kuna Aisraele mwathema kuperekambo chakhumi chache kuna MBUYA ninga chakupereka chakupambulika kuna MBUYA.

²⁷Chakupereka chakupambulikachi chinayeswa sasawa na chakupereka chimbapereka nyakulima pa mapira a chinchino na vinyu wachinchino.

²⁸Na njira yeneyi imwe munaperekambo chakupereka chakupambulika kuti chikhale cha MBUYA kubulukira pa chakhumi chonsene chinatambira imwe kubulukira kuna Aisraele. Imwe mwathema kupereka penepi kuna Aroni nyansembe kuti pikhale pya MBUYA.

²⁹Perekani pyadidiletu pinatambira imwepyo.

³⁰Mungapereka khundu yadidiletuyo, pyonsene pinasalapyo munakwanisa kupikoya ninga mumbachitira nyakulima kukoya pyonsene pyakusalira angamala pereka chakupereka chache kuna MBUYA.

³¹Imwe na mabanjanu munakwanisa kudyera pyakusalira pyonsene ponsene panafuna imwe thangwi kweneko nkhupagalwi kwanu thangwi ya kuphata basa m'Chikhumbi cha Mulungu.

³²Ngakhala imwe munaperekambo khundu yadidiletu pyakwanga kuna Mulungu imwe nee munadawa tayu mungapidya. Kwache onesesani kuti nee mwaswipisa mtukwa wakupambulika wa Aisraele pakudya mitukwayo mbamudzati pereka kuna MBUYA khundu yadidiletu. Ngakhala munapichita munati muphiwe.”