Read cisena KALEMBERA 19 Bible Online

KALEMBERA 19 - cisena bible

KALEMBERA 19

¹MBUYA adapanga Mose na Aroni

²kuti apereke matongero awa kuna Aisraele: Dzani na ng'ombe ikazi yakufira kuna Mose na Aroni yakusowa chilema, pontho yakuti chipo nee idzati thukula goli tayu.

³Tenepo iwo anaipereka kuna Eleazara nyansembe; ng'ombe mbiendeswe kunja kwa msasa mbichekwa pamaso pache.[9]

⁴Kubuluka penepo Eleazara akwate chiropa cha ng'ombeyo pang'ono mbachiwaza na chala chache chakunkhope kwa Chikhumbi cha Mulungu kanomwe.

⁵Nyama yonsene yamumphu, penu nthembe, mnofu, chiropa na matumbo pipiswe pamaso pa nyansembe.

⁶Kubuluka penepo akwate pang'ono muti wamkungudza, hisope na nkhambala yakufira mbapiponya pamoto.

⁷Angamala penepo afule nguwo zache, asambe manungo ache onsene, natenepo iye anakwanisa kapita mumsasa mule; kwache iye anakhala okhonda chena basi pamaso pa Mulungu mpakana mawulo.

⁸Nyakupisa ng'ombeyo athema kufulambo nguwo zache na kusamba manungo ache onsene, kwache iye anakhala okhonda chena mpakana mawulo.

⁹Natenepo munthu wakuchena pamaso pa Mulungu atswaire dotha ya ng'ombe ile, pontho akaiikhe pambuto yakupambulika kunja kwa msasa, kule kwathema iyo kukoyiwa kuti Aisraele aphatise basa kusasanya madzi akubulusira nawo pinthu pyokhonda chena pamaso pa Mulungu. Wenewu ndi mwambo wakupichenesa wakubulusira pyakudawa.

¹⁰Nyakutswaira dothayo athema kufula nguwo zache, kwache anakhala munthu okhonda chena basi mpakana mawulo. Mwambo wenewu ngwakukhala na kukhala kuna Aisraele na kuna alendo akukhala pakati pawo.

¹¹Munthu onsene anakhuya mtembo anakhala okhonda chena nsiku zinomwe.

¹²Iye athema kupichenesa yekha ene na madzi akuchenesa munthu pansiku yachitatu na yachinomwe, angamala penepo iye anakhala wakuchena. Mbwenye ngakhala hanapichenesa yekha ene tayu pansiku yachitatu na yachinomwe iye nkhabe dzakhala wakuchena pamaso pa Mulungu tayu.

¹³Munthu onsene wakukhuya mtembo mbakhonda kupichenesa yekha ene anakhala okhonda chena basi, thangwi iye hadasambiswe tayu na madzi akuchenesa munthu. Iye ambaswipisa Chikhumbi cha Mulungu, natenepo iye nkhabe dzayeswave ninga mbodzi wa anthu a Mulungu tayu.

¹⁴Munthu angafera m'khumbi, munthu onsene ali m'khumbimo pandzidzi unafa munthuyo penu anapita m'khumbiyo pandzidzi wenewu, ambasanduka okhonda chena pamaso pa Mulungu nsiku zinomwe.

¹⁵Pyombo pyonsene pya m'khumbimo pyakusowa mphampha[10] pimbasandukambo pyakukhonda chena.

¹⁶Ngakhala munthu anakhuya munthu wakuchita kuphiwa penu wakufa ninga mumbaferambo anthu anango onsene penu kukhuya gogodo a munthu penu nthumbi, iye anasanduka okhonda chena nsiku zinomwe.

¹⁷Kuti kukhonda chena kubuluke, dotha pang'ono ya ng'ombe ikazi idapiswa kuti ibuluse pyakudawa ile, ikwatwe mbiikhwa m'chitomba. M'chitombamo muikhwe pontho madzi adidi.

¹⁸Kubuluka penepo munthu onsene wakuchena pamaso pa Mulungu, akwate hisope pang'ono, amvike madzi mbawazira m'khumbimo na pyonsene pili mwenemo, pontho na anthu ene akhali mwenemo ale. Iye athema kuwazira pontho munthu onsene wakukhuya gogodo ya munthu wakufa penu nthumbi penu munthu wakuchita kuphiwa, penu wakufa ninga mumbaferambo anthu anango onsene.

¹⁹Pansiku yachitatu na yachinomwe munthu wakuchena awazire madzi ale pana munthu okhonda chena ule. Pansiku yachinomwe achite mwambo wakumchenesa. Munthu wakucheneswayo athema kufula nguwo zache na kusamba manungo ache onsene, tenepo nsiku yeneyo dzuwa ingathobila anakhala wakuchena.

²⁰Mbwenye ngakhala munthu okhonda chenayo anakhonda kupichenesa yekha ene, weneyo anakhala okhonda chena basi, thangwi iye hadasambiswe tayu na madzi akuchenesa munthu. Iye ambaswipisa Chikhumbi cha Mulungu, natenepo iye nkhabe dzayeswave ninga mbodzi wa anthu a Mulungu tayu.

²¹Imwe mwathema kukoya matongero enewa kutomera lero kwenda m'tsogolo. Nyakuwaza madzi akuchenesa munthu athema kufula nguwo zache; munthu onsene wakuphata madzi enewo anakhala okhonda chena mpakana mawulo.

²²Chinthu chonsene chinaphata munthu okhonda chena chinasanduka chokhonda chenambo pontho na munthu onsene wakuphata chokhonda chenecho, anakhalambo okhonda chena mpakana mawulo.