Read cisena KALEMBERA 2 Bible Online

KALEMBERA 2 - cisena bible

KALEMBERA 2

¹MBUYA adalonga kuna Mose na Aroni mbati,

²“Aisraele athema kumanga makumbi awo mwakuzungulira Chikhumbi cha Mulungu, kwache amange kutali pang'ono na Chikhumbichi. Munthu onsene athema kukhala pansi pa bandera ya banjache.”

³Kukhundu yakumabulukiro dzuwa kunakhala magulu a dzinza ya Yuda pansi pa banderawo. Mkadamu wa dzinza ya Yuda ndi Nashoni mwana wamamuna wa Aminadabu.

⁴Konta ya gulu yache ikhali pikwi makumanomwe na pinayi na madzana matanthatu.

⁵Dzinza ya Isakara imange makumbi awo chifupi na dzinza ya Yuda. Mkadamu wa dzinza ya Isakara ndi Netanele mwana wamamuna wa Zuari.

⁶Konta ya gulu yache ikhali pikwi makumashanu na pinayi na madzana manayi.

⁷Dzinza ya Zebuloni imange makumbi awo chifupi na dzinza ya Isakara. Mkadamu wa dzinza ya Zebuloni ndi Eliabu mwana wamamuna wa Heloni.

⁸Konta ya gulu yache ikhali pikwi makumashanu na pinomwe na madzana manayi.

⁹Konta ya anthu onsene akhali pansi pa bandera ya Yuda malingana na magulu awo ale, akhalipo pikwi dzana na makumasere na pitanthatu na madzana manayi. Anthu enewa athema kutoma kutsogola pamulikiti.

¹⁰Kukhundu yakumwera kunakhala magulu pansi pa bandera ya Rubeni. Mkadamu wa dzinza ya Rubeni ndi Elizuri mwana wamamuna wa Shedeuri.

¹¹Konta ya gulu yache ikhali pikwi makumanayi na pitanthatu na madzana mashanu.

¹²Dzinza ya Simioni imange makumbi awo chifupi na dzinza ya Rubeni. Mkadamu wa dzinza ya Simioni ndi Shelumiele mwana wamamuna wa Zurishadai.

¹³Konta ya gulu yache ikhali pikwi makumashanu na pifemba na madzana matatu.

¹⁴Dzinza ya Gadi imange makumbi awo chifupi na dzinza ya Simioni. Mkadamu wa dzinza ya Gadi ndi Eliasafu mwana wamamuna wa Deuele.

¹⁵Konta ya gulu yache ikhali pikwi makumanayi na pishanu na madzana makumatanthatu na makumashanu.

¹⁶Konta ya anthu onsene akhali pansi pa bandera ya Rubeni malingana na magulu awo ikhali pikwi dzana na makumashanu na chibodzi na madzana makumanayi na makumashanu. Gulu yeneyi inakhala yachiwiri kwenda pamulikiti m'nduli mwa gulu yakutoma.

¹⁷Alevi athema kuthukula Chikhumbi cha Mulungu mbafamba pakati pa magulu onsene. Gulu yonsene inaenda panyandandandache pamulikiti sasawa ninga mumbachitira iwo angamanga makumbi awo pambuto pache pansi pa banderawo.

¹⁸Kukhundu yakumadokero dzuwa kunakhala magulu pansi pa bandera ya Eferemu. Mkadamu wa dzinza ya Eferemu ndi Elishama mwana wamamuna wa Amihudi.

¹⁹Konta ya gulu yache ikhali pikwi makumanayi na madzana mashanu.

²⁰Dzinza ya Manase imange makumbi awo chifupi na dzinza ya Eferemu. Mkadamu wa dzinza ya Manase ndi Gamaliele mwana wamamuna wa Pedazuri.

²¹Konta ya gulu yache ikhali pikwi makumatatu na piwiri na madzana mawiri.

²²Dzinza ya Benjemani imange makumbi awo chifupi na dzinza ya Manase. Mkadamu wa dzinza ya Benjemani ndi Abidani mwana wamamuna wa Gideoni.

²³Konta ya gulu yache ikhali pikwi makumatatu na pishanu na madzana manayi.

²⁴Konta ya anthu onsene akhali pansi pa bandera ya Eferemu malingana na magulu awo ikhali pikwi dzana na pisere na dzana ibodzi. Gulu yeneyi inakhala yachitatu kwenda pamulikiti.

²⁵Kukhundu yakumpoto kunakhala magulu pansi pa bandera ya Dani. Mkadamu wa dzinza ya Dani ndi Ahiezere mwana wamamuna wa Amishadai.

²⁶Konta ya gulu yache ikhali pikwi makumatanthatu na piwiri na madzana manomwe.

²⁷Dzinza ya Asheri imange makumbi awo chifupi na dzinza ya Dani. Mkadamu wa dzinza ya Asheri ndi Pagiele mwana wamamuna wa Okarani.

²⁸Konta ya gulu yache ikhali pikwi makumanayi na chibodzi na madzana mashanu.

²⁹Dzinza ya Nafitali imange makumbi awo chifupi na dzinza ya Asheri. Mkadamu wa dzinza ya Nafitali ndi Ahira mwana wamamuna wa Enani.

³⁰Konta ya gulu yache ikhali pikwi makumashanu na pitatu na madzana manayi.

³¹Konta ya anthu onsene akhali pansi pa bandera ya Dani malingana na magulu awo ikhali pikwi dzana na makumashanu na pinomwe na madzana matanthatu. Gulu yeneyi inakhala yakumalisira kwenda pamulikiti.

³²Enewa mba Aisraele, ale adalengeswa malingana na mabanjawo. Anthu onsene, ale akhali mumsasa malingana na magulu awo akhali pikwi madzana matanthatu na pitatu na madzana mashanu na makumashanu.

³³Kwache dzinza ya Levi hidalengeswe pabodzi na Aisraele anango onsene tayu ninga montho mudalongera MBUYA kuna Mose.

³⁴Tenepo Aisraele adachita pyonsene pidalonga MBUYA kuna Mose; mwenemu ndi mule mudamangira iwo makumbi awo pansi pa banderawo, pontho na mule mukhabuluka iwo kwenda kamanga msasa, munthu onsene mbumbache na banjache.