Read cisena KALEMBERA 20 Bible Online

KALEMBERA 20 - cisena bible

KALEMBERA 20

¹Mwezi wakutoma dzinza yonsene ya Israele idadza pathando yatchetcha ya Zini mbamanga msasawo pa Kadeshi. Miriamu adafera kweneko mbaikhwa m'masiye.

²Pakhadamanga iwo msasa pale pakhali nkhabe madzi, natenepo anthu adagumanyikana mwakumzungulira Mose na Aroni

³mbatoma kudungunya mbati, “Mphyadidi mbatidafa pyathu pabodzi na Aisraele anzathu, ale adafa chifupi na Chikhumbi cha Mulungu.

⁴Chatikwatira iwe kudza nafe m'thando yatchetcha muno ninji? Ayi chikhafuna iwe ntchakuti ife tifere muno pabodzi pene na nyama zathuzi basi?

⁵Chidatibulusira iwe mu Iguputo mule ninji mbudza nafe pambuto yakusowa basayi yakuti nkhabe chinthu na chibodzi chene chinakwanisa kumerapo tayu? Mapira nkhabepo, makuyu nkhabepo, mipesa nkhabepo, pontho mtheme nkhabepo. Na madzi ene akumwa nkhabe pontho!”

⁶Mose na Aroni adabuluka pakhali anthu pale mbakaimira pamsuwo wa Chikhumbi cha Mulungu. Iwo adalamba, tenepo demelero ya MBUYA idaonekera kuna iwo.

⁷MBUYA adalonga kuna Mose mbati,

⁸“Kwata ndodo ili patsogolo pa Bokosi ya Chiveranoyo, kubuluka penepo iwe na Aroni mugumanyise dzinza yonsene ya Israele. Longa kuna mwalawo pamaso pa anthu onsene, tenepo m'mwalamo munabuluka madzi. Kubulukira m'mwala wenewu iwe unadzesa madzi kudzesera dzinza yonsene ya Israele kuti iwo na pifuyo pyawo amwe.”

⁹Natenepo Mose adenda kakwata ndodo ile ninga montho mukhadalongera MBUYA.

¹⁰Iye na Aroni adagumanyisa dzinza yonsene ya Israele patsogolo pa mwala. Tenepo Mose adalonga mbati, “Ngavani kuno imwe anthu akupandukira! Kadi munafuna tikubulusireni madzi m'mwalamu?”

¹¹Tenepo Mose adathukula ndodo ile mbamenya nayo mwala ule kawiri. Tenepo madzi mazinji adabuluka m'mwala mule, anthu onsene pabodzi na pifuyo pyawo adamwa.

¹²Mbwenye MBUYA adalongera Mose na Aroni mbati, “Na thangwi yakuti hamudandikhulupire pontho hamudandilemedza pamaso pa anthu a Israele tayu kuti ndine wakuchena, imwe nkhabe dzatsogolera anthuwa kupita nawo m'dziko idadumbira ine kuti ndinaapasa.”

¹³Penepi pidachitika pa Meriba,[11] pale pakhadungunya Aisraele mwakupokanyisana na MBUYA, pontho pale padaonesa MBUYA kuti iye ngwakuchena.

¹⁴Mose adatuma anyamphangwa kubulukira ku Kadeshi kwenda kuna mfumu wa ku Edomu. Iwo adalonga kuna mfumu ule mbati, “Mphangwa izi zakubulukira kuna abale anu madzinza a Israele. Imwe mukudziwa nyatwa zonsene zaona ife;

¹⁵mule mudenda makolo athu ku Iguputo kule kudakhala ife pyaka pizinji. Aiguputo adavuya makolo athu pabodzi pene na ife,

¹⁶natenepo ife tidalira kuna MBUYA kuti atiphedze. Iye adavadi kulira kwathu mbatuma mngelo kudzatibulusa m'dziko ya Iguputo. Chinchino tili pano pa Kadeshi luwani ya kunkhomo kwa madire a nthembanu.

¹⁷Taphata miyendo titawirisenimbo ife kugwanda na m'dziko mwanumu. Ife na pifuyo pyathu nkhabe dzasiya msewu, penu kupita m'minda mwanu, penu m'minda yanu yamfesa, pontho nee tinamwa madzi a m'michera wanu tayu. Ife tinateweza kwene msewu ukulu[12] basi mpakana tiwambuke madire anu.”

¹⁸Mbwenye anthu a ku Edomu adatawira mbati, “Ife takhonda kukutawirisani kugwanda na m'dziko mwathu muno! Mungapiyesera kwene ife tinadza mbatichita namwe nkhondo.”

¹⁹Aisraele adalonga mbati, “Ife tinatewera kwene msewu ukuluwu basi. Ngakhala ife penu pifuyo pyathu pinamwa madzi anu, tinati tikupagalini. Chinafuna ife nkhugwanda kwene basi m'dziko mwanumu.”

²⁰Anthu a ku Edomu adalonga kachiwiri mbati, “Ife nyonyo, takhonda!” Tenepo iwo adadza na gulu ikulu pontho yamphamvu ya anyankhondo mbamenya nkhondo na Aisraele.

²¹Na thangwi yakuti anthu a ku Edomu hadatawirise anthu a Israele kugwanda na m'dziko mwawo, Aisraele adabwerera mbaenda na njira inango.

²²Dzinza yonsene ya Israele idabuluka pa Kadeshi mbakafika paphiri ya Hori,

²³m'madire a Edomu. Kweneko MBUYA adalonga kuna Mose na Aroni mbati,

²⁴“Aroni hanakapita m'dziko idadumbira ine kuna Aisraele; iye anati afe, thangwi imwe uwirianu mudandipandukira pakukhonda kuvera matongero anga pa Meriba.

²⁵Kwata Aroni na mwanache Eleazara ukwire nawo phiri ya Horiyi.

²⁶Dula nguwo za Aroni mbuzivazike mwanache Eleazara thangwi Aroni anakafera kweneko.”

²⁷Mose adachita pidampanga MBUYA pile. Iwo adakwira paphiri ya Hori ile anthu onsene a Israele akuona,

²⁸tenepo Mose adamdulisa Aroni nguwo za unyansembe zile mbazivazika Eleazara. Aroni adafera paphiri ponthopo, tenepo Mose na Eleazara adatchitha kubwerera.

²⁹Dzinza yonsene ya Israele idadziwa kuti Aroni akhadafa, natenepo iwo adamsintili nsiku makumatatu.