Read cisena KALEMBERA 21 Bible Online

KALEMBERA 21 - cisena bible

KALEMBERA 21

¹Pidapiva mfumu wa Chikanani wa ku Aradi, ule akhakhala m'thando yatchetcha ya Negebu, kuti Aisraele akhadza na njira ya ku Atarimu, iye adadza mbachita nawo nkhondo mbaphatapo anthu anango Aisraele.

²Tenepo Aisraele adadumbira pikulu pene pamaso pa MBUYA mbati, “Ngakhala munatipasa mphamvu zakukunda nazo anthu enewa, ife tinavungiratu monsene mwene mizindawo yonsene.”

³MBUYA adava kupempha kwa Aisraele mbapereka Akanani m'manja mwawo. Iwo adaavungiratu monsene mwene pabodzi pene na maluwani awo ene; natenepo mbuto ile adaithula Horima.[13]

⁴Aisraele adabuluka paphiri ya Hori mbaenda na njira yakwendera ku Nyanza Yakufira towera achalire nthemba ya Edomu. Mbwenye m'njira mwawomo anthu adataya kupirira kwawo

⁵mbalonga mwakupokanyisana na Mulungu pontho Mose. Iwo adadungunya mbati, “Thangwi yache ninji mudatibulusa m'dziko ya Iguputo kuti tidzafe m'thando yatchetcha muno mwakusowa pyakudya na madzi ene? Ife nkhabe kwanisa kupirira na pyakudya pyapezipi tayu.”

⁶Natenepo MBUYA adatumiza nyoka zakupha pakati pa anthu, tenepo Aisraele azinji adalumwa nazo mbafa.

⁷Anthu adadza kuna Mose mbalonga mbati, “Ife tadawa pidalonga ife mwakupokanyisana na MBUYA pontho na imwe. Mpempheni MBUYA kuti atibulusirembo nyokazi.” Natenepo Mose adaapempherera anthu ale.

⁸MBUYA adapanga Mose kuti asasanye nyoka yankuwa pontho kuti aimanike pamuti, towera munthu onsene analumwayo akwanise kuyang'ana penepo mbapulumuka.

⁹Tenepo Mose adasasanya nyoka yankuwa mbaimanika pamuti. Tenepo munthu onsene wakulumwa na nyokayo pidayang'ana iye penepo adapulumuka.

¹⁰Aisraele adafuluka mbakamanga msasawo pa Oboti.

¹¹Pidabuluka iwo pambuto yeneyi adenda kamanga msasa pamadembe a Abarimu m'thando yatchetcha kumabulukiro dzuwa a madire a Amoabu.

¹²Kubuluka penepo iwo adamanga msasawo m'phedi ya Zeredi.

¹³Kubuluka penepo adafuluka pontho mbakamanga msasa kukhundu yakumpoto kwa mkulo ya Arinoni m'thando yatchetcha, ule udenderatu mpakana m'madire a Aamori. Arinoni ndiye akhali madire pakati pa Amoabu na Aamori.

¹⁴Ndi thangwi yache Bukhu ya Nkhondo za MBUYA imbalonga pya “Luwani ya Wahebu m'nthemba ya Sufa na m'maphedi; mkulo wa Arinoni,

¹⁵na mtelero wa maphedi ale adenderatu mpakana kuluwani ya Ari kwendera ku madire a Moabu.”

¹⁶Kubuluka penepo adenda kumbuto yakuchemerwa Michera, kule kudalonga MBUYA kuna Mose mbati, “Gumanyisa anthuwo pabodzi. Ndikufuna kuapasa madzi.”

¹⁷Pandzidzi wenewu Aisraele adaimba nyimbo ishi: “Michera bulusani madzi anu; tenepo ife tinati tikupaseni mwenyikiro na nyimbo.

¹⁸Mchera wakukumbwa na atongi, pontho na akadamu a anthu, wakukumbwa na ndodo yachifumu, pontho na miswimbo yawo.” Iwo adafuluka kubuluka m'thando yatchetcha mule kwenda ku Matana.

¹⁹Kubuluka penepo adenda ku Nahaliele. Kubuluka ku Nahaliele adenda ku Bamoti.

²⁰Kubuluka pa Bamoti adenda kuphedi m'nthemba ya Amoabu m'tchinde mwa phiri ya Pisiga, pale thando yatchetcha yonsene imbakwanisa kuoneka.

²¹Kubuluka penepo Aisraele adatuma anyamphangwa kuna Mfumu Sihoni wa Aamori kampanga kuti:

²²“Titawiriseni kuti tigwande na m'dziko mwanumu. Ife nkhabe dzasiya msewu kwenda m'minda mwanu, penu m'minda yamfesa tayu, pontho ife nkhabe dzamwa madzi a m'michera mwanu tayu. Ife tinateweza kwene msewu ukulu[14] basi mpakana tiwambuke madire anu.”

²³Mbwenye Sihoni hadatawirise Aisraele kuti agwande na m'dziko mwachemo tayu. Iye adagumanyisa anyankhondo ache mbaenda ku Yahazi m'thando yatchetcha mbachita nkhondo na Aisraele.

²⁴Mbwenye Aisraele adapha anyamalwawo azinji pankhondo yeneyi mbapokosera dziko yawo kubulukira kumkulo wa Arinoni kumpoto kwache mpakana ku Yaboki. Kweneku nkhu dziko ya Aamoni, thangwi madire a Aamoni akhali akutchinjirizwa pyakwanga.[15]

²⁵Natenepo Aisraele adakwata mizinda yonsene ya Aamori kuthimizapo Heshiboni na maluwani onsene akuzungulira mbakhazikika mwenemo.

²⁶Heshiboni ukhali mzinda ukulu wa Sihoni mfumu wa Aamori, ule akhadachita nkhondo na mfumu wakale wa ku Moabu mbakwata dziko yache yonsene mpakana kumkulo wa Arinoni.

²⁷Ndi thangwi yache nyakupeka nyimbo adaimba kuti: “Bwerani ku Heshiboni, kumzinda wa Mfumu Sihoni! Tinafuna kuona ukumangwa pontho na kukhazikiswa pontho.

²⁸Anyankhondo a Sihoni adenda patsogolo kabodzi ninga moto kubulukira mumzinda uno wa Heshiboni. Iwo adavunga mzinda wa Ari m'dziko ya Moabu, mbavunga pontho mapiri a kumtunda kwa mkulo wa Arinoni.

²⁹Dzedze kuna imwe anthu a ku Moabu. Imwe anthu akupembedza Kemoshi munati muvungwe. Mulungu wanu mbachitise amuna kukhala anthu akuthawa kwawo thangwi ya nkhondo. Pontho akazi akhale anthu a mfumu wa Aamori anyakuphatwa pankhondo.

³⁰Mbwenye chinchino pidzukulu pyawo pyavunga, m'njira monsene kubulukira ku Heshiboni nkhwenderatu ku Diboni. Kubulukira ku Nashimu nkhwenderatu ku Nofa chifupi na Medeba.”

³¹Natenepo Aisraele adakhazikika m'dziko ya Aamori,

³²tenepo Mose adatuma amuna anango kuti akagumane njira yadidi yakusosera nayo mzinda wa Yazere. Aisraele adaukwata mzinda ule pabodzi pene na maluwani akuzungulira mzindawo mbathamangisa Aamori onsene akhakhala mwenemo ale.

³³Kubuluka penepo Aisraele adazungunuka mbakwata njira yakwendera ku Bashani. Tenepo Mfumu Ogi wa ku Bashani adagumanyisa anyankhondo ache mbaenda kachita nawo nkhondo pa Edrei.

³⁴MBUYA adalonga kuna Mose mbati, “Leka chita naye mantha weneyo. Ine ndinakupasa mphamvu zakukunda nazo iye, anthu ache onsene na dziko yache ene. Chita kuna iye pinthu pidachita imwe kuna Sihoni mfumu wa Aamori ule akhatonga pa Heshiboni.”

³⁵Natenepo Aisraele adapha Ogi, anache na anthu ache onsene. Nee na mbodzi ene adapulumuka. Natenepo iwo adakhazikika m'dziko mwachemo.