Read cisena KALEMBERA 22 Bible Online

KALEMBERA 22 - cisena bible

KALEMBERA 22

¹Aisraele adathimiza ulendo awo mbakamanga msasawo pamaphedi a Moabu kumabulukiro dzuwa a Yorodani pontho mwakuyang'anisana na Yeriko.

²Balaki, mfumu wa ku Moabu, mwana wamamuna wa Zipora, pidava iye pinthu pyonsene pidachita Aisraele kuna Aamori, pontho na kuinjipa kudachita Aisraele,

³iye pabodzi pene na anthu ache onsene adachita mantha.

⁴Anthu a ku Moabu adalonga kuna akadamu a ku Midiani mbati, “Gulu yeneyi chinchino inati imale vunga pyonsene pyatizungulirapi, ninga ng'ombe imuna ingadya mpovu m'minda.” Natenepo Mfumu Balaki

⁵adatuma anthu kuti akachemere Balamu mwana Beori, ule akhakhala ku Petori chifupi na mkulo wa Yufurate m'dziko ya Amawu. Iwo adamdzesera mphangwa izi kubulukira kuna Mfumu Balaki: “Ndinafuna kuti imwe mudziwe kuti dzinza yonsene ya anthu adza kubulukira ku Iguputo; anthu ache amala balalika konsene kwene, pontho iwo akhala chifupiletu na ine.

⁶Tenepo ndaphata miyendo, dzani kuno kuti muatemberere anthu enewa, thangwi iwo ngamphamvu pyakwanga mwakuti ine nkhabe kwanisa phatana nawo tayu. Mungaatemberera mwinango ndinakwanisa kuakunda na kuathamangisa m'dziko muno. Ine ndimbapidziwa kuti imwe mungatsanzayisa munthu, munthuyo ambatsanzayiswadi, mungamtemberera, iye ambatembererwadi.”

⁷Natenepo akadamu a Moabu na Midiani adakwata pyakufuna kupagali napyo Balamu angalonga mafala akutemberera. Tenepo iwo adenda kuna Balamu mbakampanga mphangwa zidabulukira kuna Balaki.

⁸Balamu adalonga kuna iwo mbati, “Lero mugone kuno, tenepo mangwana ndinati ndikupangeni pyonsene pinafuna kundipanga MBUYA.” Natenepo akadamu a ku Moabu adakhala naye pabodzi.

⁹Mulungu adadza kuna Balamu mbamvunza mbati, “Amuna anakhala na iwewa mbani?”

¹⁰Iye adatawira mbati, “Mfumu Balaki wa ku Moabu ndiye adatuma anthu enewa kudzandipanga kuti

¹¹anthu adabulukira ku Iguputo ale amala falikira m'dziko monsenemo. Iye anafuna kuti ine ndiatemberere, towera akwanise kuamenya na kuathamangisa.”

¹²Mulungu adalonga kuna Balamu mbati, “Leka kwenda nawo pabodzi anthuwo, pontho leka temberera Aisraele thangwi iwo ngakutsanzayiswa.”

¹³Mangwana mwache na machibese Balamu adenda kuna anyamphangwa a Balaki mbalonga mbati, “Bwererani pyanu kwanu; MBUYA akhonda kuti ndiende namwe pabodzi.”

¹⁴Natenepo iwo adabwerera kuna Balaki mbampanga kuti Balamu akhonda kuti abwere nafe pabodzi.

¹⁵Kubuluka penepo Balaki adatuma akadamu azinji ene, ale akhali akufunika pyakwanga kupiringana akutoma ale.

¹⁶Iwo adenda kuna Balamu mbakampanga mphangwa zidabulukira kuna Balaki zile zakuti: “Ndaphata miyendo, paleke khala chinthu na chibodzi chene chikutchinga kuti uleke kudza kuna ine kuno!

¹⁷Ine ndinati ndikufupe pikulu pene pontho ndinachita chinthu chonsene chinafuna iwe dzalonga. Ndaphata miyendo, bwera kuti udzatemberere anthuwa m'mbuto mwanga.”

¹⁸Mbwenye Balamu adatawira mbati, “Podi kwene kuti Balaki andipase siliva na golidi onsene ali m'nyumbache yachifumu, ine nkhabe kwanisa kukhonda vera matongero a MBUYA Mulungu wanga, podi na pang'ono pene, nkhabe tayu.

¹⁹Kwache ndaphata miyendo, imwe mugone kuno lero ninga mudachitira anzanu, towera ndidziwe ngakhala MBUYA ana chinango chakuti andipange penu tayu.”

²⁰Mosiku wenewo Mulungu adadza kuna Balamu mbalonga mbati, “Ngakhala amuna enewa adza dzakupempha kuti uende nawo pabodzi, sasanyika uende nawo pabodzi, mbwenye wathema kuchita pinthu pinakupanga ine pene basi.”

²¹Natenepo mangwana mwache na machibese Balamu adapakira pabulu wache mbaenda pabodzi pene na akadamu a ku Moabu ale.

²²Mulungu adazhangali pyakwanga pidaona iye kuti Balamu akhaenda. Tenepo pikhaenda Balamu uku akwira bulu wache mwakutsagana na anyabasache awiri, mngelo wa MBUYA adaimira kutchinga njiracheyo.

²³Pidaona bulu ule kuti mngelo aimira kutsogolo kwache uku aphatira talasada m'manja mwache, adabauka mbaenda na m'tsanga. Balamu adamenya bulu wache mbambwezera m'njira.

²⁴Natenepo mngelo adaimira pakhadapapanula njira pakati pa minda yamfesa miwiri, pontho khundu zonsene ziwiri kukhali mpanda yakumangwa na miyala.

²⁵Pidaona bulu ule mngelo wa MBUYA adakhukhumba na kufufu kule mbakhujisa dzinyalo ya Balamu kufufuko. Natenepo iye adammenya pontho bulu wache ule.

²⁶Tenepo mngelo wa MBUYA ule adafedzera pontho patsogolo mbaimira pambuto yakupapanula pakusowa na mbuto ene yakuti mbadakwanisa kugwanda nayo kukhundu zonsene.

²⁷Pandzidzi wenewu pidaona buluyo mngelo ule, adagona pansi. Balamu adazhangali pyakwanga mbatoma kumenya bulu ule na nswimbo wache.

²⁸Natenepo MBUYA adachitisa kuti bulu ule akwanise kubulusa fala, tenepo buluyo adalonga kuna Balamu mbati, “Ine ndasosanji kuna imwe kuti mundimenye ninga tenepa katatu?”

²⁹Balamu adatawira mbati, “Thangwi yakuti wandilulupisa! Mbidakhala na talasada mbidakupha nayo.”

³⁰Bulu ule adatawira mbati, “Kadi bulu wache si ine ontho ule akwira imwe kutomera moyo wanu onsene tayu? Ayi ine chipo ndidatoma kale kukuchitirani pinthu ninga penepi?” Iye adatawira mbati, “Nkhabe.”

³¹Tenepo MBUYA adafungula maso a Balamu mbaona mngelo wa MBUYA ali chiliri m'njira, talasadache ili m'manja; tenepo Balamu adapigwisa yekha ene pansi mbalamba.

³²Mngelo wa MBUYA adavunza mbati, “Thangwi yache ninji wamenya bulu wako katatu ninga tenepa? Ine ndadza kuti nditchinge njirako thangwi iwe nee wathema kwenda ulendo wenewu tayu.

³³Mbwenye bulu wako adandiona mbapambuka katatu. Mbadakhala kuti iye hadapambuke tayu, ine mbidakupha, mbwenye buluyo mbidamsiya na moyo wache.”

³⁴Balamu adatawira mbati, “Ande, ine ndadawa. Ine nee ndikhapidziwa tayu kuti imwe mukhaimira m'njiramu kundikhondesa; mbwenye ngakhala imwe mukunyerezera kuti kwenda ulendo wenewu nkhudawa kuna ine, ndinati ndibwerere kumusa kwanga.”

³⁵Mbwenye mngelo ule adalonga mbati, “Ndoko nawo pabodzi anthu ana iwewa, kwache ungafika kweneko ukalonge pinafuna kakupanga ine.” Natenepo Balamu adathimiza kwenda pabodzi na anthu ale.

³⁶Pidava Balaki kuti Balamu akubwera adenda kagumanikana naye pa Ari, mzinda wa chifupi na mkulo wa Arinoni m'madire a Moabu.

³⁷Balaki adalonga kuna Balamu mbati, “Thangwi yache ninji mudakhonda kubwera pidakuchemerani ine pakutoma pale? Imwe mudanyerezera kuti sinakwanisa tayu kukufupani pizinji?”

³⁸Balamu adatawira mbati, “Kudza nkhweneku kwachita ineku, kwache ine nkhabe mphamvu. Pinafuna kundipanga Mulungu kuti ndipilonge penepyo pene basi ndiye pinafunambo ine kulonga.”

³⁹Natenepo Balamu adenda pabodzi pene na Balaki kuluwani ya Huzoti,

⁴⁰kudacheka Balaki ng'ombe na mabira kule mbapereka nyama inango kuna Balamu na akadamu akhali na iye ale.

⁴¹Mangwana mwache na machibese Balaki adakwata Balamu mbakwira naye ku Bamoti Baala, kule kudakwanisa Balamu kuona khundu ibodzi ya Aisraele.