Read cisena KALEMBERA 23 Bible Online

KALEMBERA 23 - cisena bible

KALEMBERA 23

¹Iye adalonga kuna Balaki mbati, “Ndimangire maguwa ansembe anomwe mbubwere na ng'ombe zimuna zinomwe, pontho na mabira amuna anomwe.”

²Balaki adachita ninga mudapangirwa iye. Tenepo iye na Balamu adapereka ng'ombe ibodzi na bira mbodzi paguwa yonsene ya nsembe.

³Tenepo Balamu adalonga kuna Balaki mbati, “Imira pano m'khundu mwa nsembe yako yakupyererayi, pinaenda ine uko kaona ngakhala MBUYA ndinagumanikana naye penu tayu. Ndinati ndikupange pyonsene pinakandionesa iye.” Natenepo iye adenda yekha ene pansonga ya phiri,

⁴Mulungumbo adadza dzagumanikana naye. Balamu adalonga kuna iye mbati, “Ndamanga maguwa anomwe ansembe mbandipereka nsembe ng'ombe na bira paguwa yonsene.”

⁵MBUYA adapanga Balamu chakuti akalonge. Tenepo adamgwinya mbabwerera kuna Balaki kuti akalonge pyalonga MBUYA.

⁶Natenepo iye adabwereradi kuna Balaki mbagumana Balaki ali chiliri basi m'khundu mwa nsembe yache yakupyerera pabodzi pene na akadamu a Moabu.

⁷Izi ndi mphangwa zauprofeti zidalonga Balamu kuti: “Balaki mfumu wa ku Moabu andidzesa kubulukira ku Aramu, kubulukira kumapiri akumabulukiro dzuwa. Iye adalonga mbati, ‘Bwerani mundilongerembo kuna anthuwa. Atemberereni anthu a ku Israelewa.’

⁸Ine ndinakwanisa tani kutemberera chinthu chakhonda temberera Mulungu, penu kulonga pya kuvungika, uku MBUYA hadalonge pyakuvungika tayu?

⁹Kubulukira pa miyala yakulapha ine ndikukwanisa kuaona; ndikukwanisa kuaona na pamapiri. Iwo ndi dzinza yakukhala pa yokha ene; iwo ambapidziwa kuti ngakutsanzayiswa kupiringana madzinza anango.

¹⁰Pidzukulu pya Israele pyakhala ninga fumbi, iwo ngazinji pyakwanga mwakuti hanalengeseka tayu. Ine na nsiku zanga zakukhala moyo mbizikhale ninga za anthu a Mulungu. Ine mbindife pyanga mumtendere ninga mumbachitira anthu akulungama.”

¹¹Tenepo Balaki adalonga kuna Balamu mbati, “Chachita iwe kuna ine ninji? Ine ndidakuchemera kuti utemberere anyamalwanga, mbwenye pyonsene pyachita iwe pano nkhuatsanzayisa.”

¹²Iye adatawira mbati, “Chinakwanisa ine kulonga ntchontho chandipanga MBUYA kuti ndichilonge.”

¹³Kubuluka penepo Balaki adalonga kuna Balamu mbati, “Tende kumbuto inango kule kunakwanisa iwe kuona anthu anango a Aisraele. Iwe ukaatemberere na penepo m'mbuto mwanga.”

¹⁴Iye adenda na Balamu kumunda wa Zofimu pansonga paphiri ya Pisiga. Kweneko adamangako pontho maguwa anomwe ansembe mbapereka pontho ng'ombe na bira paguwa yonsene.

¹⁵Balamu adalonga kuna Balaki mbati, “Imira pano m'khundu mwa nsembe yako yakupyererayi, ine ndikwenda kagumanikana na Mulungu uko!”

¹⁶MBUYA adagumanikana nayedi Balamu mbampanga pyakuti akalonge. Natenepo adamgwinya kubwerera kuna Balaki kuti akampange pyalonga MBUYA.

¹⁷Natenepo adabwereradi kuna Balaki mbamgumana ali chiliri m'khundu mwa nsembe yache yakupyerera ile, pabodzi pene na akadamu a Moabu. Balaki adavunza kuti MBUYA adalonganji,

¹⁸tenepo Balamu adatoma kulonga mphangwa zache zauprofeti kuti: “Bwera kuno Balaki mwana Zipora, pontho uvesere pinafuna ine kukupanga.

¹⁹Mulungu si munthu tayu kuti anakwanisa kunama; iye si munthu tayu kuti anakwanisa kusanduza manyerezero ache. Pyonsene pidadumbira iye kupichita, ambapichitadi. Iye ambalonga, tenepo ipyo pimbachitikadi.

²⁰Ine ndapangwa kuti nditsanzayise, tenepo ngakhala Mulungu atsanzayisa, ine nkhabe kwanisa kupikhonda tayu.

²¹Ine ndaoneratu kuti tsogolo ya Aisraele, nkhabe kuadzesera dzedze penu nyatwa tayu. MBUYA Mulungu wawo ali nawo; iwo ambalonga kuti Mulungu ndi mfumu wawo.

²²Mulungu aabulusa m'dziko ya Iguputo; iye aamenyera nkhondo ninga nyati.

²³Kweneko nkhabe matsenga penu ufiti, pile pinakwanisa kuphatiswa basa kupokanyisana na dzinza ya Israele.[16] Chinchino anthu anati alonge pya Israele kuti, ‘Ngayang'anani pyachita Mulungu!’

²⁴Dzinza ya Israele yakhala ninga nkhalamu ikazi. Iyo nkhabe puma kufikirana ikhwadzule na kukhudyula, kufikirana isute chiropa cha chinthu chapha iye.”

²⁵Tenepo Balaki adalonga kuna Balamu mbati, “Iwe wakhonda kuatemberera Aisraele, kwache leka kuatsanzayisa!”

²⁶Balamu adatawira mbati, “Ayi ine sidakupange tayu kuti ndathema kuchita pyonsene pyandipanga MBUYA?”

²⁷Balaki adalonga mbati, “Tendeni kuno kumbuto inango. Mwinango Mulungu anatawira kuti uatemberere na kweneko.”

²⁸Natenepo iye adenda na Balamu pansonga paphiri ya Peori kuyang'ana pansi m'thando yatchetcha.

²⁹Balamu adalonga kuna Balaki mbati, “Ndimangire maguwa anomwe ansembe pano mbubwere na ng'ombe zimuna zinomwe pontho na mabira amuna anomwe.”

³⁰Balaki adachitadi ninga mudapangirwa iye, mbapereka ng'ombe ibodzi na bira mbodzi paguwa yonsene ya nsembe.