Read cisena KALEMBERA 24 Bible Online

KALEMBERA 24 - cisena bible

KALEMBERA 24

¹Pidadziwa Balamu kuti MBUYA akhafuna kuti iye atsanzayise Aisraele hadendeve kuyang'ana matsengache ninga mukhachitira iye pakutoma pale tayu. M'mbuto mwache adazungunuka mbayang'ana kuthando yatchetcha.

²Iye adaonako Aisraele akhala m'magulu-magulu malingana na madzinzawo. Mzimu wa Mulungu adamgudumira,

³tenepo iye adalonga mphangwa zauprofeti izi: “Mphangwa za Balamu mwana Beori, mafala a munthu, ule anakwanisa kuona mwadidi.[17]

⁴Ule anakwanisa kuva pinalonga Mulungu. Ule na maso akuthwa anakwanisa kuona mayezi-yezi, masomphenya akubulukira kuna Nyamphamvu zonsene.

⁵Makumbi a Israele ngakubalika pyakwanga.

⁶Iwo akhala ninga mizere yakulapha yamichewu penu minda yakukhala m'khundu-khundu mwa mkulo, ninga gavi wakubzalwa na MBUYA, penu mkungudza m'khundu-khundu mwa madzi.

⁷Iwo anakhala na mvula izinji, pontho anabzala mbewu zawo m'minda yakuthirirwa mwadidi. Mafumu awo anakhala akulu kupiringana Agagi, pontho ufumu wache unafumuka umimba na ulaphi ene.

⁸Mulungu adadza nawo kubulukira m'dziko ya Iguputo; iye ambaamenyera nkhondo ninga nyati. Iwo ambakhudyula anyamalwawo, ambapeya magogodo awo na kubonyola matswimo awo.

⁹Dzinza yeneyi yakhala ninga nkhalamu ikazi; ingagona, nkhabe munthu anawanga mtima kuilamusa tayu. Munthu onsene wakutsanzayisa Israele anatsanzayiswambo, pontho munthu onsene wakutemberera Israele anatembererwambo.”

¹⁰Na thangwi ya penepi Balaki adamzhangalira Balamu mbaimba m'manja kuti phuu mbalonga mbati, “Ine ndidakuchemera kuti utemberere anyamalwanga, mbwenye m'mbuto mwache iwe waatsanzayisa katatu.

¹¹Natenepo ndoko pyako kumusa kwako! Ine ndidadumbira kuti ndinakufupa, mbwenye MBUYA akukhondesa kuti uleke kwata mfupowo.”

¹²Balamu adatawira mbati, “Ndidaapanga kale anyamphangwa adatuma iwe kuna ine ale kuti

¹³podi kwene kuti mundipase siliva onsene na golidi onsene wa m'nyumbanu yachifumu, ine nkhabe dzakwanisa kukhonda vera matongero a MBUYA pakuchita pinafuna ine tayu. Ndinalonga pyonthopyo pinandipanga MBUYA kuti ndipilonge.”

¹⁴Balamu adalonga kuna Balaki mbati, “Chinchino ndikubwerera kwathu kuna anthu anga, mbwenye mbandidzati kwenda, ndinafuna kukucheuza pinthu pinafuna dzachita Aisraele m'tsogolo muno kuna anthu ako.”

¹⁵Natenepo adatoma kulonga mphangwa zauprofeti izi: “Mphangwa za Balamu mwana Beori, mafala a munthu ule anakwanisa kuona mwadidi,[18]

¹⁶ule anakwanisa kuva pinalonga Mulungu mbatambira nzeru zakubulukira kuna Nyakudzulu-dzulu, ule na maso akuthwa anakwanisa kuona masomphenya akubulukira kuna Nyamphamvu zonsene.

¹⁷Ndimbayang'ana pya m'tsogolo, tenepo ndimbaona dzinza ya Israele. Mfumu wakukhala ninga nyenyezi yakuyetima inabulukira muna Yakobo, ndodo yachifumu inaoneka mu Israele. Iye anakhamwadza akadamu a Moabu mbamenya anthu onsene a Seti.[19]

¹⁸Iye anakunda anyamalwache Aedomu mbachitisa dziko yawo kukhala yache uku Israele akuthimiza basi kukunda.

¹⁹Dziko ya Israele inaapondedza pansi mbatswairiratu anyakusalira na moyo onsene.”

²⁰Kubuluka penepo Balamu kumasomphenyache adaona Aamaleki mbalonga mphangwa zauprofeti izi: “Aamaleki ikhali dzinza yamphamvu pyakwanga kupiringana madzinza anango onsene, mbwenye pakumalisira pache iyo inamaliratu, pontho nee anaonekave tayu.”

²¹Kumasomphenya enewa adaonamo pontho Akeni mbalonga mphangwa zauprofeti izi: “Podi kwene kuti mbuto inakhala imweyo njakutchinjirizwa mwadidi ninga chisa chakumangwa pamatelero akulapha a phiri,

²²imwe, Akeni, munati muvungwe, Ashuri angabwera dzakukwatani ninga anyaperezo.”

²³Balamu adalonga pontho mphangwa zauprofeti izi: “Anthu anagumanyikana kumpotowa mbani?

²⁴Anyankhondo anabwera na pamadzi kubulukira ku Kipro, iwo anakunda Asiria na Eberi. Mbwenye pakumalisira pache iwombo anamaliratu, pontho nee anaonekave tayu.”

²⁵Kubuluka penepo Balamu adalamuka mbabwerera kwawo, Balaki mbaendambo na njirache.