Read cisena KALEMBERA 25 Bible Online

KALEMBERA 25 - cisena bible

KALEMBERA 25

¹Pidamanga Aisraele msasawo m'Phedi ya Kesha, amuna adatoma kuchita uputa na akazi a ku Moabu akhali penepo ale.

²Akazi enewa adachemerera amunawa kuphwando yawo ya nsembe, kule kukhapembedzwa milungu yawo. Aisraele achimuna adadya pyakudya pile mbapembedza milungu yawo

³yakuchemerwa Baala wa Peori. Natenepo MBUYA adazhangali nawo

⁴mbalonga kuna Mose mbati, “Kwata akadamu a Aisraele onsenewa uaphe pakwecha pamaso panga, towera ukali wanga wakugoswa ubuluke pana Aisraelewa.”

⁵Mose adapanga akadamu mbati, “Munthu onsene aphe munthu wa dzinzache ule adavungazikana na Amoabu kupembedza Baala wa Peori.”

⁶Mbodzi wa Aisraele adakwata mkazi wa ku Midiani mbapita naye m'khumbi mwache uku Mose na dzinza yonsene ya Israele akuona, mwenemo iwo onsene akusintili pamsuwo wa Chikhumbi cha Mulungu.

⁷Pidaona Finiasi mwana Eleazara mdzukuluache Aroni nyansembe penepi, adalamuka mbasiya gulu yonsene ile. Iye adakwata dipa,

⁸mbatewera mamuna na mkazi m'khumbi mule mbaaphutchula na dipayo onsene uwiriawo pabodzi pene. Na njira yeneyi muliri ukhapha Aisraele udaleka,

⁹mbwenye pandzidzi wenewu muliri ukhadapha kale anthu pikwi makumawiri na pinayi.

¹⁰MBUYA adalonga kuna Mose mbati,

¹¹“Na thangwi ya pinthu pyachita Finiasi, ine nkhabeve zhangali nawo Aisraele tayu. Iye adazhangali pyakwanga ninga mudachitira ine towera ine ndilemedzwe pakati pawo. Ndi thangwi yache ine sidaamale onsene kuavunga tayu.

¹²Natenepo mpange kuti ine ndikuchita naye chiverano chile chinakhala chakukhazikika ndzidzi onsene unadzawu.

¹³Iye pabodzi pene na pidzukulu pyache ndaakhazikisa kukhala anyansembe anga kwenda na kwenda, thangwi iye adachita phinga kuti ine ndilemedzwe pakati pawo, pontho kuti adachitisa kuti pyakudawa pya Aisraele pilekererwe.”

¹⁴Mamuna wa Chiisraele ule adaphiwa pabodzi na mkazi wa ku Midiani akhali Zimri mwana Salu, ule akhali mkadamu wa banja m'dzinza ya Simioni.

¹⁵Dzina ya mkaziyo ikhali Kozibi. Babache akhali Zuri mkadamu wa mbumba za Amidiani.

¹⁶MBUYA adapanga Mose mbati,

¹⁷“Ndoko kamenyane na Amidiani, pontho uavunge,

¹⁸thangwi ya pyakuipa pidachita iwo kuna imwe pidakunyengezani iwo pa Peori, pontho thangwi ya Kozibi ule adafa pandzidzi wa muliri udachitika pa Peori ule.”