Read cisena KALEMBERA 27 Bible Online

KALEMBERA 27 - cisena bible

KALEMBERA 27

¹Mala, Nowa, Hogila, Milika na Tiriza akhali ana achikazi a Zelofehadi ule babache akhali Hefere, Hefere babache akhali Gileadi, Gileadi babache akhali Makiri, Makiri babache akhali Manase, mwana Yosefe.

²Iwo adenda mbakaimira pamaso pa Mose, Eleazara nyansembe, akadamu na dzinza yonsene ya Israele pamsuwo wa Chikhumbi cha Mulungu mbalonga mbati,

³“Babathu adafa m'thando yatchetcha okhonda kusiya na mwana ene wamamuna. Iye nee akhali mbodzi wa anyakutewera a Kora adapandukira MBUYA ale tayu; iye adafa thangwi ya kudawa kwache.

⁴Ayi mphyadidi kuti dzina ya babathu ifeletu, thangwi iye akhali nkhabe ana achimuna basi? Tipaseni mbutoyo pakati pa abale a babathu.”

⁵Mose adaupereka mseru wenewu kuna MBUYA,

⁶tenepo MBUYA adalonga kuna Mose mbati,

⁷“Pinapempha ana achikazi a Zelofehadi mphyakuthema; apaseni mbutoyo pakati pa abale a babawo. Pontho uapase pinthu pyasiya defuntuyo.

⁸Panga Aisraele kuti ngakhala mamuna anafa okhonda kusiya ana achimuna, anache achikaziwo apaswe pinthu pyasiya babawo pile.

⁹Ngakhala iye nkhabe na mwana ene wamkazi, mbaleache atambire pinthu pyakusiyiwapyo.

¹⁰Ngakhala iye nkhabe na mbale ene, mbaleache babache atambire pinthu pyakusiyiwapyo.

¹¹Ngakhala babache nkhabe mbale, penepo mbaleache unango wakukhala naye chifupi atambire pinthu pyakusiyiwapyo, pontho apikwate ninga pyache pyene. Anthu a ku Israele athema kuteweza pinthu pinalonga mwambo wenewu ninga mwalongera ine MBUYA.”

¹²MBUYA adalonga kuna Mose mbati, “Kwira phiri ya Abarimu mbuyang'ane dziko inafuna ine kupasa Aisraele.

¹³Ungamala kuiona unati ufe ninga mudachitira mbaleako Aroni,

¹⁴thangwi monsene uwirianu mudapandukira matongero anga m'thando yatchetcha ya Zini. Pidadungunya anthu mwakupokanyisana na ine pa Meriba, iwe udakhonda kundilemedza pamaso pawo kuti ndine wakuchena.” (Meriba ndi mphuno ya madzi ya pa Kadeshi m'thando yatchetcha ya Zini.)

¹⁵Mose adapemphera mbati,

¹⁶“MBUYA Mulungu, phata ya moyo wa anthu onsene, ndikupemphera kuti musankhule munthu ule anakwanisa kutsogolera anthu anu,

¹⁷pontho ule anakwanisa kukhala mkadamu wawo pankhondo, towera anthu anu aleke khala ninga mabira akusowa makabuswa.”

¹⁸MBUYA adalonga kuna Mose mbati, “Kwata Yoswa mwana Nuni, munthu wakudzala na nzeru, mbumsanjike manja.

¹⁹Muimirise pamaso pa Eleazara nyansembe na pa anthu onsene a Israele mbulonge pamaso pa iwo onsene kuti iye ndiye nyakupita m'mbuto mwako.

²⁰Mpase khundu ya utongi una iwe towera anthu onsene a Israele amvere.

²¹Iye aimire pamaso pa Eleazara nyansembe, ule anampanga kufuna kwanga pakuphatisa basa Urimu na Tumimu. Na njira yeneyi Eleazara ndiye anatsogolera Yoswa pabodzi pene na anthu onsene a Israele papyonsene pinaphata iwo.”

²²Mose adachitadi pyonsene ninga mudampangira MBUYA. Iye adaimirisa Yoswa pamaso pa Eleazara nyansembe na pa anthu onsene a Israele.

²³Ninga montho mudalongera MBUYA, Mose adamsanjika manja Yoswa mbalonga kuti Yoswa ndiye nyakupita m'mbuto mwache.