Read cisena KALEMBERA 28 Bible Online

KALEMBERA 28 - cisena bible

KALEMBERA 28

¹MBUYA adalonga kuna Mose

²kuti apange Aisraele kuti iwo athema kupereka pandzidzi wache wakusankhulika pyakupereka pyakusasanywa na moto kuna MBUYA ninga khwema yakumkomera MBUYA.

³Pyakupereka pyakusasanywa na moto pile pyathema kuperekwa kuna MBUYA mphipi: anabira amuna awiri a chaka chibodzi akusowa chilema ninga nsembe yakupyerera ya nsiku na nsiku.

⁴Bira mbodzi aperekwe nsembe na machibese, nyachiwiriacheyi aperekwe nsembe pakuthobila dzuwa.

⁵Pa mabira awiri paperekwe chakupereka cha mapira chakulemera kilogramu ibodzi chakuvungazwa na mafuta adidiletu aolivi akukwana tugwe mbodzi.

⁶Chenechi ntchakupereka cha nsiku na nsiku chile chimbapiswa chonsenene. Chenechi ntchile chidakhazikiswa paphiri ya Sinai kukhala chakupereka chakusasanywa na moto kuna MBUYA, chile khwemache MBUYA ambakomerwa nayo.

⁷Chakupereka chakumwa cha vinyu chakukwana tugwe mbodzi chikhuthulirwe pana mabira awiri ale paguwa yansembe.

⁸Pakuthobila dzuwa perekani bira wachiwiriyo ninga montho mwachitira imwe na chakupereka cha machibese chile pabodzi pene na chakupereka chakumwa. Chenechi pontho ntchakupereka chakusasanywa na moto kuna MBUYA, chile khwemache imbamkomera MBUYA.

⁹Pa Nsiku Yakupuma perekani anabira amuna awiri a chaka chibodzi akusowa chilema, ufa wakulemera makilogramu mawiri wakuvungazwa na mafuta aolivi kukhala chakupereka chakumwa, pontho na chakupereka cha mapira.

¹⁰Nsembe yakupyererayi yathema kuperekwa pa Nsiku yonsene Yakupuma kuthimizira pa nsembe yakupyerera ya nsiku na nsiku pabodzi pene na chakupereka chache chakumwa.

¹¹Perekani nsembe yakupyerera kuna MBUYA pakutoma pamwezi onsene: ng'ombe zimuna zing'ono-zing'ono ziwiri, bira wamamuna mbodzi, na anabira anomwe a chaka chibodzi, onsenewa akhale akusowa chilema.

¹²Pontho mupereke ufa wakuvungazwa na mafuta aolivi kukhala chakupereka cha mapira. Pabodzi pene na ng'ombe yonsene perekani ufa wakulemera makilogramu matatu; pabodzi pene na bira wamamuna perekani ufa wakulemera makilogramu mawiri;

¹³pontho pabodzi pene na bira onsene perekani ufa wakulemera kilogramu ibodzi. Nsembe zakupyerera nsakupereka zakusasanywa na moto, zile khwemache MBUYA ambakomerwa nayo.

¹⁴Na ng'ombe yonsene paperekwe chakupereka chakumwa cha vinyu chakukwana matugwe mawiri, na bira wamamuna tugwe mbodzi na theka, pontho na mwanabira onsene tugwe mbodzi. Wenewu ndi mwambo wa nsembe zakupyerera zakuperekwa pansiku yakutoma ya mwezi onsene pa chaka.

¹⁵Kuthimizira pa nsembe zakupyerera za nsiku na nsiku pabodzi pene na chakupereka chakumwa, perekani bokho mbodzi kukhala nsembe yakubulusira pyakudawa.

¹⁶Phwando ya Paska yakulemedza nayo MBUYA yathema kuchitika pansiku yakhumi na chinayi ya mwezi wakutoma.

¹⁷Pansiku yakhumi na chishanu phwando ya chipembedzo itome. Tenepo pangamala nsiku zinomwe phwandoyo imale. Pandzidzi wa phwandowu idyani mikate yakusowa chakufufumisira.

¹⁸Pansiku yakutoma ya phwandoyi mwathema kugumanyikana kupembedza, tenepo lekani phata basa pansiku yeneyo.

¹⁹Perekani nsembe yakupyerera kuna MBUYA kukhala chakupereka chakusasanywa na moto: ng'ombe zimuna ziwiri, bira wamamuna mbodzi, na anabira amuna anomwe a chaka chibodzi, onsenewa akhale akusowa chilema.

²⁰Perekani chakupereka cha mapira cha ufa wakunyodoka wakuvungazwa na mafuta aolivi akukwana makilogramu matatu pabodzi na ng'ombe yonsene, makilogramu mawiri pabodzi pene na bira,

²¹pontho na kilogramu ibodzi pabodzi pene na bira onsene.

²²Mupereke pontho bokho mbodzi kukhala nsembe yakubulusira pyakudawa. Na njira yeneyi chitani mwambo wakuchenesa anthu onsene.

²³Perekani penepi kuthimizira pa nsembe zakupyerera zimbapereka imwe na machibese onsene zile.

²⁴Montho-monthomo perekani nsiku na nsiku mpakana nsiku zinomwe chakupereka chakusasanywa na moto kuna MBUYA, khwemache imbamkomera MBUYA. Perekani pyakuperekapi kuthimizira pa nsembe yakupyerera ya nsiku na nsiku pabodzi na chakupereka chache chakumwa.

²⁵Pansiku yachinomwe mwathema kugumanyikana pabodzi kuti mupembedze, mbamuleke phata mabasanu a nsiku na nsiku.

²⁶Pansiku yakutoma ya Phwando ya Pyakuvuna, mungapereka pyakupereka pyanu pya mapira achinchino kuna MBUYA, imwe mwathema kugumanyikana kuti mupembedze mbamuleke phata mabasanu a nsiku na nsiku.

²⁷Perekani nsembe zakupyerera kuti zikhale khwema yakukomera MBUYA: anamphulu amuna awiri, bira mbodzi na mabira anomwe a chaka chibodzi, onsenewa akhale akusowa chilema.

²⁸Perekani chakupereka cha mapira cha ufa wakunyodoka wakuvungazwa na mafuta aolivi: makilogramu matatu aperekwe pabodzi na ng'ombe yonsene, makilogramu mawiri aperekwe pabodzi na bira wamamuna,

²⁹pontho kilogramu ibodzi iperekwe pabodzi na mwanabira onsene.

³⁰Perekani pontho bokho mbodzi kukhala nsembe yakubulusira pyakudawa. Na njira yeneyi chitani mwambo wakuchenesa anthu onsene.

³¹Perekani penepi na chakupereka chakumwa kuthimizira pa nsembe yakupyerera ya nsiku na nsiku pabodzi na chakupereka chache cha mapira.