Read cisena KALEMBERA 29 Bible Online

KALEMBERA 29 - cisena bible

KALEMBERA 29

¹Pansiku yakutoma ya mwezi wachinomwe mugumanyikane kuti mupembedze mbamuleke phata mabasanu a nsiku na nsiku. Pansiku yeneyo ngoma zathema kulizwa.

²Perekani nsembe yakupyerera kuna MBUYA, khwemache imbamkomera MBUYA: mwanamphulu mbodzi wamamuna, bira wamamuna mbodzi na anabira anomwe a chaka chibodzi, onsenewa akhale akusowa chilema.

³Perekani chakupereka cha mapira cha ufa wakunyodoka wakuvungazwa na mafuta aolivi: ufa wakulemera makilogramu matatu aperekwe pabodzi pene na ng'ombe; makilogramu mawiri aperekwe pabodzi pene na bira;

⁴pontho kilogramu ibodzi iperekwe pabodzi pene na mwanabira onsene.

⁵Pontho perekani bokho mbodzi kukhala nsembe yakubulusira pyakudawa; na njira yeneyi chitani mwambo wakuchenesa anthu onsene.

⁶Perekani penepi kuthimizira pa nsembe yakupyerera imbapereka imwe pansiku yakutoma ya mwezi onsene pabodzi pene na chakupereka chache cha mapira, pontho na nsembe yakupyerera imbapereka imwe nsiku na nsiku pabodzi pene na chakupereka chache chakumwa, khwemache ya pyakupereka penepi MBUYA ambakomerwa napyo.

⁷Pansiku yachikhumi ya mwezi wachinomwe gumanyikanani kuti mupembedze; lekani kudya chinthu na chibodzi chene mbamuleke phata mabasanu a nsiku na nsiku.

⁸Perekani nsembe yakupyerera kuna MBUYA, ile khwemache imbamkomera MBUYA: mwanamphulu wamamuna mbodzi, pontho na anabira anomwe a pyaka pinomwe, onsenewa akhale akusowa chilema.

⁹Perekani chakupereka cha mapira cha ufa wakunyodoka wakuvungazwa na mafuta aolivi: makilogramu matatu a ufa aperekwe pabodzi pene na mwanamphulu wamamuna, makilogramu mawiri aperekwe pabodzi pene na bira wamamuna,

¹⁰kilogramu ibodzi iperekwe pabodzi pene na mwanabira onsene.

¹¹Perekani pontho bokho mbodzi kukhala nsembe yakubulusira pyakudawa. Kuthimizira pa bokho adaperekwa kuchita mwambo wakuchenesa anthu ule, pontho na nsembe yakupyerera ya nsiku na nsiku pabodzi pene na chakupereka chache cha mapira pontho chakupereka chache chakumwa.

¹²Pansiku yakhumi na chishanu ya mwezi wachinomwe gumanyikanani kuti mupembedze. Chitani phwando yakulemedza nayo MBUYA nsiku zinomwe mbamuleke phata mabasanu a nsiku na nsiku.

¹³Pansiku yakutomayi perekani kuna MBUYA chakupereka chakusasanywa na moto, chile khwemache imbamkomera MBUYA: anamphulu amuna khumi na atatu, mabira amuna awiri, anabira achimuna khumi na anayi a chaka chibodzi, onsenewa akhale akusowa chilema.

¹⁴Perekani chakupereka cha mapira cha ufa wakunyodoka wakuvungazwa na mafuta aolivi: makilogramu matatu aperekwe pabodzi pene na ng'ombe yonsene, makilogramu mawiri aperekwe pabodzi pene na bira onsene,

¹⁵kilogramu ibodzi iperekwe pabodzi pene na mwanabira onsene.

¹⁶Mupereke pontho bokho mbodzi kukhala nsembe yakubulusira pyakudawa. Perekani penepi kuthimizira pa nsembe yakupyerera imbapereka imwe nsiku na nsiku pabodzi pene na chakupereka chache cha mapira pontho chakupereka chache chakumwa.

¹⁷Pansiku yachiwiri perekani anamphulu amuna khumi na awiri, mabira amuna awiri, pontho na anabira amuna khumi na anayi a chaka chibodzi, onsenewa akhale akusowa chilema.

¹⁸Penepi mupipereke pabodzi pene na pyakupereka pya mapira na pyakupereka pyakumwa malingana na munafunikira ipyo pansiku yakutoma.

²⁰Pansiku yachitatu perekani anamphulu amuna khumi na mbodzi, mabira amuna awiri, na anabira amuna khumi na anayi a chaka chibodzi, onsenewa akhale akusowa chilema.

²¹Penepi mupipereke pabodzi pene na pyakupereka pya mapira na pyakupereka pyakumwa malingana na munafunikira ipyo pansiku yakutoma.

²³Pansiku yachinayi perekani anamphulu amuna khumi, mabira amuna awiri, pontho na anabira amuna khumi na anayi a chaka chibodzi, onsenewa akhale akusowa chilema.

²⁴Penepi mupipereke pabodzi pene na pyakupereka pya mapira na pyakupereka pyakumwa malingana na munafunikira ipyo pansiku yakutoma.

²⁶Pansiku yachishanu perekani anamphulu amuna afemba, mabira amuna awiri, pontho na anabira amuna khumi na anayi a chaka chibodzi, onsenewa akhale akusowa chilema.

²⁷Penepi mupipereke pabodzi pene na pyakupereka pya mapira na pyakupereka pyakumwa malingana na munafunikira ipyo pansiku yakutoma.

²⁹Pansiku yachitanthatu perekani anamphulu asere, mabira amuna awiri, pontho na anabira amuna khumi na anayi a chaka chibodzi, onsenewa akhale akusowa chilema.

³⁰Penepi mupipereke pabodzi pene na pyakupereka pya mapira na pyakupereka pyakumwa malingana na munafunikira ipyo pansiku yakutoma.

³²Pansiku yachinomwe perekani anamphulu amuna anomwe, mabira amuna awiri, pontho na anabira khumi na anayi a chaka chibodzi, onsenewa akhale akusowa chilema.

³³Penepi mupipereke pabodzi pene na pyakupereka pya mapira na pyakupereka pyakumwa malingana na munafunikira ipyo pansiku yakutoma.

³⁵Pansiku yachisere gumanyikanani kuti mupembedze mbamuleke phata mabasanu a nsiku na nsiku.

³⁶Perekani nsembe yakupyerera kukhala chakupereka chakusasanywa na moto kuna MBUYA, chile khwemache imbamkomera MBUYA: mwanamphulu wamamuna mbodzi, bira wamamuna mbodzi, pontho na anabira amuna anomwe a chaka chibodzi, onsenewa akhale akusowa chilema.

³⁷Penepi mupereke pabodzi pene na pyakupereka pya mapira na pyakupereka pyakumwa malingana na munafunikira ipyo pansiku yakutoma.

³⁹Wenewu ndiye mwambo wa nsembe zakupyerera, pyakupereka pya mapira, pyakupereka pyakumwa na nsembe zachiphatizano, pile pyathema imwe kupipereka kuna MBUYA pandzidzi wa maphwando anu akusankhulika. Penepi nkhuthimizira pa pyakupereka pimbapereka imwe kuchitisa kuti pidadumbira imwe pikwane-kwane penu pyakupereka na kufuna kwache munthu.

⁴⁰Natenepo Mose adapanga Aisraele pyonsene pikhadalonga MBUYA pile.