Read cisena KALEMBERA 3 Bible Online

KALEMBERA 3 - cisena bible

KALEMBERA 3

¹Ishi ndi banja ya Aroni na Mose pandzidzi udalonga MBUYA kuna Mose paphiri ya Sinai.

²Aroni akhali na ana anayi achimuna: Nadabu, wautombo, Abihu, Eleazara na Itamara.

³Iwo adasankhulwa mbadzozwa kukhala anyansembe,

⁴mbwenye Nadabu na Abihu adaphiwa pandzidzi udapereka iwo chakupereka chakusasanywa na moto okhonda chena kuna MBUYA m'thando yatchetcha ya Sinai. Iwo hakhadabala ana tayu, natenepo Eleazara na Itamara adaphata basa ya unyansembe pandzidzi ukhali Aroni na moyo.

⁵MBUYA adalonga kuna Mose mbati,

⁶“Idza na dzinza ya Levi pamaso pa Aroni mbuasankhule kukhala anyakumtumikira.

⁷Iwo anaphata basa yonsene yakufunika pa Chikhumbi cha Mulungu, pontho anaphatira basa anyansembe na dzinza yonsene ya Aisraele.

⁸Iwo anakhala anyakuyang'anira pinthu pyonsene pya m'Chikhumbi cha Mulungu mbaphata basa m'mbuto mwa dzinza yonsene ya Aisraele.

⁹Basa ya dzinza ya Levi nkhutumikira kwene Aroni na anache basi.

¹⁰Sankhula kwene Aroni na anache basi kuti aphate basa ya unyansembe; munthu ene pyache onsene anapiyesera kuchita tenepoyo athema kuphiwa.”

¹¹MBUYA adalonga pontho kuna Mose mbati,

¹²“Dzinza ya Levi lero njanga. Ndzidzi udapha ine ana autombo onsene a mu Iguputo, ndidapambula ana autombo onsene a m'mabanja a Aisraele na a pifuyo pyawo pyonsene kukhala anga ene. Tenepo m'mbuto mwa kukwata ana onsene autombo a mabanja a Aisraele kukhala anga ene, ndakwata dzinza ya Levi; iwo anakhala anga. Ine ndine MBUYA.”

¹³

¹⁴M'thando yatchetcha ya Sinai MBUYA adalonga kuna Mose

¹⁵kuti achite kalembera dzinza yonsene ya Levi malingana na mbumba na mabanjawo, kulemba munthu onsene wamamuna wakukwanisa mwezi ubodzi wakubalwa penu kupiringana penepo.

¹⁶Mose adachitadi tenepo ninga montho mudampangira MBUYA.

¹⁷Levi akhali na ana atatu achimuna: Gereshoni, Kohati na Merari, enewa ndiye akhali makolo a mbumba imbadziwika na madzinawo. Gereshoni akhali na ana awiri achimuna: Libini na Shimei; Kohati akhali na ana anayi achimuna: Amuramu, Izihara, Hebroni na Uziele; pontho Merari akhali na ana awiri achimuna: Mahili na Mushi. Enewa ndiye akhali makolo a mabanja ambadziwika na madzinawo ale.

¹⁸

¹⁹

²⁰

²¹Mbumba ya Gereshoni ikhadadzala na mabanja a Libini na Shimei.

²²Konta ya amuna onsene akukwanisa mwezi ubodzi wakubalwa penu kupiringana penepo akhadalembwa ale akhali pikwi pinomwe na madzana mashanu.

²³Mbumba yeneyi idapangwa kamanga makumbi awo kutcheru kwa Chikhumbi cha Mulungu kukhundu yakumadokero dzuwa.

²⁴Eliasafu mwana Laele mbakhala mkadamu wa mbumba yeneyi.

²⁵Iwo basawo ikhali kuyang'anira Chikhumbi cha Mulungu, chinguwo chakuphimba nacho m'bwalo na kunja, chinguwo cha pamsuwo wa Chikhumbi,

²⁶chinguwo cha pampanda wakuzungulira Chikhumbi chonsene na guwa yansembe, na chinguwo chakufunga nacho msuwo wa mpanda. Iwo ndiye enechiro ache akuphata basa yonsene ya pinthu penepi.

²⁷Mbumba ya Kohati idadzala na mabanja a Amuramu, Izihara, Hebroni na Uziele.

²⁸Konta ya amuna akukwanisa mwezi ubodzi penu kupiringana penepo adalembwa ale, akhalipo pikwi pisere na madzana matanthatu.

²⁹Mbumba yeneyi idapangwa kumanga makumbi awo kukhundu yakumwera kwa Chikhumbi cha Mulungu.

³⁰Mkadamu wa mbumba yeneyi akhali Elizafani mwana wamamuna wa Uziele.

³¹Iwo basawo ikhali yakuyang'anira Bokosi ya Chiverano, thebulu, chakuikhira nyale, guwa yansembe, pinthu pimbaphatisa basa anyansembe m'Mbuto Yakuchena, na chinguwo cha pamsuwo wa Mbuto Yakuchenesesa. Iwo ndiye akhali enechiro ache akuphata basa yonsene papinthu penepi.

³²Mkadamu wa dzinza yonsene ya Levi akhali Eleazara mwana Aroni nyansembe. Iye akhali nyakuyang'anira anthu akhaphata basawo ya unyansembe m'Mbuto Yakuchena ale.

³³Mbumba ya Merari idadzala na mabanja a Mahili na Mushi.

³⁴Konta ya amuna onsene akukwanisa mwezi ubodzi wakubalwa penu kupiringana penepo adalembwa ale, akhalipo pikwi pitanthatu na madzana mawiri.

³⁵Mbumba yeneyi idapangwa kumanga makumbi awo kukhundu yakumpoto kwa Chikhumbi cha Mulungu, Zuriele mwana Abihaili ndiye akhali mkadamu wawo.

³⁶Iwo basawo ikhali yakuyang'anira miti yonsene yakumangira nayo Chikhumbi cha Mulungu: mitandaliko yache, mizati yache, matako ache na pyonsene pyakufunikira pabasa yeneyi. Iwo ndiye akhali enechiro ache akuphata basa yonsene ya pinthu penepi.

³⁷Iwo akhali pontho na basa yakuyang'anira mizati, matako, ntchiri na nkhambala. Pyonsenepi pikhali pya pampanda.

³⁸Mose, Aroni na anache adamanga msasawo kunkhope kwa Chikhumbicho kukhundu yakumabulukiro dzuwa. Iwo basawo ikhali yakupereka nsembe m'Mbuto Yakuchena thangwi ya anthu a Israele. Munthu unango ene pyache adapiyesera kuchita tenepo adathema kuphiwa.

³⁹Konta ya amuna onsene a dzinza ya Levi a mwezi ubodzi wakubalwa penu kupiringana penepo, ale adamala lembwa na Mose kada munthu mbumbache ninga mudalongera MBUYA akhalipo pikwi makumawiri na piwiri.

⁴⁰MBUYA adalonga kuna Mose mbati, “Ana onsene autombo a Aisraele mbanga. Natenepo chita kalembera wa ana amuna onsene autombo a Aisraele kutomera wakukwanisa mwezi ubodzi wakubalwa penu kupiringana penepo. Mbwenye m'mbuto mwa ana onsenewo, ndasankhula dzinza ya Levi kukhala anga ene! Ine ndine MBUYA! Pontho ndasankhula pifuyo pya dzinza ya Levi kukhala pyanga pyene m'mbuto mwa pifuyo pyakutoma kubalwa pyonsene pya Aisraele.”

⁴¹

⁴²Mose adaveradi mbachita kalembera ana onsene achimuna autombo

⁴³akukwanisa mwezi ubodzi wakubalwa penu kupiringana penepo. Konta ya anthu onsene akhali pikwi makumawiri na piwiri na madzana mawiri na makumanomwe na atatu.

⁴⁴MBUYA adalonga kuna Mose mbati,

⁴⁵upereke dzinza ya Levi kuna ine kukhala yanga ene m'mbuto mwa ana autombo onsene a Israele, pontho upereke pifuyo pyonsene pya dzinza ya Levi m'mbuto mwa pifuyo pyonsene pyakutoma kubalwa pya Aisraele onsene.

⁴⁶Na thangwi yakuti dzinza ya Levi yabuluka mukonta ya ana onsene a Israele na konta ya madzana mawiri na manomwe na atatu kupita m'mbuto mwa ana autombo a Israele, iwe wathema kuombola ana akuthimizirapowa

⁴⁷na kobiri zasiliva zishanu, munthu onsene malingana na mdida ukhaphatiswa basa ndzidzi wenewo,

⁴⁸mbupereke kobiri zenezi kuna Aroni na anache.

⁴⁹Mose adaveradi mbakwata

⁵⁰kobiri zasiliva zakukwana chikwi chibodzi na madzana matatu na makumatanthatu na zishanu

⁵¹mbazipereka kuna Aroni na anache.