Read cisena KALEMBERA 30 Bible Online

KALEMBERA 30 - cisena bible

KALEMBERA 30

¹Mose adapereka matongero ali m'tchindewa kuna akadamu a madzinza a Israele.

²Munthu angadumbira kupereka chinthu kuna MBUYA, penu kudumbira kuti iye hanachita chinthu chinango tayu, iye aleke kuswa kudumbira kudachita iye kule, kwache iye athema kuchita pyonsene pidalonga iye.

³Ngakhala mwali wakukhala m'nyumba mwa makolo ache anadumbira kuna MBUYA kupereka chinthu chinango, penu kudumbira kuti iye hanachita chinthu chinango tayu,

⁴iye athema kuchita pyonsene pyadumbira iye, ngakhala babache hanalongapo pinthu tayu angava pya penepi.

⁵Mbwenye ngakhala babache pakuva pya penepi anamkhondesa kuchita pidadumbira iye pile, penepo iye ngwakusudzulwa pa pidadumbira iye. MBUYA anati amulekerere, thangwi babache ndiye adamkhondesa kuchita pidadumbira iye pile.

⁶Ngakhala mkazi anasembwa mwenemo adumbira kale chadala penu mwakukhonda dziwa pachinthu chinango,

⁷iye athema kuchita pyonsene pidadumbira iye ngakhala mamunache hanalongapo pinthu tayu angava pya penepi.

⁸Mbwenye ngakhala mamunache pakuva pya penepi anamkhondesa kuchita pidadumbira iye, penepo anakhala wakusudzuka pa pidadumbira iye pile, MBUYA anati amulekerere.

⁹Mamfelwa penu mkazi wakumwalana na mamunache hanasudzuka tayu papyonsene pidadumbira iye pile.

¹⁰Ngakhala mkazi wakusembwa anadumbira pachinthu chinango,

¹¹iye athema kuchita pyonsene pyadumbira iye ngakhala mamunache pakuva pya penepi hanalongapo pinthu tayu, penu kumkhondesa kuchita pyadumbira iye.

¹²Mbwenye ngakhala mamunache pakuva pya penepi anamkhondesa kuchita pidadumbira iye, penepo ngwakusudzuka pa pidadumbira iye pile. MBUYA anati amulekerere thangwi mamunache ndiye amkhomdesa kuchita pidadumbira iye.

¹³Mamunache ndiye ana mphamvu zakumanga penu kusudzula kudumbira kudachita iye kule.

¹⁴Mbwenye ngakhala panagwanda nsiku kubulukira nsiku idava mamunayo pya penepi mbakhonda longapo pinthu, mkaziyo athema kuchita pyonsene pidadumbira iye. Mamunayo adatsikimizira pyakudumbirako pansiku idava iye pya penepyo.

¹⁵Mbwenye ngakhala mamunayo anafudza kudumbirako pangagwanda nsiku zinango, mamunayo ndiye athema kuoneswa nyatwa thangwi ya kuchitisa mkaziyo kuchimwana kuchita pinthu pidadumbira iye pile.

¹⁶Enewa ndiye matongero a MBUYA adapereka iye kuna Mose akulonga pyakudumbira kumbachita mkazi okhonda sembwa wakukhala m'nyumba mwa babache penu mkazi wakusembwa.