Read cisena KALEMBERA 31 Bible Online

KALEMBERA 31 - cisena bible

KALEMBERA 31

²“Atchunyuse Amidiani thangwi ya pinthu pidachita iwo kuna Aisraele. Ungamala chita Penepyo, unafa.”

³Natenepo Mose adalonga kuna anthu mbati, “Sasanyika kwenda kunkhondo towera mukamenyane na Amidiani na kuatchunyusa thangwi ya pinthu pidachita iwo kuna MBUYA.

⁴Padzinza yonsene ya Aisraele pabuluke amuna chikwi chibodzi kwenda kunkhondo.”

⁵Natenepo amuna chikwi adasankhulwa kubulukira m'dzinza yonsene. Konta ya amuna onsene ikhali pikwi khumi na piwiri kusasanyikira nkhondo.

⁶Mose adagwinya amuna enewa kunkhondo mwakutsogolerwa na Finiasi mwana Eleazara nyansembe, ule akhali nyakuyang'anira pinthu pyakupambulika pya MBUYA na ngoma zakupereka chidziwiso kuna anthu.

⁷Iwo adamenyana nawo Amidiani ninga mudalongera MBUYA kuna Mose mbapha amuna onsene,

⁸pabodzi pene na mafumu mashanu a Amidiani: Evi, Rekemu, Zuri, Huri na Reba. Iwo adapha pontho Balamu, mwana Beori.

⁹Aisraele adaphata akazi a Chimidiani na ana ene mbapokosera ng'ombe, mabira na mfumawo yonsene,

¹⁰pontho mbapisa mizindawo yonsene na misasawo ene.

¹¹Iwo adakwata pyonsene pidapokosera iwo pabodzi pene na anyaperezo pontho pifuyo,

¹²mbadza pamaso pa Mose, Eleazara na dzinza yonsene ya Israele, ale akhadamanga msasawo pamaphedi a Moabu kukhundu inango ya mkulo wa Yorodani kubulukira ku Yeriko.

¹³Mose, Eleazara na akadamu anango a m'dzinza ya Israele adabuluka mumsasa mule kagumanikana na anyankhondo.

¹⁴Mose akhadazhangalira akulu-akulu, akadamu a anyankhondo pikwi na akadamu a anyankhondo dzana, ale akhadadza kubulukira kunkhondo.

¹⁵Iye adavunza mbati, “Thangwi yache ninji mwaaleka na moyo akazi onsenewa?

¹⁶Kumbukani kuti akhali akazi, ale adateweza pidalonga Balamu, pontho pa Peori adachitisa kuti anthu akhale okhonda khulupirika kuna MBUYA. Penepi ndiye pidadzesa muliri pakati pa anthu a MBUYA.

¹⁷Natenepo ndzidzi ontho uno iphani mphale onsene na mkazi onsene wakudziwa kale mamuna,

¹⁸mbamuleke na moyo akazi okhonda dziwa mamuna onsene kuti akhale anu.

¹⁹Tenepo munthu onsene, ule apha munthu penu kukhuya mtembo athema kukhala kunja kwa msasa kufikirana nsiku zinomwe zimale. Pansiku yachitatu na yachinomwe mupichenese mwekha mwene pabodzi pene na akazi aphata imwewa.

²⁰Pontho mwathema kuchenesa nguwo zonsene, pontho chinthu chonsene chakusasanywa kubulukira kunthembe, ubweya wa mbuzi na miti.”

²¹Eleazara nyansembe adalonga kuna amuna akhadabwera kubulukira kunkhondo ale mbati, “Matongero apereka MBUYA kuna Mose mbawa:

²²Pinthu pyonsene pyokhonda kupya na moto ninga golidi, siliva, nkuwa, simbi, utale, penu ntove, pyathema kucheneswa pakuchita kupivula na moto. Mbwenye pinango pyonsene picheneswe na madzi.

²³

²⁴Pansiku yachinomwe mwathema kufula nguwo zanu; mungamala penepo munakhala akuchena pamaso pa Mulungu pontho munatawiriswa kupita mumsasa.”

²⁵MBUYA adalonga kuna Mose mbati,

²⁶“Iwe na Eleazara pabodzi pene na akadamu anango a dzinza ya Israele mulengese pyonsene pidapokosera imwe kuna Amidiani pabodzi pene na anyaperezo pontho pifuyo.

²⁷Penepi upigawe kati na kati khundu ibodzi ikhale ya ale adenda kamenya nkhondo, khundu inangomboyo ikhale ya anthu anango onsene a Israele.

²⁸Kubulukira pa khundu yakwata anyankhondo ukwatepo msonkho wa MBUYA; pa anyaperezo, ng'ombe, mabira na mbuzi msonkho wache ndi chibodzi pa madzana mashanu onsene.

²⁹Penepi upipereke kuna Eleazara nyansembe kuti chikhale chakupereka chakupambulika kuna MBUYA.

³⁰Kubulukira pa khundu yakwata anthu anango onsene a Israele, ukwatepo chibodzi pa anyaperezo, ng'ombe, mabulu, mabira na mbuzi makumashanu onsene. Penepi upipereke kuna Alevi, ale akuyang'anira Chikhumbi cha Mulungu.”

³¹Mose na Eleazara adachitadi pyonsene pidalonga MBUYA kuna Mose.

³²Pili m'tchindemu ndi konta ya pinthu pidapokosera anyankhondo kuthimiza pinthu pidakoya iwo kuti pikhale pyawo: mabira na mbuzi pikwi madzana matanthatu na makumanomwe na pishanu ng'ombe pikwi makumanomwe na piwiri mabulu pikwi makumatanthatu na chibodzi akazi okhonda dziwa mamuna pikwi makumatatu na piwiri.

³³

³⁴

³⁵

³⁶Khundu ibodzi idapaswa anyankhondo ndi: Mabira na mbuzi pikwi madzana matatu na makumatatu na pinomwe na madzana mashanu; pa konta yeneyi mabira na mbuzi madzana matanthatu na makumanomwe na ashanu ukhali msonkho wakuperekwa kuna MBUYA ng'ombe pikwi makumatatu na pitanthatu; pa konta yeneyi ng'ombe makumanomwe na ziwiri ukhali msonkho wakuperekwa kuna MBUYA mabulu pikwi makumatatu na madzana mashanu; pa konta yeneyi mabulu makumatanthatu na mbodzi ukhali msonkho wakuperekwa kuna MBUYA akazi okhonda dziwa mamuna pikwi khumi na pitanthatu; pa konta yeneyi akazi makumatatu na awiri ukhali msonkho wakuperekwa kuna MBUYA.

³⁷

³⁸

³⁹

⁴⁰

⁴¹Natenepo Mose adapereka kuna Eleazara msonkho kukhala chakupereka chakupambulika kuna MBUYA ninga montho mudalongera MBUYA.

⁴²Pinthu pidapaswa Aisraele onsene pikhali sasawa na pinthu pidapaswa anyankhondo: mbuzi na mabira pikwi madzana matatu na makumatatu na pinomwe na madzana mashanu; ng'ombe pikwi makumatatu na matanthatu; mabulu pikwi makumatatu na madzana mashanu; pontho akazi okhonda dziwa mamuna pikwi khumi na pitanthatu.

⁴³

⁴⁴

⁴⁵

⁴⁶

⁴⁷Kubulukira pa pinthu penepi Mose adakwata chibodzi pa makumashanu onsene a anyaperezo na a pifuyo pene mbapipereka kuna Alevi, ale basawo ikhali yakuyang'anira Chikhumbi cha Mulungu ninga montho mudalongera MBUYA.

⁴⁸Kubuluka penepo akadamu a anyankhondo adenda kuna Mose

⁴⁹mbakalonga mbati, “Anyabasanufe tamala lengesa anyankhondo ambayang'anira ife ale, pontho nkhabe mbodzi asowapo tayu.

⁵⁰Natenepo ife tikudza na pyakuthemesera manungo pyagolidi, magoza, pibangili, mphete za m'pyala, mphete za m'khutu, na mikufu pile pidakwata ife kukhala pyathu. Penepi ife tikupipereka kuna MBUYA ninga pyakupagali napyo moyo wathu towera iye atitchinjirize.”

⁵¹Mose na Eleazara adatambira golidi, pyonsene pyakuthemesera manungo.

⁵²Pyonsene pidapereka akadamu kulemera kwache kukhali nenene makilogramu madzana mawiri.

⁵³Ale akuti hakhali akadamu tayu adakoya pinthu pidakwata iwo pile.

⁵⁴Natenepo Mose na Eleazara adakwata golidi ule kwenda naye m'Chikhumbi cha Mulungu towera MBUYA atchinjirize Aisraele.