Read cisena KALEMBERA 32 Bible Online

KALEMBERA 32 - cisena bible

KALEMBERA 32

¹Madzinza a Rubeni na Gadi akhali na pifuyo pizinji. Tenepo pidaona iwo kuti nthemba za Yazere na Gileadi ikhali yadidi pyakwanga kudyeserapo pifuyo,

²adenda kuna Mose, Eleazara na akadamu anango a dzinza yonsene mbalonga mbati,

³“Maluwani a Ataroti, Diboni, Yazere, Nimira, Heshiboni, Eleale, Sibima, Nebo na Beoni,

⁴nthemba ile MBUYA adaphedza Aisraele kuikunda ndi nthemba yadidi pyakwanga na pifuyo, pontho anyabasanufe pifuyo tili napyo.

⁵Natenepo ife taphata miyendo ngatipasenimbo dziko yeneyi kuti ikhale yathu ene, pontho lekani kutiwambusa mkulo wa Yorodani kuti tikakhazikike kweneko.”

⁶Mose adaatawira mbati, “Kadi pinafuna imwe mphyakuti musale pano uku Aisraele anzanu akwenda kamenya nkhondo?

⁷Imwe mwawanga tani mtima tenepa kufuna kugwisa mfuwa Aisraele anzanu m'dziko yaapasa MBUYA?

⁸Penepo ndiye pidachita ababanu pidaatuma ine kubulukira ku Kadeshi Barinea kazonda dziko yeneyi.

⁹Iwo adenda mpakana kuphedi ya Eshikolo mbaiona dzikoyo, mbwenye pidabwerera iwo adagwisa mfuwa anzawo kupita m'dziko ikhadaapasa MBUYA ile.

¹⁰MBUYA adazhangali pyakwanga pansiku yeneyo mbadumbira mbati,

¹¹‘Na thangwi ya kuthimiza kukhonda kundivera kwachita iwoku, amuna a pyaka makumawiri pyakubalwa penu kupiringana penepo, ale adabulukira m'dziko ya Iguputo nkhabe mbodzi wa iwo anafuna dzapita m'dziko idadumbira ine kuna Abrahamu, Isake na Yakobo tayu.’

¹²Penepi pidasiye munthu tayu kupambula Kalebu mwana Yefune wa dzinza ya Akenizi na Yoswa mwana Nuni; enewa adathimiza kuvera MBUYA.

¹³MBUYA adazhangalira anthu mbaachitisa kutsalakatika m'thando yatchetcha pyaka makumanayi kufikirana mfendu onsene udachita pyokhonda komera MBUYA ule udamala.

¹⁴Natenepo imwe lero mwapita m'mbuto mwa ababanu, mfendu wachinchino wakudzala na amuna akudawika akusasanyika kudzesa pontho ukali wakugoswa wa MBUYA pana Aisraele.

¹⁵Ngakhala imwe anthu a madzinza a Rubeni na Gadi munakhonda kumtewera chinchino pano, iye anati aasiye pontho okha anthuwa m'thando yatchetcha muno, natenepo anthu angavungika munafuna dzaona nyatwa ndimwe thangwi ndimwe mwapichitisa.”

¹⁶Iwo adenda kalonga na Mose mbati, “Chakutoma titawiriseni kuti timange mathanga a pifuyo pyathu na maluwani a akazathu na anathu.

¹⁷Tingamala penepo ife tinasasanyika kwenda pabodzi na Aisraele anzathu kamenya nkhondo, pontho tinaatsogolera kufikirana tikaakhazikise m'dziko inafuna iwo kakwata kukhala yawo ene. Ndzidzi uno akazathu na anathu ene anabanga khala muno m'maluwani akutchingwa na mpanda gopesera anthu a m'dziko muno.

¹⁸Ife sinabwerera tayu kumisa kwathu kufikirana Aisraele anzathu onsene amale kwata dziko idalongwa kuti inakhala yawo ile.

¹⁹Ife nkhabe kwata chinthu na chibodzi chene pakati pawo kukhundu yeneyo ya Yorodani tayu, thangwi ife tatambira kale pinthu pyathu kukhundu ino yakumabulukiro dzuwa a mkulo wa Yorodani.”

²⁰Mose adatawira mbati, “Ngakhala pinalonga imwepi munapichitadi, chinchino pano pamaso pa MBUYA sasanyikani kwenda kamenya nkhondo.

²¹Anyakumenya nkhondo anu onsene awambuke Yorodani, tenepo pansi pa utongi wa MBUYA iwo atome kamenya nkhondo na anyamalwathu kufikirana MBUYA aakunde

²²mbakwata dzikoyo kukhala ya Aisraele. Mungamala penepo munakwanisa kubwerera pyanu, thangwi mwachitisa kukwana-kwana pinthu pidadumbira imwe kuna MBUYA na kuna Aisraele anzanu. Tenepo MBUYA anatawirisa kuti dziko yakumabulukiro dzuwa a mkulo wa Yorodaniyi ikhale yanu.

²³Mbwenye ngakhala pyadumbira imwepi nee munapichita tayu, ndikukucheuzani kuti munati mumdawire MBUYA. Lekani phophonya pakuchita pinthu penepi gopesera munatchunyuswa thangwi ya pyakudawa pyanu.

²⁴Natenepo imwe mangani maluwani anu na mathanga a pifuyo pyanu, kwache chitani malingana na kudumbira kudachita imwe!”

²⁵Amuna a Gadi na Rubeni adalonga mbati, “Anyabasanufe tinati tichite ninga mwatipangira imwe.

²⁶Akazathu, anathu na pifuyo pyathu anasalira m'maluwani a muno mu Gileadi.

²⁷Mbwenye tonsenefe tasasanyika kwenda kamenya nkhondo pansi pa utongi wa MBUYA. Ife tinati tiwambuke mkulo wa Yorodani kamenya nkhondo ninga montho mwalongera imwe.”

²⁸Natenepo Mose adapereka matongero awa kuna Eleazara, Yoswa na akadamu anango a Israele:

²⁹“Ngakhala amuna a Gadi na Rubeni anawambuka Yorodani kamenya nkhondo pansi pa utongi wa MBUYA, pontho ngakhala na chiphedzo chawo imwe munakwanisa kukunda anyamalwanu mbamukwata dzikoyo, apasenimbo nthemba ya Gileadi kukhala yawo ene.

³⁰Mbwenye ngakhala iwo hanawambuka Yorodani tayu kamenya nkhondo pabodzi na imwe, iwo atambire khundu yawo m'dziko yonthoyo ya Kanani ninga munafuna kachitira imwe.”

³¹Amuna a Gadi na Rubeni adatawira mbati, “Anyabasanufe tinachita ninga montho mwatipangira MBUYA.

³²Pansi pa utongi wache ife tinati tiwambuke kupita m'dziko ya Kanani kamenya nkhondo towera khundu yathu yakuti titambire ikhale kuno kumabulukiro dzuwa a Yorodani.”

³³Natenepo Mose adapereka kuna madzinza a Gadi, Rubeni na Manase wakumabulukiro dzuwa dziko yonsene ya Mfumu Sihoni wa Aamori na ya Mfumu Ogi wa ku Bashani, dziko yonsene, mizinda na midzi yakuzungulira.

³⁴Dzinza ya Gadi adamanga pontho maluwani a Diboni, Ataroti, Aroeri,

³⁵Atiroti-Shofani, Yazere, Yogobeha,

³⁶Beti-Nimira na Beti-Harani, onsene maluwani akutchingwa na mpanda, pontho akukhala na mathanga.

³⁷Dzinza ya Rubeni idamanga pontho maluwani a Heshiboni, Eleale, Kiriataimu,

³⁸Nebo, Baala-Meoni (dzina yeneyi idatchandulwa mwinango), na Sibima. Maluwani akhamanga iwo pontho akhaathula madzina achinchino.

³⁹Mbumba ya Makiri, mwana Manase adachita nkhondo na nthemba ya Gileadi mbaipokosera kuthamangisa Aamori onsene akhali mwenemo ale.

⁴⁰Natenepo Mose adapereka Gileadi kuna mbumba ya Makiri, tenepo iwo akhakhaladi kweneko.

⁴¹Yairi, wa dzinza ya Manase, adamenya nkhondo mbapokosera midzi inango mbaithula “Midzi ya Yairi.”

⁴²Noba adamenya nkhondo mbapokosera Kenati na midzi yache ene mbaithula na dzinache Noba.