Read cisena KALEMBERA 33 Bible Online

KALEMBERA 33 - cisena bible

KALEMBERA 33

¹Uli m'tchindewu ndi nyandandanda wa mbuto zikhamanga Aisraele msasa pikhabuluka iwo m'dziko ya Iguputo m'magulu-magulu pansi pa utongi wa Mose na Aroni.

²Na kutongwa na MBUYA, Mose akhalemba madzina a mbuto zonsene zikhadamangapo iwo msasa.

³Aisraele adabuluka m'dziko ya Iguputo pansiku yakhumi na chishanu ya mwezi wakutoma wa chaka. Yeneyi ikhali mangwana mwache pidamala Phwando ya Paska yakutoma. Na kuyang'anirwa na MBUYA iwo adabuluka mumzinda wa Ramese pamaso pa Aiguputo onsene,

⁴ale akhaikha anawo autombo m'masiye akhadaphiwa na MBUYA ale. Pakuchita penepi MBUYA adaonesadi kuti iye ngwamphamvu pyakwanga kupiringana milungu ya Iguputo.

⁵Aisraele adabuluka mu Ramese mbakamanga msasa pa Sukoti.

⁶Kubuluka penepo adamanga msasa pa Etamu kunkhomo kwa thando yatchetcha.

⁷Kubuluka penepo adabwerera m'nduli ku Pihahiroti kumabulukiro dzuwa a Baala-Zefoni mbakamanga msasa chifupi na Migidoli.

⁸Iwo adabuluka pa Pihahiroti mbagwanda na pa Nyanza Yakufira kupita m'thando yatchetcha ya Shuri; pidafamba iwo nsiku zitatu adafika pa Mara mbamanga msasa penepo.

⁹Kubuluka penepo adenda ku Elimu, kule kudamanga iwo msasa thangwi kweneko kukhali mphuno za madzi khumi na ziwiri, pontho na miti yamidikhwa makumanomwe.

¹⁰Iwo adabuluka pa Elimu mbakamanga msasa chifupi na Nyanza Yakufira.

¹¹Kubuluka penepo adamanga msasa m'thando yatchetcha ya Sini.

¹²Kubuluka penepo adamanga msasa pa Dofika.

¹³Kubuluka penepo adamanga msasa pa Alushi.

¹⁴Kubuluka penepo adamanga msasa pa Refidimu, pale pakhali nkhabe madzi akumwa.

¹⁵Kubuluka pa Refidimu kwenda ku Phiri ya Hori adakhala m'mbuto izi: Thando ya Sinai, Kibiroti-Hataava (penu Masiye a Usa), Hazeroti, Ritima, Rimoni, Perezi, Libina, Risa, Kehelata, Phiri ya Shefera, Harada, Makeloti, Tahati, Tera, Mitika, Hashimona, Moseroti, Bene-Yaakani, Hori-Hagidigadi, Yotibata, Abirona, Ezioni-Geberi, thando yatchetcha ya Zini (ile ndi Kadeshi), na Phiri ya Hori, m'khundu-khundu mwa dziko ya Edomu.

³⁸Pakuchita kupangwa na MBUYA, Aroni nyansembe adakwira Phiri ya Hori. Iye adafera penepo uku ana pyaka dzana na makumawiri na pitatu, pansiku yakutoma ya mwezi wachishanu wa chaka chamakumanayi pidabuluka Aisraele m'dziko ya Iguputo.

⁴⁰Mfumu wa ku Aradi wa m'thando yatchetcha ya Negebu adava kuti Aisraele akhabwera.

⁴¹Kubulukira ku Phiri ya Hori kwenda kumaphedi a Moabu Aisraele adamanga msasa pambuto izi: Zalimona, Punoni, Oboti, madembe a Abarimu m'dziko ya Moabu, Diboni, Gadi, Alimoni-Dibilataimu, mapiri a Abarimu chifupi na Phiri ya Nebo, pontho na maphedi a Moabu kuwambuka mkulo wa Yorodani kubulukira ku Yeriko pakati pa Beti-Yeshimoti na Phedi ya Kesha.

⁵⁰Penepo pamaphedi a Moabu kumtunda unango wa Yorodani kubulukira ku Yeriko MBUYA adapanga Mose

⁵¹kulonga kuna Aisraele kuti: “Mungawambuka Yorodani kupita m'dziko ya Kanani,

⁵²mwathema kuathamangisa onsene anakhala m'dzikomo. Vungani milungu yawo yakusasanywa na miyala pontho na simbi pabodzi pene na mbuto zawo zene zakupembedzerapo milungu.

⁵³Kwatani dzikoyo mbamukhazikikemo thangwi ndikukupasani dzikoyi kuti ikhale yanu ene.

⁵⁴Gawanani dzikoyo pakuchita ntsango pakati pa madzinza pontho mbumba. Mbuto ikulu iperekwe kuna mbumba ikulumbo, mbuto ing'ono iperekwembo kuna mbumba ing'ono.

⁵⁵Mbwenye ngakhala anthu onsene anakhala mwenemowo nee munaathamangisa tayu, anyakusalirawo anakhala anthu akukuonesani nyatwa ninga chirombo m'maso mwanu pontho ninga mfula kumanyalo kwanu, pontho iwo anamenyana namwe.

⁵⁶Imwe mungakhonda kuathamangisa, ndinati ndikuvungeni ninga kuavunga kukhafuna ine kuachita.”